អនុប្រធានគណបក្សភ្លើងទៀន លោក សុន ឆ័យ នៅព្រឹកថ្ងៃអង្គារនេះ បានចូលទៅបំភ្លឺនៅសាលាដំបូងរាជធានីភ្នំពេញ ពាក់ព័ន្ធនឹងបណ្ដឹងរបស់គណៈកម្មាធិការជាតិរៀបចំការបោះឆ្នោត (គ.ជ.ប) ដែលបានប្ដឹងរូបលោកពីបទ «បរិហារកេរ្តិ៍ជាសាធារណៈ» ក្រោយពីលោក សុន ឆ័យ រិះគន់រឿងភាពមិនប្រក្រតីនៃការបោះឆ្នោត។
កាលពីថ្ងៃទី១៧ ខែមិថុនា ឆ្នាំ២០២២ គ.ជ.ប បានប្ដឹងលោក សុន ឆ័យ ទៅតុលាការពីបទ «បរិហារកេរ្តិ៍ជាសាធារណៈ» និងទាមទារឱ្យអ្នកនយោបាយរូបនេះត្រូវធ្វើលិខិតសុំទោសជាសាធារណៈថែមទៀត។
ស្របពេលដែលលោក សុន ឆ័យ កំពុងចូលបំភ្លឺនៅតុលាការនោះដែរ ប្រជាពលរដ្ឋ សកម្មជន និងបេក្ខជនជាប់ឆ្នោតរបស់គណបក្សភ្លើងទៀន ប្រមាណជិត១០០នាក់ក៏បានទៅឈរនៅមុខសាលាដំបូងរាជធានីភ្នំពេញ ដើម្បីឃ្លាំមើលដំណើរការសាកសួរនេះដែរ។
ប្រជាពលរដ្ឋមកពីខេត្តកណ្ដាល លោក យៀម យឿន មានប្រសាសន៍ថា លោកទៅមុខសាលាដំបូងរាជធានីភ្នំពេញនេះ ក្នុងគោលបំណងទៅលើកទឹកចិត្តលោក សុន ឆ័យ ស្របពេលដែលគាត់កំពុងឆ្លើយបំភ្លឺនៅតុលាការ។
លោកថា៖ «យល់ឃើញថា គេ[គ.ជ.ប] ប្តឹងគាត់[លោកសុន ឆ័យ]ពីរឿងគាត់និយាយថា ការបោះឆ្នោតមិនប្រក្រតីអីផ្សេងៗ ហើយពួកខ្ញុំគិតថា វាមិនដូច្នេះទេ គឺវាមានភាពមិនប្រក្រតីដូចឯកឧត្ដម សុន ឆ័យ មានប្រសាសន៍មែន។ ខ្ញុំគិតថា បើសិនជាប្រទេសយើងមានច្បាប់ត្រឹមត្រូវ យុត្តិធម៌យើងសុក្រឹតល្អ យើងគិតថាគាត់អាចរួចពីសំណាញ់ច្បាប់»។
ក្រៅពីរងបណ្ដឹងរបស់គណៈកម្មាធិការជាតិរៀបចំការបោះឆ្នោត លោក សុន ឆ័យ ក៏បានរងនូវបណ្ដឹងមួយទៀតរបស់គណបក្សប្រជាជនកម្ពុជាផងដែរ។
កាលពីថ្ងៃទី១៤ ខែមិថុនា ឆ្នាំ២០២២ គណបក្សប្រជាជនកម្ពុជា តាមរយៈមេធាវី លោក គី តិច បានដាក់ពាក្យបណ្ដឹងទៅកាន់តុលាការដូចគ្នានេះដែរ ប្រឆាំងនឹងលោក សុន ឆ័យ ក្នុងបណ្តឹងនោះ លោក សាយ ឈុំ អនុប្រធានគណបក្សប្រជាជនកម្ពុជា និងជាប្រធានព្រឹទ្ធសភាផងនោះ បានទាមទារសំណងជំងឺចិត្តពីលោក សុន ឆ័យ ចំនួន១លានដុល្លារអាមេរិក ដោយយោងទៅលើអង្គហេតុប្រហាក់ប្រហែលទៅនឹងបណ្តឹងរបស់ គ.ជ.ប នៅពេលនេះដែរ៕