មន្ត្រីជាន់ខ្ពស់ក្រសួងសុខាភិបាលបានថ្លែងថា សុវត្ថិភាពចំណីអាហារជាកត្តាសំខាន់មួយនៅក្នុងចំណោមកត្តាផ្សេងៗទៀត ដោយសារការរស់នៅរបស់មនុស្សលើពិភពលោកគឺ ពឹងផ្អែកលើការបរិភោគចំណីអាហារឱ្យបានត្រឹមត្រូវសម្រាប់ការលូតលាស់ និងថែបំប៉នសុខភាព។
ការណ៍ថ្លែងនេះ ធ្វើឡើងដើម្បីអបអរសាទរទិវាពិភពលោកស្តីពីសុវត្ថិភាពចំណីអាហារក្រោមប្រធានបទ «ចំណីអាហារមានសុវត្ថិភាព សុខភាពកាន់តែល្អប្រសើរ (Safer food, Better health)» នាថ្ងៃទី៧ ខែមិថុនា ឆ្នាំ២០២២។
នៅក្នុងសារសំឡេងណែនាំរបស់រដ្ឋលេខាធិការ និងអ្នកនាំពាក្យក្រសួងសុខាភិបាល លោកស្រីវេជ្ជបណ្ឌិត ឱ វណ្ណឌីន មានប្រសាសន៍ថា ប្រសិនបើការបរិភោគចំណីអាហារ មិនបានអនុវត្តនូវអនាម័យ និងការរក្សាសុវត្ថិភាពចំណីអាហារ អាចនឹងផ្តល់នូវការប៉ះពាល់ដល់សុខភាព និងអាចឈានទៅដល់ការបាត់បង់អាយុជីវិតផងដែរ។
លោកស្រី មានប្រសាសន៍ថា៖ «ជាឧទាហរណ៍ ការពុលនូវចំណីអាហារ ក៏ដូចជា ការពុលស្រាដែលកន្លងមកនេះ យើងតែងតែមានការជួបប្រទះជាហូរហែក្នុងឆ្នាំកន្លងៗមក ហើយនេះ ក៏មានការបង្កឱ្យមានការស្លាប់បាត់បង់ជីវិតនូវបុគ្គលមួយចំនួនដែលការបរិភោគនូវចំណីអាហារនេះ មិនបានយកចិត្តទុកដាក់ឱ្យបានត្រឹមត្រូវ អនុវត្តទៅតាមការណែនាំក៏ដូចជា ការរក្សាបាននូវសុវត្ថិភាពអនាម័យចំណីអាហារល្អរបស់យើងនេះ»។
លោកស្រី បញ្ជាក់ទៀតថា ការរក្សាឱ្យមានចំណីអាហារសម្រាប់ការបរិភោគឱ្យបានគ្រប់គ្រាន់ ក៏ជាចំណុចដែលត្រូវយកចិត្តទុកដាក់។ លើសពីនេះ ការដាំដុះបែបធម្មជាតិ និងប្រើប្រាស់ជីធម្មជាតិ គឺជារឿងចាំបាច់ដើម្បីជៀសវាងការបង្កហានិភ័យដល់សុខភាព។
លោកស្រី ក៏បានអំពាវនាវដល់បងប្អូនប្រជាពលរដ្ឋ ឱ្យយកចិត្តទុកដាក់ក្នុងការបរិភោគចំណីអាហារ ចម្អិនអាហារឱ្យបានឆ្អិនល្អ អនុវត្តឱ្យបានល្អត្រឹមត្រូវ រក្សាគុណភាពអនាម័យចំណីអាហារឱ្យបានល្អ ជៀសវាងអាហារដែលហួសសុពលភាព អាហារទុកយូរនិងអាហារដែលមិនមានសុវត្ថិភាពល្អដែលធ្វើឱ្យប៉ះពាល់ដល់សុខភាព។
បន្ថែមពីនេះ ត្រូវរក្សាអនាម័យជាប្រចាំ ដូចជា លាងដៃមុននឹងចាប់កាន់ ឬបរិភោគចំណីអាហារ ព្រមទាំងលាងសម្អាតវត្ថុធាតុដើម ដូចជា បន្លែ ត្រីសាច់ និងសម្ភារចម្អិនឱ្យបានស្អាតជាប់ជាប្រចាំ។
កាលពីថ្ងៃទី១ ខែមេសា ឆ្នាំ២០២២ គណៈរដ្ឋមន្រ្តី អនុម័តសេចក្ដីព្រាងច្បាប់ស្តីពីសុវត្ថិភាពចំណីអាហារនេះ ដោយក្នុងសេចក្តីព្រាងច្បាប់នោះបានបញ្ញត្តិពីគោលបំណងបង្កើតប្រព័ន្ធសុវត្ថិភាពម្ហូបអាហារសម្រាប់ការពារសុខភាពមនុស្ស និងអ្នកប្រើប្រាស់ តាមរយៈការទប់ស្កាត់ ការគ្រប់គ្រង និងលុបបំបាត់ការបំពុល និងគ្រោះថ្នាក់ដែលបណ្ដាលមកពីម្ហូបអាហារផងដែរ៕
