តំណាងគណបក្សភ្លើងទៀនបានហៅការរារាំងនេះថា គឺជាការរើសអើងមួយដែលមិនអាចទទួលយកបាន ហើយក៏ជាការធ្វើទុក្ខបុកម្នេញ និងគំរាមកំហែងខាងនយោបាយ បើទោះជាគណបក្សភ្លើងទៀនបានស្នើសុំការឃោសនា និងចែកបណ្ណព័ត៌មាន ស្ដីពីការបោះឆ្នោតត្រឹមត្រូវទៅតាមនីតិវិធីហើយយ៉ាងណាក្ដី។
ជាបេក្ខជនចៅសង្កាត់ស្ទឹងវែង កូតាមកពីគណបក្សភ្លើងទៀន ប្រចាំខេត្តកោះកុង លោក ប៉ាល់ កែប ប្រាប់ វីអូឌី នៅថ្ងៃអង្គារនេះថា ក្រុមការងាររបស់ខ្លួនត្រូវបានប្រធានផ្សារដងទង់ លោក ម៉ក ណុច ហាមឃាត់ដោយមិនឱ្យចុះឃោសនា និងផ្ដល់ព័ត៌មាន អំពីកម្មវិធីនយោបាយរបស់គណបក្សនៅក្នុងផ្សារនេះទេ កាលពីល្ងាចថ្ងៃទី៣០ ខែឧសភា ដោយប្រធានគ្រប់គ្រងផ្សារអះអាងថា ខ្លួនបានទទួលបទបញ្ជាពីចៅហ្វាយក្រុងខេមរភូមិន្ទ។ លោក ប៉ាល់ កែប បានហៅការរារាំងនេះថា គឺជាការអនុវត្តផ្ទុយពីគោលការណ៍ណែនាំដែលចេញដោយគណៈកម្មាធិការជាតិរៀបចំការបោះឆ្នោត។
បើតាមបេក្ខភាពចៅសង្កាត់រូបនេះ ការចុះផ្សព្វផ្សាយកម្មវិធីនយោបាយនៅក្នុងផ្សារនេះ ជាការអនុវត្តទៅតាមនីតិវិធីផង ហើយម្យ៉ាងវិញទៀត ក្រុមអ្នកលក់ដូរមិនសូវមានពេលតាមដានព័ត៌មានស្តីពីកម្មវិធីនយោបាយរបស់គណបក្ស។ ទាំងនេះគឺជាជម្រើសដែលគណបក្សត្រូវតែចុះឱ្យដល់មូលដ្ឋានដែលពួកគាត់រស់នៅនិងប្រកបអាជីវកម្ម។
លោកបន្តថា៖ «ពួកអាជីវករ គាត់មិននៅផ្ទះទេ មួយថ្ងៃទល់យប់ គាត់នៅហ្នឹង គាត់នៅលក់ក្នុងផ្សារ។ ពេលយប់ជ្រៅបន្តិច ទើបពួកគាត់មកដល់ផ្ទះវិញ។ យើងពិបាកផ្តល់ព័ត៌មានជូនពួកគាត់ ហើយមានតែចែកជូនគាត់នៅក្នុងផ្សារ។ នៅពេលប្រធានផ្សារទទួលបញ្ជាពីលោកចៅហ្វាយក្រុង ហើយអត់ឱ្យយើងចូលចែកអ៊ីចឹង វាជាការរឹតត្បិតក្នុងការផ្សព្វផ្សាយគោលនយោបាយរបស់យើង ក្នុងយុទ្ធនាការឃោសនានេះ»។
សេចក្ដីជូនដំណឹងរបស់ គ.ជ.ប កាលពីថ្ងៃទី១៣ ខែឧសភា បានកំណត់ពីការចុះឃោសនានៅតាមផ្សារ អំពីគោលនយោបាយរបស់គណបក្សនយោបាយទាំងអស់ដែលមានឈ្មោះក្នុងបញ្ជីបោះឆ្នោត ត្រូវអនុវត្តតាមនីតិវិធី ដូចជា ស្នើសុំទៅអ្នកគ្រប់គ្រងផ្សារយ៉ាងតិចណាស់ឱ្យបាន៣ថ្ងៃ មុនធ្វើសកម្មភាព ហើយអ្នកចូលរួមធ្វើយុទ្ធនាការឃោសនាបានយ៉ាងច្រើនណាស់ត្រឹម១០នាក់ប៉ុណ្ណោះ។
ឆ្លើយតបរឿងនេះ ចៅហ្វាយក្រុងខេមរភូមិន្ទ លោក ឈេង សុវណ្ណដា បដិសេធថា ក្នុងនាមអាជ្ញាធរពាក់ព័ន្ធ គឺមិនបានបង្គាប់បញ្ជានិងបិទសិទ្ធិសេរីភាពចំពោះគណបក្សនយោបាយដែលមានបំណងចង់ផ្សព្វផ្សាយកម្មវិធីរបស់ខ្លួននៅក្នុងផ្សារម្តងណាទេ។
លោកបន្តថា ការបិទផ្លូវមិនអនុញ្ញាតឱ្យគណបក្សនយោបាយបានចុះឃោសនានៅក្នុងផ្សារដងទង់នេះ វាជាការសម្រេចចិត្តរបស់ប្រធានគ្រប់គ្រងផ្សារតែម្នាក់ប៉ុណ្ណោះ។ ចំណេកអាជ្ញាធរ គឺមានកាតព្វកិច្ចធ្វើយ៉ាងណាជួយសម្រួលនិងរក្សាសណ្ឋាប់ឱ្យបានស្មើៗគ្នាគ្រប់គណបក្សនយោបាយ នៅអំឡុងពេលឃោសនានេះ។
