មន្ត្រីជាន់ខ្ពស់ក្រសួងធម្មការ និងសាសនា អះអាងថា ព្រះតេជគុណ ហេង គីមឡាយ បានចាកចេញពីវត្តប្រាសាទរង្សី ក្នុងខេត្តសៀមរាប ដោយអង្គឯង ដោយសារព្រះអង្គមិនគោរពតាមបទបញ្ជាផ្ទៃក្នុងរបស់វត្ត ដែលហាមព្រះសង្ឃមិនឱ្យគាំទ្រគណបក្សនយោបាយណាមួយឡើយ។
ការលើកឡើងនេះធ្វើឡើងបន្ទាប់ពីព្រះតេជគុណ ហេង គីមឡាយ អះអាងថា ព្រះអង្គត្រូវបានព្រះចៅអធិការវត្តប្រាសាទរង្សី បណ្ដេញចេញពីវត្តទាំងកណ្ដាលយប់ កាលពីថ្ងៃទី២៨ ខែឧសភា ដោយសារព្រះអង្គតែងតែធ្វើសកម្មភាពគាំទ្រគណបក្សភ្លើងទៀន។
អ្នកនាំពាក្យក្រសួងធម្មការ និងសាសនា លោក សេង សុមុន្នី មានប្រសាសន៍នៅថ្ងៃអង្គារនេះថា នៅក្នុងវត្តប្រាសាទរង្សី ស្ថិតនៅភូមិដំណាក់ស្លាញ ឃុំសសរស្ដំ ស្រុកពួក ខេត្តសៀមរាប មានបទបញ្ជាផ្ទៃក្នុង ដែលមិនអនុញ្ញាតឱ្យព្រះសង្ឃនៅក្នុងវត្តធ្វើនយោបាយឬគាំទ្រគណបក្សណាមួយ និងហាមលេងហ្វេសប៊ុកនិយាយប៉ះពាល់រឿងនយោបាយ ជាដើម។
ប៉ុន្តែលោកថា ព្រះតេជគុណ ហេង គីមឡាយ មិនបានគោរពតាមបទបញ្ជាផ្ទៃក្នុងរបស់វត្តនោះទេ បែរជាទៅបង្ហោះហ្វេសប៊ុក និងធ្វើសកម្មភាពគាំទ្រគណបក្សភ្លើងទៀន ទើបព្រះតេជគុណអង្គនោះសម្រេចចាកចេញពីវត្តដោយអង្គឯង មិនមែនព្រះចៅអធិការ និងគណៈកម្មាធិការវត្ត បណ្ដេញចេញនោះទេ ។
លោកមានប្រសាសន៍ថា៖ «ព្រះអង្គបានលេងហ្វេសប៊ុក ហើយបង្ហោះហែបក្ស ហើយលោកបន្ថែមបន្ថយ វាប៉ះពាល់ដល់បទបញ្ជាផ្ទៃក្នុង [របស់វត្ត] គណៈសង្ឃក៏ប្រជុំ ដល់ប្រជុំទៅ ក៏លោកសុំចេញ [ពីវត្ត]»។
វីអូឌី មិនអាចសុំការបញ្ជាក់បន្ថែមពីព្រះតេជគុណ ហេង គីមឡាយ បានទេ នៅថ្ងៃអង្គារនេះ។
ប៉ុន្តែព្រះតេជគុណ ហេង គីមឡាយ មានសង្ឃដីកាប្រាប់ វីអូឌី កាលពីថ្ងៃអាទិត្យថា ព្រះអង្គគង់នៅវត្តប្រាសាទរង្សី ស្ថិតក្នុងស្រុកពួក ខេត្តសៀមរាប រយៈពេល៧វស្សាមកហើយ ហើយអំឡុងពេលព្រះអង្គគង់នៅក្នុងវត្តនេះ គឺព្រះអង្គតែងតែបង្ហោះព័ត៌មានតាមបណ្ដាញសង្គម ស្នើសុំបច្ច័យពីពុទ្ធបរិស័ទទាំងក្នុងនិងក្រៅប្រទេស ដើម្បីយកទៅជួយដល់ប្រជាពលរដ្ឋក្រីក្រដែលគ្មានលុយនិងគ្មានទីពឹង មិនមែនយកទៅឱ្យពលរដ្ឋដែលគាំទ្រគណបក្សនយោបាយណាមួយឡើយ។
