មេឃុំនៅស្រុកគាស់ក្រឡ នៃខេត្តបាត់ដំបង រងការចោទប្រកាន់ថា បានជ្រើសរើសមនុស្សដែលមិនជាប់ឆ្នោត ឱ្យមកទទួលខុសត្រូវ និងកាន់ការងារក្នុងតួនាទីជាជនបង្គោលសម្រាប់គណៈកម្មាធិការ ទទួលបន្ទុកកិច្ចការនារី និងកុមារ ដែលហៅកាត់ថា «គ. ក. ន. ក» ដែលមិនមានបញត្តិនៅក្នុងច្បាប់ ហើយក៏ផ្ទុយទៅនឹងស្មារតីនៃការប្រកាសរបស់ក្រសួងមហាផ្ទៃថែមទៀតផង។
ជំទប់ទី២ ឃុំគាស់ក្រឡ កូតាមកពីគណបក្សភ្លើងទៀន ប្រចាំស្រុកគាស់ក្រឡ ខេត្តបាត់ដំបង កញ្ញា រឿន ស្រីណយ បានប្រាប់ វីអូឌី នៅថ្ងៃអង្គារនេះថា ប្រធានក្រុមប្រឹក្សាឃុំគាស់ក្រឡ លោក ហុង សុផាត បានព្យាយាមច្បាមយកការងារសម្រាប់បែងចែកឱ្យតែក្រុមការងាររបស់ខ្លួន ហើយថែមទាំងអនុវត្តផ្ទុយពីស្មារតីនៃច្បាប់ថែមទៀតផង។ មិនតែប៉ុណ្ណោះ អ្នកដែលមកកាន់ការងារដែលជាការងារសម្រាប់ជំទប់ទី២អនុវត្តនេះ បែរជាយកមនុស្សពីខាងក្រៅ ដែលមិនបានជាប់ឆ្នោត សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់កន្លងទៅនេះទៅវិញ។
កញ្ញាបន្តថា៖ «ពេលប្រជុំសាមញ្ញកាលពីថ្ងៃប៉ុន្មាននេះទៀត គេដាក់ឈ្មោះម្នាក់ហ្នឹងតែងតាំងមកតែម្ដង ទាំងដែលខ្ញុំអត់បានសមស្រប។ ហើយក្នុងប្រជុំហ្នឹង គេឱ្យអនុភូមិចូលរួម អនុភូមិទាំង៩ មេឃុំ និងសាលាស្រុកអីទាំងអស់គ្នា រួចទៅគេតែងតាំងម្នាក់ហ្នឹង ហើយ[គេ]ថាតើមានមតិណាដែលមិនសមស្របអត់ បើគេតែងតាំងម្នាក់ហ្នឹងជា គ.ក.ន.ក?»
តាមរយៈលិខិតដែលចេញដោយសាលាឃុំគាស់ក្រឡ កាលពីថ្ងៃទី២៩ ខែកក្កដា បង្ហាញថា អ្នកស្រី ខា សិលា ត្រូវបានតែងតាំងជាជនបង្គោល ទទួលបន្ទុកជាសមាជិកគណៈកម្មាធិការកិច្ចការនារី និងកុមារ សម្រាប់អាណត្តិទី៥នេះ។ បើទោះបែបណា សម្រាប់បេក្ខនារី ដែលមកទទួលខុសត្រូវក្នុងតួនាទីនេះ កញ្ញា រឿន ស្រីណយ បញ្ជាក់ថា អ្នកស្រី ខា សិលា មិនបានជាប់ឆ្នោតសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥នេះទេ។ ប៉ុន្តែបែរជាត្រូវបានប្រធានក្រុមប្រឹក្សាឃុំគាស់ក្រឡ កូតាមកពីគណបក្សប្រជាជនកម្ពុជា ជ្រើសរើសមកឱ្យបំពេញភារកិច្ច សម្រាប់ក្របខណ្ឌ គ.ក.ន.ក ឬគណៈកម្មាធិការកិច្ចការនារី និងកុមារ ដែលវាដើរផ្ទុយពីច្បាប់ និងគោលការណ៍ដែលកំណត់ដោយក្រសួងមហាផ្ទៃ។