លោកបន្តថា៖ «ពួកខ្ញុំអាជ្ញាធរហ្នឹង គឺត្រៀមលក្ខណៈដើម្បីសម្របសម្រួលទាំងអស់ ធានាលើការកកស្ទះ សន្តិសុខសណ្តាប់ធ្នាប់ទូទៅ ឱ្យតែមានសេចក្តីជូនដំណឹង និងសេចក្តីស្នើសុំមករបស់គណបក្សនយោបាយទាំងអស់ គឺយើងសម្រួលឱ្យទាំងអស់។ ប៉ុន្តែរឿងគណបក្សភ្លើងទៀនចូលផ្សារ គេឃាត់ គេមិនឱ្យ អាហ្នឹងរឿងរបស់គេ។ ខ្ញុំអត់ដឹងទេ! ខ្ញុំអត់បានបញ្ជាថាឱ្យឃាត់ឱ្យអីទេ»។
ចំណែកអ្នកនាំពាក្យគណៈកម្មាធិការជាតិរៀបចំការបោះឆ្នោត លោក ហង្ស ពុទ្ធា បញ្ជាក់ថា ការហាមឃាត់ណាមួយរបស់អ្នកគ្រប់គ្រងផ្សារត្រូវមានហេតុផលច្បាស់លាស់ពីបម្រាមរបស់ខ្លួន ហើយប្រសិនបើអ្នកអនុវត្តល្មើសនឹងបទបញ្ជានិងនីតិវិធីនេះ នឹងរងការផាកពិន័យទៅតាមបញ្ញត្តិដូចមានកំណត់នៅក្នុងច្បាប់បោះឆ្នោត។
លោកបន្តថា៖ «ជានីតិវិធី គឺអនុញ្ញាត! ប៉ុន្តែបើអ្នកគ្រប់គ្រងផ្សារនោះ ក៏ត្រូវបង្ហាញអំពីហេតុផលយ៉ាងណាដែលមិនអនុញ្ញាតដែរ។ ប៉ុន្តែប្រសិនបើមានការសង្ស័យទៅលើបញ្ហានេះ គឺសាម៉ីគណបក្សអាចធ្វើប្តឹងទៅគណៈកម្មការឃុំរៀបចំការបោះឆ្នោតបាន»។
បើទោះជាបែបណា សម្រាប់លោក ប៉ាល់ កែប បង្ហាញជំហរថា ក្រុមការងារគណបក្សភ្លើងទៀនកំពុងពិចារណាបញ្ហានេះ ប៉ុន្តែអាចនឹងមិនប្តឹងផ្តល់ច្រើនជាង។
ការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ សម្រាប់អាណត្តិទី៥នេះ ប្រព្រឹត្តទៅមានរយៈពេល១៤ថ្ងៃ ដោយគិតចាប់ពីថ្ងៃទី២១ ខែ ឧសភា និងបញ្ចប់ទៅវិញនៅថ្ងៃទី៣ ខែមិថុនា ឆ្នាំ២០២២។
អ្នកសម្របសម្រួលផ្នែកអង្កេត និងតស៊ូតមិ នៃអង្គការខុមហ្រ្វែល (Comfrel) លោក កន សាវាង្ស ចាត់ទុកថា នេះអាចជារបៀបដោះបន្ទុករបស់ភាគីពាក់ព័ន្ធ ដើម្បីគេចចេញពីការទទួលខុសត្រូវ។ លោកបន្តថា ជាធម្មតា អំណាចរបស់ប្រធានគ្រប់គ្រងផ្សារមិនអាចមានសិទ្ធិជំទាស់បក្សនយោបាយបានទេ ប្រសិនបើមិនមានអំណាចនៅកាងពីក្រោយខ្នងនោះទេ។
លោកបន្តថា៖ «ជាធម្មតា នៅក្នុងដំណើរការនៃការឃោសនាហ្នឹង គេតែងហៅភាគីពាក់ព័ន្ធទៅប្រាប់ទៅពន្យល់ ហើយទាំងនីតិវិធីនិងស្អីផ្សេងៗ អ៊ីចឹងមិនអាចលើកឡើងថាខ្លួនមិនបានដឹងទេ។ អ៊ីចឹងលើកឡើងថាខ្លួនអត់បានដឹង ហាក់ដូចជាខ្លួនបដិសេធនឹងការទទួលខុសត្រូវរបស់ខ្លួនហើយ»។
នៅខេត្តកោះកុង គណបក្សនយោបាយដែលបានដាក់បេក្ខភាពប្រកួតប្រជែងជ្រើសរើសមេឃុំចៅសង្កាត់មាន៦គណបក្ សរួមមាន គណបក្សប្រជាជនកម្ពុជា គណបក្សភ្លើងទៀន គណបក្សយុវជនកម្ពុជា គណបក្សខ្មែរស្រឡាញ់ជាតិ គណបក្សខ្មែររួបរួមជាតិ និងគណបក្សរាជានិយមហ្វ៊ុនស៊ិនប៉ិច។គណបក្សដែលឈរលំដាប់លេខរៀងទី២ បន្ទាប់ពីគណបក្សប្រជាជនកម្ពុជា ហើយដាក់បេក្ខភាពមេឃុំចៅសង្កាត់បានច្រើនជាងគេនៅក្នុងខេត្តកោះកុងនេះ គឺគណបក្សភ្លើងទៀន៕