ថ្នាក់ដឹកនាំគណបក្សភ្លើងទៀន ប្រកាសចង់ជួបជជែកជាមួយគណបក្សប្រជាជនកម្ពុជា ក្រោយពីដឹងពីលទ្ធផលបឋមនៃការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់អាណត្តិទី៥នេះ។
ថ្លែងក្នុងសន្និសីទកាសែតនាថ្ងៃចន្ទនេះ អនុប្រធានគណបក្សភ្លើងទៀន លោក សុន ឆ័យ បានលើកឡើងថា គណបក្សភ្លើងទៀនទទួលយកលទ្ធផលបោះឆ្នោត ទោះបីដឹងថាការបោះឆ្នោតក្រុមប្រឹក្សាឃុំ-សង្កាត់អាណត្តិទី៥នេះ ប្រព្រឹត្តទៅមិនសេរី ត្រឹមត្រូវ និងយុត្តិធម៌ក៏ដោយ ព្រមទាំងមិនមែនជាលទ្ធផលដែលឆ្លុះបញ្ចាំងពីឆន្ទៈពលរដ្ឋពិតប្រាកដយ៉ាងណាក្តី។
មួយវិញទៀត លោកថា គណបក្សភ្លើងទៀនគ្មានផែនការដើម្បីធ្វើបាតុកម្មប្រឆាំងនឹងលទ្ធផលបោះឆ្នោតដូចមតិមួយចំនួនបានលើកឡើងនោះទេ ប៉ុន្តែបក្សក្រៅរដ្ឋាភិបាលមួយនេះនឹងដាក់បណ្ដឹងតវ៉ាទៅគណៈកម្មាធិការជាតិរៀបចំការបោះឆ្នោត ពាក់ព័ន្ធនឹងភាពមិនប្រក្រតីមួយចំនួនអំឡុងពេលបោះឆ្នោត និងការរាប់សន្លឹកឆ្នោត។
ករណីនេះ លោក សុន ឆ័យ បញ្ជាក់ថា មូលហេតុដែលគណបក្សភ្លើងទៀនចង់ជួបចរចាជាមួយគណបក្សកាន់អំណាចនោះ ដើម្បីជំរុញឱ្យមានដំណោះស្រាយបញ្ហាប្រទេសជាតិ និងកែទម្រង់សមាសភាពស្ថាប័នរៀបចំការបោះឆ្នោត តាំងពីថ្នាក់មូលដ្ឋានរហូតដល់ថ្នាក់ជាតិ ដើម្បីជំរុញឱ្យមានភាពឯករាជ្យ ខណៈបច្ចុប្បន្ន លោកមើលឃើញថា គ.ជ.ប បានជួយគណបក្សប្រជាជនកម្ពុជាច្រើននៅអំឡុងពេលបោះឆ្នោត។
លើសពីនេះ បញ្ហាសម្រាប់យកទៅជជែកជាមួយបក្សកាន់អំណាចទៀតនោះក៏មានដែរ ដូចជា ការដោះស្រាយបញ្ហាជាតិដែលនៅសេសសល់ ការបញ្ឈប់សកម្មភាពធ្វើទុក្ខបុកម្នេញទៅលើមន្ត្រីគណបក្សមួយនេះជាដើម ដើម្បីបញ្ចៀសពីការដកប្រព័ន្ធអនុគ្រោះពន្ធ EBA របស់អឺរ៉ុប ដែលនៅសល់៨០ភាគរយទៀតផងដែរ។
លោកថា៖ «ដូច្នេះ ខ្ញុំថា បើនេះមិនមែនជាមូលដ្ឋាន ដើម្បីចរចាទេ មិនដឹងមានអ្វីទៀត? ប៉ុន្តែខ្ញុំយល់ថា គណបក្សកាន់អំណាចគាត់យល់ច្បាស់ណាស់អំពីហេតុផលដែលយើងគួរជជែកគ្នា ពីព្រោះនឹងបានប្រយោជន៍ច្រើន បើយើងធ្វើការជាមួយគ្នាទៅឆ្នាំក្រោយទៀតទៅ។ អាបញ្ហាដាក់ទោសទណ្ឌអី គួរតែបញ្ចប់ទៅ ព្រោះយើងរងគ្រោះពីរយ៉ាង ដោយសារយើងមកចូលរួមការបោះឆ្នោតហ្នឹង មានគេចោទថា មកនេះ ដើម្បីធ្វើឱ្យគណបក្សកាន់អំណាចហ៊ឺហារតែម្ដង គណបក្សប្រជាជនបានភាពស្របច្បាប់ ឬក៏មកបំពេញភាពស្របច្បាប់គណបក្សកាន់អំណាច។ យើងរងគ្រោះអាហ្នឹងក៏មិនតិចទេ ការចោទប្រកាន់ពីមនុស្សមួយចំនួនហ្នឹង»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា គណបក្សកាន់អំណាចមិនចរចាជាមួយបក្សភ្លើងទៀននោះទេ ដោយសារនេះជាការបោះឆ្នោតដែលអាស្រ័យលើឆន្ទៈរបស់ប្រជាពលរដ្ឋ ហើយគណៈកម្មាធិការជាតិរៀបចំការបោះឆ្នោតសម្រេចយ៉ាងណា ត្រូវទទួលយក ខណៈបច្ចុប្បន្ន គ.