តំណាងគណបក្សភ្លើងទៀននៅខេត្តបន្ទាយមានជ័យ បានដាក់ពាក្យបណ្ដឹងទៅគណៈកម្មការឃុំសង្កាត់រៀបចំការបោះឆ្នោត (គឃ.សប) ឱ្យជួយដោះស្រាយ ជុំវិញភាពមិនប្រក្រតីនាអំឡុងពេលបោះឆ្នោតជ្រើសរើសក្រុមប្រឹក្សាឃុំ-សង្កាត់ ប៉ុន្តែប្រធាន (គឃ.សប) ច្រានចោលក្រោមហេតុផលថា ក្នុងពាក្យបណ្ដឹងនោះមិនមានអត្ថន័យគ្រប់គ្រាន់ និងមិនដឹងសំដៅបុគ្គលណាម្នាក់នោះទេ។
អ្នកស្រី ចៅ រតនៈ ដែលឈរឈ្មោះជាបេក្ខជនក្រុមប្រឹក្សាឃុំ-សង្កាត់របស់គណបក្សភ្លើងទៀន នៅសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មានប្រសាសន៍នៅថ្ងៃទី៨ ខែមិថុនានេះថា កាលពីថ្ងៃម្សិលមិញ អ្នកស្រីបានដាក់ពាក្យបណ្ដឹងទៅប្រធាន (គឃ.សប) ឱ្យជួយរកដំណោះស្រាយ ពាក់ព័ន្ធនឹងសំណុំរឿង «ភាពមិនប្រក្រតីនៃដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់» ដែលប្រព្រឹត្តទៅនៅថ្ងៃទី០៥ ខែមិថុនា ឆ្នាំ២០២២នេះ។
ប៉ុន្តែអ្នកស្រីថា ប្រធាន (គឃ.សប) បានច្រានចោលបណ្តឹងរបស់មន្ត្រីបក្សភ្លើងទៀន ដោយលើកហេតុផលថា កម្មវត្ថុនៃបណ្ដឹងពាក់ព័ន្ធនឹងភាពមិនប្រក្រតីនៃដំណើរការបោះឆ្នោត មិនមានអត្ថន័យគ្រប់គ្រាន់ និងមិនដឹងសំដៅបុគ្គលណាម្នាក់ទេ។
អ្នកស្រីមានប្រសាសន៍ថា៖ «សូម្បីតែចៅសង្កាត់ប៉ោយប៉ែត ខ្ញុំមាន! គាត់ដើរគ្រប់មណ្ឌល ខ្ញុំមាន! ព្រោះខ្ញុំធ្វើការ ក្រុមការងារយើង ខ្ញុំតែងតែមានភស្តុតាងនិងឯកសារ ដើម្បីយើងធ្វើពាក្យបណ្ដឹង ព្រោះអីយើងធ្វើពាក្យបណ្ដឹង បើគាត់ទទួល ហើយទាមទារភស្តុតាង ទើបយើងបង្ហាញ ប៉ុន្តែដោយសារតែគាត់ច្រានចោលមិនទទួលពាក្យបណ្ដឹង»។
តំណាងគណបក្សភ្លើងទៀនរូបនោះបញ្ជាក់ថា ក្រុមការងាររបស់អ្នកស្រីកំពុងបន្តដាក់ពាក្យបណ្តឹងតាមដំណាក់កាលឬតាមនីតិវិធីចាប់ពីថ្នាក់ក្រោមជាតិ ដល់ថ្នាក់ជាតិ ដើម្បីជំរុញឱ្យមានការធ្វើកំណែទម្រង់ប្រព័ន្ធបោះឆ្នោតនៅកម្ពុជាឱ្យមានតម្លាភាព សេរី និងយុត្តិធម៌។
បើតាមអ្នកស្រី ចៅ រតនៈ លទ្ធផលបណ្ដោះអាសន្នបង្ហាញថា គណបក្សភ្លើងទៀននៅសង្កាត់ប៉ោយប៉ែតទទួលបាន៣កៅអី ក្នុងចំណោម១១កៅអីនៃក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២នេះ។
ពាក្យបណ្តឹងរបស់តំណាងគណបក្សភ្លើងទៀន អ្នកស្រី ចៅ រតនៈ ចុះថ្ងៃទី០៧ ខែមិថុនា បានលើកឡើងថា ពេលដំណើរការបោះឆ្នោត មានបេក្ខជនជាមេឃុំ មេភូមិ អនុភូមិ ប្រជាការពារ ចូលមណ្ឌលបោះឆ្នោតទាំង២៩ ដើម្បីបំភិតបំភ័យប្រជាពលរដ្ឋឱ្យបោះឆ្នោតជូនគណបក្សប្រជាជនកម្ពុជា និងមានភាពមិនប្រក្រតីមួយចំនួននៅពេលរាប់សន្លឹកឆ្នោត ដូចជា មានបិទរបងមណ្ឌល បិទការិយាល័យ និងមិនអនុញ្ញាតឱ្យតំណាងគណបក្សនយោបាយ អ្នកអង្កេតការណ៍ និងប្រជាពលរដ្ឋចូលឃ្លាំមើលពេលរាប់សន្លឹកឆ្នោត ជាដើម។
