គណបក្សក្រៅរដ្ឋាភិបាលចំនួន៤ បង្ហាញជំហររួមគ្នា ដើម្បីទាមទារឱ្យមានការកែលម្អប្រព័ន្ធបោះឆ្នោតនិងសិទ្ធិនយោបាយ ក្រោយពីពួកគេឆ្លងកាត់ការបោះឆ្នោតឃុំ-សង្កាត់ថ្មីៗនេះ មិនអាចយកជ័យជម្នះលើបក្សកាន់អំណាចបាន និងស្របពេលដែលការបោះឆ្នោតជាតិ អាណត្តិទី៧ នឹងចូលមកដល់នៅឆ្នាំក្រោយ។
តាមសេចក្តីប្រកាស នៅថ្ងៃសុក្រនេះ គណបក្សភ្លើងទៀន គណបក្សឆន្ទៈខ្មែរ គណបក្សកែទម្រង់កម្ពុជា និងគណបក្សប្រជាធិបតេយ្យមូលដ្ឋាន នឹងធ្វើសន្និសីទសារព័ត៌មានរួមគ្នា នៅថ្ងៃទី១១ ខែកក្កដា ឆ្នាំ២០២២ «ដើម្បីបង្ហាញពីផែនការនៃការតស៊ូមតិលើសំណើកែលម្អប្រព័ន្ធបោះឆ្នោត និងសេរីភាពនយោបាយនៅកម្ពុជា»។
សន្និសីទរួមគ្នាដែលមិនធ្លាប់មាននេះ បានកើតឡើងក្រោយពីគណបក្សទាំងនោះបានអះអាងពីការរកឃើញថាមានភាពមិនប្រក្រតីមួយចំនួន និងមានការគំរាមកំហែងខាងនយោបាយ នៅក្នុងដំណើរការបោះឆ្នោតជ្រើសរើសក្រុមប្រឹក្សាឃុំសង្កាត់ កាលពីខែមិថុនាកន្លងទៅ។
មួយវិញទៀត ការបង្ហាញជំហររួមគ្នារបស់គណបក្សក្រៅរដ្ឋាភិបាលទាំង៤នេះ ក៏ស្របពេលដែលរដ្ឋាភិបាលប្រកាសថា ការបោះឆ្នោតជ្រើសតាំងតំណាងរាស្ត្រ នីតិកាលទី៧ នឹងត្រូវធ្វើឡើងនៅថ្ងៃអាទិត្យ ទី២៣ ខែកក្កដា ឆ្នាំ២០២៣។
លទ្ធផលបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ ដែលបានបិទបញ្ចប់ទៅថ្មីៗនេះ ក្នុងចំណោមគណបក្សនយោបាយចំនួន១៧ដែលបានចូលរួមប្រកួតនោះ គណបក្សប្រជាជនកម្ពុជាទទួលបានសំឡេងឆ្នោតជាង ៧៤ភាគរយ (៧៤,៣២ភាគរយ) គណបក្សភ្លើងទៀន ទទួលបានសំឡេងឆ្នោត ២២,២៥ភាគរយ គណបក្សប្រជាធិបតេយ្យមូលដ្ឋាន ទទួលបានសំឡេងឆ្នោត ០,០៩ភាគរយ និងគណបក្សឆន្ទៈខ្មែរ ទទួលបានសំឡេងឆ្នោត ០,០៧ភាគរយ៕