ព្រះតេជគុណបន្តថា ស្រាប់តែដល់ថ្ងៃទី២៨ ខែឧសភានេះ ព្រះចៅអធិការវត្តប្រាសាទរង្សី ព្រះនាម ឡុក ថាន និងគណៈកម្មការវត្តឈ្មោះ ក្អោប បានប្រាប់ព្រះអង្គថា បើចង់គង់នៅក្នុងវត្តនេះបន្តទៀត ព្រះអង្គត្រូវឈប់ធ្វើសកម្មភាពរៃបច្ច័យតាមហ្វេសប៊ុក និងឈប់លេងហ្វេសប៊ុកបង្ហោះរូបគាំទ្រគណបក្សភ្លើងទៀនតទៅទៀត។ ដោយសារព្រះអង្គមិនអនុវត្តតាមការបង្គាប់បញ្ជានោះ ព្រះតេជគុណ ហេង គីមឡាយ អះអាងថា ចៅអធិការវត្ត និងគណៈកម្មាធិការវត្ត បានបណ្ដេញព្រះអង្គចេញពីវត្តភ្លាមៗតែម្តង។
ព្រះតេជគុណមានសង្ឃដីកាថា៖ «គេគុំយើងផង គេឃើញយើងគាំទ្រតាំងពីគណបក្សសង្គ្រោះជាតិ រហូតដល់គណបក្សភ្លើងទៀន គឺអាជ្ញាធរគេដឹងតាមហ្វេសប៊ុកតាំងពីយូរហើយ ថាភិក្ខុនេះមាននិន្នាការប្រឆាំង។ កាលពីម្សិលមិញ [ថ្ងៃសៅរ៍ ទី២៨ ខែឧសភា] គ្រាន់តែអាជ្ញាធរទៅសួរព្រះចៅអធិការ ថាមានប៉ុន្មានអង្គដែលជាក្រុមប្រឆាំង ស្រាប់តែគេថាអាត្មា គេក៏សម្រេចដេញអាត្មាចេញទៅ»។
អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) លោក ហង្ស ពុទ្ធា មានប្រសាសន៍ជុំវិញរឿងបណ្ដេញព្រះសង្ឃចេញពីវត្តនេះ លោកមិនបានទទួលអង្គហេតុគ្រប់ជ្រុងជ្រោយនោះទេ។ តែយ៉ាងណា លោកថា បើសិនជាព្រះអង្គត្រូវបានព្រះចៅអធិការ និងគណៈកម្មការវត្ត បណ្តេញចេញពីវត្តដោយសារគាំទ្រគណបក្សនយោបាយមែននោះ ព្រះអង្គមានសិទ្ធិប្ដឹងទៅគណៈកម្មការរៀបចំការបោះឆ្នោតថ្នាក់ខេត្ត ដើម្បីជួយអន្តរាគមន៍ដោះស្រាយ ពីព្រោះនៅក្នុងច្បាប់ ព្រះសង្ឃមានសិទ្ធិគាំទ្រគណបក្សនយោបាយណាមួយដែលព្រះសង្ឃពេញចិត្តបាន។
ប៉ុន្តែបើសិនជាព្រះអង្គមានទំនាស់ដោយសាររឿងបុគ្គលនិងបុគ្គល លោកថា ព្រះអង្គគួរប្តឹងទៅសមត្ថកិច្ចជួយដោះស្រាយបញ្ហាទាំងនោះវិញ។
នាយកប្រតិបត្តិអង្គការអភិវឌ្ឍន៍ផ្នត់គំនិត លោកបណ្ឌិត សេក សុជាតិ មានប្រសាសន៍ថា នៅក្នុងច្បាប់ជាតិបានចែងថា ព្រះសង្ឃក៏មានសិទ្ធិចូលរួមគាំទ្រគណបក្សនយោបាយណាមួយដែលព្រះអង្គពេញចិត្តបាន។
យ៉ាងណា បើមានការចោទប្រកាន់ណាមួយ លោកថា ព្រះចៅអធិការ និងគណៈកម្មការវត្ត គួរតែនិមន្តព្រះអង្គ ហេង គីមឡាយ ទៅអប់រំណែនាំ ជាជាងបណ្តេញព្រះអង្គចេញពីវត្តបែបនេះ ដែលអាចធ្វើឱ្យប៉ះពាល់ដល់តម្លៃរបស់ព្រះសង្ឃផងដែរ។
លោកផ្តល់ជាអនុសាសន៍ថា៖ «ខ្ញុំមិនគាំទ្រការបណ្តេញព្រះសង្ឃចេញពីវត្តទេ គួរតែធ្វើការអប់រំព្រះអង្គ ឬព្រះសង្ឃទាំងអស់ ឱ្យយល់អំពីនយោបាយ ឱ្យគាត់យល់អំពីច្បាប់ ជាជាងបណ្តេញឬក៏ដកសិទ្ធិរបស់គាត់ជាសង្ឃចេញពីវត្ត»៕
