បេក្ខភាពមេឃុំជាប់ឆ្នោតមកពីគណបក្សភ្លើងទៀន នៅឃុំចំណារលើ ស្រុកស្ទោង ខេត្តកំពង់ធំ ត្រូវបានអាជ្ញាធរចាប់ខ្លួនក្រោមបទចោទប្រកាន់ «ប្លន់» ដែលប្រព្រឹត្តកាលពីឆ្នាំ២០០២។
ក្នុងដីកាចុះថ្ងៃទី២១ ខែមិថុនា ឆ្នាំ២០២២ ចុះហត្ថលេខាដោយចៅក្រមស៊ើបសួរសាលាដំបូងខេត្តកំពង់ធំ លោក ស៊ិន វណ្ណៈ បានបង្គាប់ឱ្យសមត្ថកិច្ចចាប់ខ្លួនលោក ញឹម សារ៉ុម តាមបទចោទប្រកាន់ខាងលើ។ មួយវិញទៀត ប្រធានពន្ធនាគារខេត្តកំពង់ធំ ត្រូវទទួលយកលោក ញឹម សារ៉ុម រហូតដល់បទបញ្ជាថ្មីសម្រេចផ្សេងពីនេះ។
បើតាមដីកាបង្គាប់របស់ចៅក្រមស៊ើបសួរ បានឱ្យដឹងថា តុលាការបានចេញដីកាបង្គាប់ឱ្យឈ្មោះ ញឹម សារ៉ុម ហៅ ឌុប រ៉ាន់ ចូលមកបំភ្លឺ ដោយបានទទួលដីកាត្រឹមត្រូវហើយ ប៉ុន្តែឈ្មោះ ញឹម សារ៉ុម ពុំបានមកឆ្លើយចំពោះមុខចៅក្រមស៊ើបសួរឡើយ។
លោក ញឹម សារ៉ុម ជាបេក្ខភាពមេឃុំជាប់ឆ្នោតរបស់គណបក្សភ្លើងទៀន ដែលទើបបោះឆ្នោតកាលពីថ្ងៃទី៥ ខែមិថុនា ឆ្នាំ២០២២៕
