គណៈកម្មាធិការជាតិរៀបចំការបោះឆ្នោត (គ.ជ.ប) បានឱ្យដឹងថា គិតចាប់ពីមុនបោះឆ្នោត១ថ្ងៃ រហូតដល់ថ្ងៃទី៩ ខែមិថុនានេះ ស្ថាប័នមួយនេះទទួលបានពាក្យបណ្តឹងសរុបទូទាំងប្រទេសចំនួន «៨៥បណ្ដឹង» ពីគណបក្សចំនួន៣ ពាក់ព័ន្ធនឹងភាពមិនប្រក្រតីនៃការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិនេះ។
អ្នកនាំពាក្យ គ.ជ.ប លោក ហង្ស ពុទ្ធា មានប្រសាសន៍ថា គិតចាប់ពីថ្ងៃទី៤ ដល់ថ្ងៃទី៩ ខែមិថុនា ឆ្នាំ២០២២នេះ គ.ជ.ប បានទទួលបណ្ដឹងពីគណបក្សនយោបាយចំនួន ៨៥បណ្ដឹង ពីគណបក្សប្រជាជនកម្ពុជា គណបក្សភ្លើងទៀន និងគណបក្សប្រជាធិបតេយ្យមូលដ្ឋាន ដែលបណ្តឹងទាំងនោះ ពាក់ព័ន្ធនឹងការស្នើឱ្យផ្ដន្ទាទោសមន្ត្រីអាជ្ញាធរដែលមិនបានបំពេញតួនាទីដោយឈរនៅក្បែរការិយាល័យបោះឆ្នោត ការបិទទ្វារបង្អួចការិយាល័យពេលរាល់សន្លឹកឆ្នោត និងការមិនបិទទម្រង់១១០២នៅទ្វារការិយាល័យបោះឆ្នោត ជាដើម។
ប៉ុន្តែលោកបញ្ជាក់ថា រាល់បណ្តឹងដែលទទួលបាននោះ គ.ជ.ប បានដោះស្រាយចប់សព្វគ្រប់ចំនួន៨បណ្តឹង ខណៈបណ្តឹងដែលនៅសេសសល់ជិត៧០បណ្តឹងទៀត ស្ថាប័នមួយនេះនឹងដោះស្រាយបញ្ចប់យ៉ាងយូរត្រឹមថ្ងៃទី២៥ ខែមិថុនា ខាងមុខនេះ។
លោកមានប្រសាសន៍ថា៖ «បណ្តឹងដែលជំទាស់នឹងលទ្ធផលបណ្ដោះអាសន្នតាមឃុំ-សង្កាត់ គឺមានរយៈពេល៣ថ្ងៃ! ហើយរយៈពេល៣ថ្ងៃហ្នឹង គឺត្រឹមថ្ងៃទី១១ [ខែមិថុនា]។ ដល់ប្តឹងជំទាស់ទៅគណៈកម្មការខេត្តរៀបចំការបោះឆ្នោត ដល់ថ្ងៃទី១៦ […] ជួនកាលខាងខេត្តគាត់សម្រេចហើយ ប៉ុន្តែ [អ្នកប្តឹង] មិនសុខចិត្តទៀត គឺ [គាត់អាច] ប្តឹងតវ៉ាត្រឹមថ្ងៃទី២១ [ខែមិថុនា] ហើយការសម្រេចលើពាក្យបណ្តឹងតវ៉ាដែល គ.ជ.ប ត្រូវសម្រេច គឺត្រូវសម្រេចបញ្ចប់ត្រឹមថ្ងៃទី២៥ ខែមិថុនានេះ»។
អ្នកនាំពាក្យគណបក្សប្រជាធិបតេយ្យមូលដ្ឋាន លោក សាម អ៊ីន មានប្រសាសន៍ថា នៅអំឡុងពេលបោះឆ្នោតនិងរាប់សន្លឹកឆ្នោត គណបក្សនេះបានទទួលព័ត៌មានពាក់ព័ន្ធនឹងភាពមិនប្រក្រតីនៃការបោះឆ្នោតពីក្រុមការងារនៅតាមមណ្ឌលនិងការិយាល័យបោះឆ្នោតជាច្រើនករណី។
លោកបន្តថា ភាពមិនប្រក្រតីទាំងនោះ រួមមាន អាជ្ញាធរមូលដ្ឋានមានវត្តមាន ឈរឃ្លាំមើល និងកត់ឈ្មោះប្រជាពលរដ្ឋនៅទីតាំងការិយាល័យបោះឆ្នោត ដែលករណីនេះ លោកថា ជាការបំភិតបំភ័យឬបង្ខំឱ្យពលរដ្ឋទៅបោះឆ្នោតមិនស្របតាមឆន្ទៈរបស់ពួកគាត់។
ប៉ុន្តែលោកថា ក្រោយពីគណបក្សប្រមូលព័ត៌មានបានគ្រប់ជ្រុងជ្រោយហើយ ក៏សម្រេចដាក់ពាក្យបណ្តឹងទៅគណៈកម្មការឃុំសង្កាត់រៀបចំការបោះឆ្នោត (គឃ.សប) ចំនួន៥បណ្តឹង រួមមាន នៅខេត្តព្រះវិហារ ចំនួន៣បណ្តឹង និងខេត្តរតនគិរី ចំនួន២បណ្តឹង។
ទោះជាយ៉ាងណា លោក សាម អ៊ីន ហាក់មិនមានជំនឿលើមន្ត្រី គ.ជ.ប នៅថ្នាក់មូលដ្ឋាន ក្នុងការដោះស្រាយបណ្តឹងជូនគណបក្សនេះឱ្យមានតម្លាភាពនោះទេ។