ប្រធានគណៈកម្មការឃុំសង្កាត់រៀបចំការបោះឆ្នោត (គឃ.សប) ក្រុងប៉ោយប៉ែត អ្នកស្រី គឹម ហៀក មានប្រសាសន៍ថា ដើមចមដែលអ្នកស្រីច្រានចោល មិនទទួលពាក្យបណ្តឹងរបស់តំណាងគណបក្សភ្លើងទៀន ដោយសារតែកម្មវត្ថុដែលដើមបណ្តឹងដាក់មកទូលំទូលាយពេក និងមិនបានកំណត់ឈ្មោះអត្តសញ្ញាណបុគ្គល ឬឈ្មោះមេភូមិ អនុភូមិ មេឃុំ ឱ្យបានច្បាស់លាស់។
ករណីនេះ អ្នកស្រីស្នើទៅដើមបណ្តឹងបន្ថែមភស្តុតាងឱ្យបានគ្រប់គ្រាន់ និងមានឈ្មោះបុគ្គលច្បាស់លាស់ ដើម្បីងាយស្រួលក្នុងការរកដំណោះស្រាយជូនតាមនីតិវិធីច្បាប់។
អ្នកស្រីថា៖ «គាត់មក ហើយគាត់អត់មានភស្តុតាងទេ ក្នុងការដាក់បណ្ដឹងហ្នឹង។ មួយទៀត ខ្ញុំចង់ឱ្យមក ខ្ញុំសាកសួរ គាត់ដាក់បណ្តឹងប្លុងចោល ហើយគាត់ទៅបាត់ ឱ្យខ្ញុំបកស្រាយយ៉ាងម៉េច? ហើយគាត់ទាមទារឱ្យខ្ញុំទទួលយកភ្លាម ហើយគាត់ទាមទារតែថតរូបទេ យើងគិតមើលការដាក់បណ្តឹងមួយៗ បើយើងមិនទាន់ធ្វើការសាកសួរមូលហេតុផង ឱ្យគាត់ថតរូបម៉េច? ខ្ញុំមិនអនុញ្ញាតទេ។ អ៊ីចឹងបណ្តឹង មិនមែនថាខ្ញុំបដិសេធមិនទទួលទេ ប៉ុន្តែទទួលឱ្យមានលក្ខខណ្ឌស្របគ្នា ហើយមកទាមទារហត្ថលេខា ខ្ញុំម៉េចព្រមបើអត់ច្បាស់លាស់ផង»។
នាយកប្រតិបត្តិអង្គការនិកហ្វិច លោក សំ គន្ធាមី ផ្តល់ជាអនុសាសន៍ថា ដើម្បីកុំឱ្យគូភាគីជះទឹកដាក់គ្នា ដើមបណ្តឹងត្រូវបង្ហាញភស្តុតាង និងកំណត់អត្តសញ្ញាណលើឈ្មោះបុគ្គលឱ្យបានច្បាស់លាស់ ទៅប្រធានគណៈកម្មការឃុំសង្កាត់រៀបចំការបោះឆ្នោត (គឃ.សប)។ លោកថា បើសិនជាផ្តល់ភស្តុតាងច្បាស់លាស់ ហើយមន្ត្រី (គឃ.សប) នៅតែច្រានចោលបណ្តឹង និងទុកចោលមិនចាត់ការ នោះភាគីម្ចាស់បណ្តឹងអាចប្តឹងបន្តទៅថ្នាក់លើតាមនីតិវិធីច្បាប់បន្តទៀត។
លោកផ្តល់ជាអនុសាសន៍ថា៖ «យើងបំពេញឱ្យគេត្រូវទៅ បើម៉េចៗយើងស្រួលទេ បើគេបដិសេធ ឥលូវគេបដិសេធថាអត់មានឈ្មោះ អត់ស្គាល់អត្តសញ្ញាណ មានតែរូប យើងរកបំពេញឱ្យគេទៅ។ បើគេអត់ដោះស្រាយ យើងប្តឹងឡើងទៅលើទៀត»។
ការបោះឆ្នោតជ្រើសរើសក្រុមប្រឹក្សាឃុំ/សង្កាត់ អាណត្តិទី៥នេះ មានគណបក្សនយោបាយចំនួន១៧បានចូលរួមប្រកួតប្រជែង ដោយបានដាក់បេក្ខជនក្រុមប្រឹក្សាឃុំ/សង្កាត់សរុប ៨៦ ០៩២នាក់ (ស្ត្រី ២៧ ៨១៣នាក់) ខណៈក្រុមប្រឹក្សាឃុំ/សង្កាត់ដែលនឹងត្រូវជ្រើសរើសមកបម្រើការងារក្នុងឃុំ/សង្កាត់ទាំង១ ៦៥២ គឺមានចំនួន១១ ៦២២រូប។
បើតាមអ្នកនាំពាក្យ គ.ជ.ប លោក ហង្ស ពុទ្ធា គិតចាប់ពីថ្ងៃទី៥ ខែមិថុនា ដែលជាថ្ងៃបោះឆ្នោត រហូតមកដល់ថ្ងៃទី៧ ខែមិថុនា ស្ថាប័នមួយនេះបានទទួលពាក្យបណ្តឹងពីគណបក្សនយោបាយដែលដាក់នៅគណៈកម្មការរៀបចំការបោះឆ្នោតឃុំ-សង្កាត់ប្រមាណជា១០បណ្តឹង ទាក់ទងនឹងរឿងសុំឱ្យផ្តន្ទាទោសអាជ្ញាធរដែលទៅឈរនៅក្បែរការិយាល័យបោះឆ្នោត និងបណ្តឹងមិនទទួលស្គាល់លទ្ធផលនៃការរាប់សន្លឹកឆ្នោត ដោយសារតែការបិទទ្វារ-បង្អួចជាដើម។
លោកបញ្ជាក់ថា គ.ជ.ប នឹងពិនិត្យលើពាក្យបណ្តឹងទាំងនោះ ហើយបើមានបណ្តឹងបន្ថែម គ.ជ.ប នឹងយកមកពិនិត្យ ដើម្បីសិក្សាពីអង្គហេតុ និងអង្គច្បាប់ មុននឹងបញ្ជូនទៅកាត់សេចក្តីតាមនីតិវិធីច្បាប់៕