បដិសេធនឹងការរកឃើញពីកំហុសនេះ មេឃុំគាស់ក្រឡ លោក ហុង សុផាត អះអាងថា ការស្នើតែងតាំងនេះ ក៏មានការយល់ព្រមនិងឯកភាពពីក្រុមប្រឹក្សាឃុំសង្កាត់ដែរ តាមរយៈកិច្ចប្រជុំសាមញ្ញរបស់សាលាឃុំ។ ម៉្យាងវិញទៀត ប្រសិនបើបេក្ខនារីដែលមកទទួលបន្ទុកកិច្ចការនេះ ស្ថិតនៅក្នុងសមាជិកក្រុមប្រឹក្សាឃុំសង្កាត់ ក៏សំឡេងភាគច្រើនដាច់ខាត មិនយល់ព្រមដែរ។ ប៉ុន្តែនេះជាបេក្ខភាពដែលត្រូវបានជ្រើសចេញពីខាងក្រៅ ដែលវាស្របទៅនឹងនីតិវិធី និងគោលការណ៍ច្បាប់ ហើយក៏មិនទាស់ខុសអ្វីនោះដែរ។
លោកបន្តថា៖ «រឿងហ្នឹងយើងមើលនៅក្នុង[ការ]គ្រប់គ្រងរដ្ឋបាលឃុំសង្កាត់ វាអញ្ចេះ! នៅក្នុងហ្នឹងកាលណាជំទប់ទី២ មិនមានភារកិច្ចត្រូវកាន់ គ.ក.ន.ក ទេ។ អ៊ីចឹងឃុំខ្ញុំ វាអត់មានអ្នកកាន់កិច្ចការនារី វាអ៊ីចឹងហ្អា៎។ រឿងនេះ វាគ្រាន់តែជាជនបង្គោលទេ គេហៅថាជាបង្គោលទទួលបន្ទុកកិច្ចហ្នឹង វាអ៊ីចឹងហ្អា៎»។
ប្រកាសរបស់ក្រសួងមហាផ្ទៃ ស្តីពីការរៀបចំ និងការប្រព្រឹត្តទៅ នៃគណៈកម្មាធិការកិច្ចការនារី និងកុមារ ឃុំសង្កាត់ ត្រង់ជំពូកទី២ បញ្ញត្តិថា ត្រូវបង្កើតឱ្យមានគណៈកម្មាធិការមួយនៅរដ្ឋបាលឃុំ-សង្កាត់ នៃអាណត្តិក្រុមប្រឹក្សាឃុំសង្កាត់នីមួយៗ ដែលឱ្យឈ្មោះថា «គណៈកម្មាធិការទទួលបន្ទុកកិច្ចការនារី និងកុមារ ឃុំសង្កាត់ (គ.ក.ន.ក)»។ គណៈកម្មាធិការនេះត្រូវមានសមាសភាព មេឃុំ ឬចៅសង្កាត់ ជាប្រធាន ហើយជំទប់ទី២ ឬចៅសង្កាត់រងទី២ ជាអនុប្រធាន នៃគណៈកម្មាធិការនេះ។ បន្ថែមពីលើនេះ ក្នុងករណីជំទប់ទី២ ឬចៅសង្កាត់រងទី២ ជាស្រ្តី ហើយត្រូវបានតែងតាំងជាអ្នកទទួលបន្ទុកកិច្ចការនារី និងកុមារ និងជាអនុប្រធានគណៈកម្មាធិការ មេឃុំ ឬចៅសង្កាត់ ត្រូវជ្រើសរើសសមាជិកក្រុមប្រឹក្សាឃុំសង្កាត់មួយរូបផ្សេងទៀត ដែលមានសមត្ថភាព និងបទពិសោធន៍លើកិច្ចការសេវាសង្គម ធ្វើជាសមាជិកអចិន្រ្តៃយ៍នៃគណៈកម្មាធិការមួយនេះ។
ចំណែកប្រធានចលនាស្រ្តី នៃគណបក្សភ្លើងទៀននៅទូទាំងប្រទេស អ្នកស្រី វង រុន្នី ឱ្យដឹងថា គណបក្សក្រៅរដ្ឋាភិបាលនឹងបន្តតាមដានពីបញ្ហានេះទៀត មុននឹងចេញប្រតិកម្មចំពោះការអនុវត្តខុសប្រក្រតីណាមួយនៅតាមឃុំសង្កាត់ ដោយមិនចំពោះតែឃុំសង្កាត់នៅស្រុកគាស់ក្រឡមួយនេះទេ។
អ្នកស្រីបន្តថា រូបភាពបែបនេះធ្លាប់កើតឡើងជាញឹកញាប់មកហើយនៅក្នុងអាណត្តិដែលគ្រប់គ្រងដោយគណបក្សប្រជាជនកម្ពុជាតែម្នាក់ឯង។ ប៉ុន្តែសម្រាប់អាណត្តិនេះ អ្នកស្រីមិនចង់ឃើញទម្លាប់មិនល្អ ដោយការរំលោភអំណាចនេះកើតឡើងជាថ្មីទៀតនោះទេ ហើយក៏ចង់ឃើញការអនុវត្តដោយល្អ ដើម្បីជាគំរូសម្រាប់អ្នកនយោបាយបន្តវេននៅថ្ងៃមុខទៀតដែរ។