លោកថា៖ «យើងមានសង្ឃឹមតិចតួច ដោយសារតែខាងគណៈកម្មការថ្នាក់ឃុំ និថ្នាក់ខេត្ត ហាក់ដូចជាគាត់បង្ហាញពីការលំបាកច្រើនក្នុងការទទួលពាក្យបណ្តឹងពួកយើង។ ហើយភាសាររបស់ពួកគាត់ហាក់ដូចជាបង្ហាញថា ពួកគាត់មាននិន្នាការលម្អៀងទៅខាងគណបក្សកាន់អំណាច ទៅលើអាជ្ញាធរជាដើម។ ប៉ុន្តែទោះបីជាយ៉ាងណាក៏ដោយ យើងដាក់ពាក្យបណ្តឹងដើម្បីបញ្ជាក់ប្រាប់ថា យើងមិនពេញចិត្តទៅនឹងកំហុសឆ្គងនៅក្នុងនីតិវិធីទាំងឡាយ ហើយយើងនឹងទាមទារឱ្យមានការកែតម្រូវទៅថ្ងៃក្រោយ»។
វីអូឌី នៅមិនអាចសុំការអត្ថាធិប្បាយបន្ថែមជុំវិញការដាក់បណ្តឹងទៅស្ថាប័នរៀបចំការបោះឆ្នោតពីអនុប្រធានគណបក្សភ្លើងទៀន លោក សុន ឆ័យ បានទេ នៅថ្ងៃនេះ។
កាលពីថ្ងៃទី០៧ ខែមិថុនា អ្នកស្រី ចៅ រតនៈ ដែលឈរឈ្មោះជាបេក្ខជនក្រុមប្រឹក្សាឃុំ-សង្កាត់របស់គណបក្សភ្លើងទៀន នៅសង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ក៏បានដាក់ពាក្យបណ្ដឹងទៅប្រធាន (គឃ.សប) ឱ្យជួយរកដំណោះស្រាយ ពាក់ព័ន្ធនឹងសំណុំរឿង «ភាពមិនប្រក្រតីនៃដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់» ដែលប្រព្រឹត្តទៅនៅថ្ងៃទី០៥ ខែមិថុនា ឆ្នាំ២០២២នេះដែរ។
បើតាមពាក្យបណ្តឹងនោះ អ្នកស្រីថា ពេលដំណើរការបោះឆ្នោត មានបេក្ខជនជាមេឃុំ មេភូមិ អនុភូមិ ប្រជាការពារ ចូលមណ្ឌលបោះឆ្នោតទាំង២៩ ដើម្បីបំភិតបំភ័យប្រជាពលរដ្ឋឱ្យបោះឆ្នោតជូនគណបក្សប្រជាជនកម្ពុជា និងមានភាពមិនប្រក្រតីមួយចំនួនទៀតនៅពេលរាប់សន្លឹកឆ្នោត ដូចជា ការបិទរបងមណ្ឌល បិទការិយាល័យ និងមិនអនុញ្ញាតឱ្យតំណាងគណបក្សនយោបាយ អ្នកអង្កេតការណ៍ និងប្រជាពលរដ្ឋចូលឃ្លាំមើលពេលរាប់សន្លឹកឆ្នោតជាដើម។
នាយកប្រតិបត្តិអង្គការនិកហ្វិច លោក សំ គន្ធាមី មានប្រសាសន៍ថា បើសិនជាថ្នាក់ដឹកនាំ គ.ជ.ប ជាពិសេសនៅតាមមូលដ្ឋាន មិនដោះស្រាយបញ្ហាភាពមិនប្រក្រតីឱ្យមានតម្លាភាពទេ នោះប្រព័ន្ធបោះឆ្នោតនៅកម្ពុជានៅតែជួបបញ្ហាប្រឈមទៅអាណត្តិខាងមុខផងដែរ។
លោកមានប្រសាសន៍ថា៖ «អាជ្ញាធរភូមិឃុំមកនៅក្នុងបរិវេណការិយាល័យមណ្ឌលបោះឆ្នោតអ៊ីចឹងទៅ គឺប៉ះពាល់ដល់ការបោះឆ្នោត ដំណើរការបោះឆ្នោត ជាការដាក់សម្ពាធ វាអត់មានសេរី… មិនថាអត់មានតម្លាភាពលើកហ្នឹងទេ លើកក្រោយក៏អត់មានតម្លាភាពដដែល បើនៅតែមានអ៊ីចឹងកើតឡើងដដែល»។
ការបោះឆ្នោតជ្រើសរើសក្រុមប្រឹក្សាឃុំ/សង្កាត់ អាណត្តិទី៥នេះ មានគណបក្សនយោបាយចំនួន១៧បានចូលរួមប្រកួតប្រជែង ដោយបានដាក់បេក្ខជនក្រុមប្រឹក្សាឃុំ/សង្កាត់សរុប ៨៦ ០៩២នាក់ (ស្ត្រី ២៧ ៨១៣នាក់) ខណៈក្រុមប្រឹក្សាឃុំ/សង្កាត់ដែលនឹងត្រូវជ្រើសរើសមកបម្រើការងារក្នុងឃុំ/សង្កាត់ទាំង១ ៦៥២ គឺមានចំនួន១១ ៦២២រូប ។
បើតាមប្រធាន គ.ជ.ប លោក ប្រាជ្ញ ចន្ទ ស្ថាប័នមួយនេះគ្រោងនឹងប្រកាសលទ្ធផលបោះឆ្នោតផ្លូវការ នៅថ្ងៃទី២៦ ខែមិថុនា ឆ្នាំ២០២២នេះ៕
