បុរសម្នាក់ដែលត្រូវបានតុលាការកាត់ទោសឱ្យជាប់ពន្ធនាគាររយៈពេល១៨ខែ ដោយសារបានបង្ហោះសារនៅលើហ្វេសប៊ុកពីការពាក់ម៉ាស់ឱ្យសត្វមាន់នៅក្នុងការដ្ឋានរបស់លោកក្នុងអំឡុងពេលនៃការរីករាលដាលនៃជំងឺកូវីដ-១៩ ពេលនេះត្រូវបានដោះលែងឱ្យចេញពីពន្ធនាគារវិញហើយ ក្រោយអនុវត្តទោសចប់សព្វគ្រប់។
លោក នី ណាក់ ដែលជាម្ចាស់កសិដ្ឋានចិញ្ចឹមមាន់ បានឱ្យវីអូឌីដឹងនៅថ្ងៃចន្ទនេះថា លោកត្រូវបានដោះលែងចេញពីពន្ធនាគារកាលពីរសៀលថ្ងៃសុក្រសប្តាហ៍មុន ក្រោយបានជាប់ពន្ធនាគារដោយសារការចោទប្រកាន់ពីបទ «ជេរប្រមាថជាសាធារណៈ និងញុះញង់ឱ្យមានការរើសអើង»។
ក្រោយចេញពីពន្ធនាគារ លោក នី ណាក់ ក៏បានបង្ហាញបំណងចូលរួមក្នុងជីវិតនយោបាយជាមួយគណបក្សភ្លើងទៀន ក្រោយពីគណបក្សប្រឆាំងមួយនេះបានចូលរួមការបោះឆ្នោតជ្រើសក្រុមប្រឹក្សាឃុំសង្កាត់ កាលពីថ្ងៃទី៥ ខែមិថុនា ដោយទទួលបានសមាជិកក្រុមប្រឹក្សាឃុំសង្កាត់ជាង២ ០០០នៅទូទាំងប្រទេស។
លោក នី ណាក់ ដែលពីមុនធ្លាប់ជាអ្នកគាំទ្រគណបក្ស សម រង្ស៊ី និងត្រូវបានប្ដូរឈ្មោះទៅជាគណបក្សភ្លើងទៀន ឱ្យដឹងថា លោកបានជជែកក្រៅផ្លូវការជាមួយថ្នាក់ដឹកនាំគណបក្សភ្លើងទៀន ដើម្បីចូលរួមជាមួយគណបក្សនេះ។ ទោះជាយ៉ាងណា នៅពេលសួរថាតើលោកមានបំណងឈរឈ្មោះជាបេក្ខជនតំណាងរាស្រ្តសម្រាប់ការបោះឆ្នោតជ្រើសតាំងតំណាងរាស្រ្តនៅឆ្នាំ២០២៣ ឬយ៉ាងណានោះ លោក នី ណាក់ ថាលោកមិនទាន់អាចនិយាយបាននៅឡើយទេ។
លោក នី ណាក់ មានប្រសាសន៍ថា៖ «ក្រោយពីគណបក្សសង្រ្គោះជាតិត្រូវបាន [តុលាការ] រំលាយ គណបក្សភ្លើងទៀន គឺជាគណបក្សមួយក្នុងចំណោមគណបក្សដែលទទួលបានការគាំទ្រ។ ហើយខ្ញុំមិនចង់ចូលរួមជាមួយគណបក្សតូចៗផ្សេងទៀតដែលគ្មានសមត្ថភាពប្រកួតប្រជែងជាមួយបក្សនយោបាយដទៃទៀតនោះឡើយ»។
លោក នី ណាក់ ដែលចង់ឃើញឱ្យមានការផ្លាស់ប្តូរនៅក្នុងសង្គមកម្ពុជា តាមរយៈការចូលរួមក្នុងសកម្មភាពនយោបាយជាមួយគណបក្សប្រឆាំង ថាលោកចង់ឃើញសង្គមកម្ពុជាវិលទៅរកការគោរពសិទ្ធិមនុស្សត្រឹមត្រូវ។
លោកបញ្ជាក់បន្ថែមថា៖ «យើងនឹងចូលរួមនិងធ្វើយ៉ាងណា ដើម្បីប្រមូលសំឡេងគាំទ្រ ធ្វើឱ្យគណបក្សរបស់យើងឈ្នះនៅក្នុងការបោះឆ្នោត។ ប្រសិនបើថ្នាក់ដឹកនាំសប្បាយចិត្ត ហើយមើលឃើញគុណសម្បត្តិរបស់ខ្ញុំ និងចាត់ចែងឱ្យខ្ញុំធ្វើការងារណាមួយ ខ្ញុំរីករាយទទួលយកការងារទាំងអស់នោះ»។
ទោះជាយ៉ាងណាក៏ដោយ លោក នី ណាក់ ឱ្យដឹងថា ការងារជាអាទិភាពរបស់លោកនៅពេលនេះ គឺស្ដារអាជីវកម្មផ្នែកកសិកម្មក្នុងផ្នែកផលិតសាច់ក្រក និងទឹកឃ្មុំរបស់លោក ព្រមទាំងជួយសហគមន៍កសិករនៅទូទាំងប្រទេសនូវជំនួយបច្ចេកទេស រួមទាំងការស្វែងរកទីផ្សារ និងចែករំលែកពីវិធីសាស្រ្តធ្វើកសិកម្មថ្មីៗដល់កសិករ ជាដើម។
គួររម្លឹកថា កាលពីខែធ្នូ ឆ្នាំ២០២០ លោក នី ណាក់ បានសរសេរនៅលើទំព័រហ្វេសប៊ុករបស់លោកថា លោកបានរៀបចំឯកសារនិងលិខិតដើម្បីស្នើដាក់កន្លែងចិញ្ចឹមមាន់របស់លោកក្នុងស្ថានភាពប្រកាសអាសន្ន ដោយហេតុថា មេរោគផ្តាសាយបានឆ្លងរាលដាលដល់កសិដ្ឋានចិញ្ចឹមមាន់របស់លោក ហើយលោកសង្ឃឹមថា មាន់របស់លោកអាចពាក់ម៉ាស់ដេកនៅក្នុងទ្រុង មិនចេញទៅក្រៅបើគ្មានភាពចាំបាច់។
ក្រោយការសរសេររបស់លោកនៅពេលនោះ អ្នកនាំពាក្យក្រសួងយុត្តិធម៌ លោក ជិន ម៉ាលីន បានលើកឡើងថា ការបង្ហោះសាររបស់លោក នី ណាក់ មិនមែនជាការបញ្ចេញមតិនោះទេ ប៉ុន្តែធ្វើឡើងក្នុងចេតនាអាក្រក់។
យ៉ាងណា លោក នី ណាក់ បានចាត់ទុកការកាត់ទោសលោកជាប់ពន្ធនាគាររយៈពេល១៨ខែ គឺជាការរំលោភទៅលើសេរីភាពបញ្ចេញមតិរបស់លោក ហើយថា ចំណាត់ការរបស់តុលាការដែលបានធ្វើមកលើរូបលោកមិនបានឈរលើឆន្ទានុសិទ្ធិរបស់ខ្លួននោះឡើយ៕