អ្នកស្រីបន្តថា៖ «ពួកយើងនឹងរិះរកគ្រប់មធ្យោបាយ ដើម្បីពិភាក្សាគ្នា ថាតើយើងត្រូវធ្វើយ៉ាងម៉េច បើដោយសារយើងឃើញជំទប់ទី២យើង គាត់តស៊ូមតិ គេអត់គោរពគាត់អ៊ីចឹងហ្អា។ អ៊ីចឹងពួកយើងក៏នឹងមានគម្រោងថានឹងជួបថ្នាក់ដឹកនាំ ថាយើងត្រូវធ្វើម៉េចដើម្បីជួយពួកគាត់។ តែយើងអត់ទាន់បានពិភាក្សាគ្នាឱ្យស៊ីជម្រៅនៅឡើយទេ ដោយសារយើងចង់តាមដានសិន ក្នុងអំឡុងពេលហ្នឹង»។
បើតាមអ្នកស្រី វង រុន្នី បេក្ខភាពជាស្រ្តីរបស់គណបក្សភ្លើងទៀន ជាប់ឆ្នោតជាសមាជិកក្រុមប្រឹក្សាឃុំសង្កាត់ ជំទប់ទី១ និងជំទប់ទី២ ជិត២០០នាក់(១៨៩) នៅទូទាំងប្រទេស សម្រាប់នីតិកាលទី៥នេះ។ ដោយឡែក បញ្ហាដែលកើតឡើងដោយសារការមិនផ្តល់តួនាទី និងភារកិច្ចទៅតាមច្បាប់កំណត់សម្រាប់ជំទប់ទី២ ដែលជាស្រ្តីនេះ បើគិតជាភាគរយប្រមាណ៨០ភាគរយទៅហើយ ក្នុងក្របខណ្ឌទូទៅទាំងប្រទេស។
លោក កន សាវាង្ស អ្នកសម្របសម្រួលផ្នែកអង្កេត និងតស៊ូមតិជាន់ខ្ពស់ នៃអង្គការខុមហ្រ្វែល យល់ឃើញថា មកដល់ដំណាក់កាលនេះទៅហើយ គ្រប់ភាគីដែលចូលរួមអនុវត្តការងារនៅក្នុងដំបូលនៃសាលាឃុំសង្កាត់តែមួយ គឺគ្មានការបែងចែកដូចនៅក្នុងដំណាក់កាលនៃការប្រកួតប្រជែងដូចមុនទៀតឡើយ។
លោកបន្តថា រដ្ឋបាលឃុំសង្កាត់ គឺជាទីតាំងសម្រាប់មនុស្សគ្រប់គ្នាដែលបំពេញការងារក្រោមដំបូលតែមួយ។ ប៉ុន្តែប្រសិនបើមានការបែងចែកអំណាចមិនស្មើគ្នាបែបនេះ គូភាគីអាចប្រើប្រាស់សិទ្ធិដែលមានបញ្ញត្តិនៅក្នុងច្បាប់ ប្ដឹងជំទាស់បញ្ហានេះបាន។
លោកបន្តថា៖ «អ៊ីចឹងរដ្ឋបាលឃុំសង្កាត់នេះ យើងអាចប្ដឹងទៅក្រសួងមហាផ្ទៃ ដើម្បីពិនិត្យមើលទៅនឹងតួនាទី និងភារកិច្ចដែលទាក់ទងទៅជាមួយការគ្រប់គ្រងរដ្ឋបាលឃុំសង្កាត់ហ្នឹង ថាតើហេតុអីបានជាមិនមានការបែងចែកអំណាចហ្នឹងស្មើភាពគ្នាទៅតាមតួនាទី និងភារកិច្ចដែលមានចែង។អ៊ីចឹងកន្លែងនេះ ត្រូវធ្វើកិច្ចការងារដើម្បីឱ្យមានការផ្ទេរឱ្យបានត្រឹមត្រូវហើយបាទ»។
ច្បាប់ស្តីពីការគ្រប់គ្រងរដ្ឋបាលឃុំសង្កាត់ មាត្រា៤០ ចែងថា ជំទប់ទី១ ឬចៅសង្កាត់រងទី១ ទទួលជួយមេឃុំ-ចៅសង្កាត់ លើកិច្ចការសេដ្ឋកិច្ច និងហិរញ្ញវត្ថុ។ ដោយឡែក ជំទប់ទី២ ឬចៅសង្កាត់រងទី២ ទទួលជួយមេឃុំ ឬចៅសង្កាត់ លើកិច្ចការរដ្ឋបាល សង្គមកិច្ច សេវាសាធារណៈ និងសណ្តាប់ធ្នាប់សាធារណៈ។ មេឃុំ ឬចៅសង្កាត់ អាចប្រគល់ភារកិច្ចបន្ថែមពីលើភារកិច្ច ដែលបានបែងចែកខាងលើនេះ ដល់ជំទប់ ឬចៅសង្កាត់រងរបស់ខ្លួន៕