ជ.ប កំពុងបូកសរុបលទ្ធផល និងដោះស្រាយបណ្ដឹងតវ៉ាតាមនីតិវិធី។
លោកថា៖ «អត់មានអីដែលត្រូវចរចាទេ ពីព្រោះយើងធ្វើការបោះឆ្នោតរួចហើយ។ អត់ទេ! ចង់សាកមើលទៅៗ អត់មានដូរមិនដូរ អត់មានចុះចេញទៅអើយ អត់មាន! អត់មានជាលើកទី២ទេ»។
សាស្ត្រាចារ្យវិទ្យាសាស្ត្រនយោបាយ លោក ឯម សុវណ្ណរ៉ា មើលឃើញថា គណបក្សភ្លើងទៀនមិនមានកម្លាំងនិងតម្លៃនយោបាយគ្រប់គ្រាន់ ដើម្បីចរចាជាមួយគណបក្សប្រជាជនកម្ពុជានោះទេ ដោយសារការបោះឆ្នោតឃុំ-សង្កាត់ទទួលអាសនៈតិចតួចពេក។
លោកថា៖ «ខ្ញុំថាគណបក្សកាន់អំណាច គេមិនយល់ព្រមទេ ទី១ តម្លៃនយោបាយ និងតម្លៃនយោបាយគណបក្សភ្លើងទៀននៅមានកម្រិតទាបណាស់។ ទី២ សហគមន៍អន្តរជាតិ មិនទាន់មានសម្ពាធ ឬស្ថានភាពណាមួយ គាបសង្កត់មកលើរដ្ឋាភិបាលកម្ពុជានៅឡើយទេ។ បើសិនជាមានស្ថានភាពតានតឹង ហើយកម្លាំងមានការឡើងតម្លៃប្រហាក់ប្រហែលដូចគណបក្សសង្គ្រោះជាតិពីអតីតកាល ខ្ញុំគិតថាប្រហែលជាអាចជជែកគ្នា ឬមានតម្លៃមួយសម្រាប់ចរចាជាមួយបក្សកាន់អំណាច»។
យ៉ាណាក៏ដោយ លោក សុន ឆ័យ គណបក្សភ្លើងទៀនមិនទាន់កំណត់ពេលវេលាជាក់លាក់ ដើម្បីជួបជជែកគ្នាជាមួយគណបក្សកាន់អំណាចនៅឡើយទេ ប៉ុន្តែថ្នាក់ដឹកនាំបក្សនេះថានឹងជួបក្រោយពេលបញ្ចប់ការងារបោះឆ្នោតឃុំ-សង្កាត់រួចរាល់។
សហភាពអឺរ៉ុបបានសម្រេចដកប្រព័ន្ធអនុគ្រោះពន្ធ EBA ចំនួន ២០% ពីកម្ពុជា ជាផ្លូវការ កាលពីថ្ងៃ១៣ ខែសីហា ឆ្នាំ២០២០ ក្រោយពីរដ្ឋាភិបាល លោក ហ៊ុន សែន បានបរាជ័យក្នុងការស្ដារលទ្ធិប្រជាធិបតេយ្យ និងការគោរពសិទ្ធិមនុស្សឡើងវិញ។ ថ្មីៗនេះទៀតសោត សមាជិកសភាអឺរ៉ុបច្រើនលើសលប់បានបោះឆ្នោតអនុម័តញត្តិរួមមួយ ស្ដីពីដំណោះស្រាយបញ្ហាលទ្ធិប្រជាធិបតេយ្យ និងសិទ្ធិមនុស្សនៅកម្ពុជា។
សភាអឺរ៉ុបក៏បានជំរុញឱ្យស្ថាប័នអឺរ៉ុបអនុម័តវិធានការនានាប្រឆាំងនឹងក្រុមមេដឹកនាំកម្ពុជាកាន់តែធ្ងន់ធ្ងរបន្ថែមទៀត ក្នុងនោះរួមទាំងការព្យួរទាំងស្រុងនូវប្រព័ន្ធអនុគ្រោះពន្ធ EBA ផងដែរ ប្រសិនបើពួកគេរកឃើញថា ការបោះឆ្នោតពេលនេះមានភាពអយុត្តិធម៌ មិនសេរី និងមិនត្រឹមត្រូវនោះ៕
