មន្ត្រីគណបក្សភ្លើងទៀន ២រូប ត្រូវបានតុលាការកោះហៅឱ្យចូលបំភ្លឺនៅខេត្តរៀងខ្លួន ក្នុងនោះ ម្នាក់នៅខេត្តប៉ៃលិន និងម្នាក់ទៀតនៅខេត្តត្បូងឃ្មុំ ដោយចោទប្រកាន់លើករណី២ដាច់ដោយឡែកពីគ្នា។
ករណីទី១ កើតឡើងតាំងពីខែមីនា ឆ្នាំ២០២១ នៅពេលដែលប្រធានក្រុមការងារខេត្តប៉ៃលិនបច្ចុប្បន្នរបស់គណបក្សភ្លើងទៀន លោក ខឹម មុនីកុសល បានបាត់បង់តំណែងនៅមន្ទីរសុខាភិបាលខេត្ត ដោយសាររិះគន់វិធានការធ្វើចត្តាឡីស័កក្នុងការបង្ការជំងឺកូវីដ-១៩។ ការចោទប្រកាន់ពីបទ «ញុះញង់ឱ្យមានការរើសអើង» បានធ្វើឱ្យលោកត្រូវបានព្យួរឈ្មោះសម្រាប់ការបោះឆ្នោតនាពេលថ្មីៗនេះ ហើយកាលពីថ្ងៃទី១៥ ខែកក្កដា លោកបានទទួលដីកាកោះហៅឱ្យចូលបំភ្លឺពីសំណាក់ចៅក្រមស៊ើបសួរនៅសាលាដំបូងខេត្តប៉ៃលិន។
ករណីទី២ ជំទប់ទី២ ខេត្តត្បូងឃ្មុំ មកពីគណបក្សភ្លើងទៀន អ្នកស្រី សុខ ស្រីនួន ប្រឈមនឹងការចោទប្រកាន់ពីបទ «បរិហារកេរ្តិ៍» ចំពោះការបង្ហោះរូបថតស្រោមសំបុត្រដែលមានស្លាកសញ្ញាគណបក្សប្រជាជនកម្ពុជាតាមប្រព័ន្ធអ៊ីនធឺណិត កាលពីខែឧសភា ដែលមានក្រដាសប្រាក់២០ ០០០រៀលក្នុងស្រោមសំបុត្រនោះ ដោយអ្នកស្រីលើកឡើងថាជាសំណូក។ ដីកាកោះហៅជំទប់ឃុំព្រះធាតុ ស្រុកអូររាំងឪ ឱ្យចូលបំភ្លឺនៅតុលាការខេត្តត្បូងឃ្មុំ ចុះថ្ងៃទី២៩ ខែកក្កដា។
លោក ខឹម មុនីកុសល បានឱ្យដឹងកាលពីថ្ងៃអង្គារម្សិលមិញថា នេះគឺជាដីកាកោះហៅលើកទី៤ បន្ទាប់ពីលោកស្នើសុំពន្យារពេលចូលបំភ្លឺ។ តែយ៉ាងណា លោកនៅតែបដិសេធការចោទនោះ ដោយលើកហេតុផលថាជារឿងនយោបាយ។
លោកថា៖ «វាជាការធ្វើទុក្ខបុកម្នេញ […] ពីព្រោះករណីនេះបានកើតឡើងតាំងពីឆ្នាំ២០២១ […] ហើយនៅពេលដែលយើងក្លាយជាគណបក្សនយោបាយ ពួកគេនៅតែបន្តយាយី ដោយប្រើប្រាស់ដីកាកោះ ដើម្បីរារាំងសកម្មភាពនយោបាយរបស់យើង»។
លោក មុនីកុសល បន្ថែមថា៖ «យើងនៅតែសង្ឃឹមថា តុលាការប្រើអភ័យឯកសិទ្ធិរបស់ខ្លួន ហើយមិនស្ថិតនៅក្រោមឥទ្ធិពលនយោបាយ ក្នុងការដោះស្រាយបញ្ហានេះ និងផ្តល់យុត្តិធម៌ដល់ខ្ញុំ»។
ចំណែកជំទប់ទី២ នៅខេត្តត្បូងឃ្មុំ មកពីគណបក្សភ្លើងទៀន អ្នកស្រី សុខ ស្រីនួន មានប្រសាសន៍ថា អ្នកស្រីបានទទួលដីកាកោះហៅនៅម៉ោងប្រហែល១០ព្រឹក ថ្ងៃអង្គារ ម្សិលមិញ ពីមន្ត្រីនគរបាលក្នុងឃុំដែលអ្នកស្រីរស់នៅ។ អ្នកស្រីយល់ថា ការចោទប្រកាន់នេះជាការចោទប្រកាន់ទៅលើករណីដែលអ្នកស្រីបង្ហោះនៅលើបណ្ដាញអ៊ីនធឺណិត ដោយភ្ជាប់ជាមួយក្រដាសប្រាក់ ២០ ០០០រៀល ដែលក្នុងការបង្ហោះនោះ អ្នកស្រីបាននិយាយថា៖ «២០ ០០០រៀល ឱ្យស្បថជូនទៀត យី! ដាក់តម្លៃឱ្យពុកម៉ែបងប្អូនមួយអាណត្តិ៥ឆ្នាំ ត្រឹមមាន់ស្រែមួយគីឡូ។ ប្ដូរចេញទៅបងប្អូន! ប្ដូរមេឃុំបម្រើបក្ស ដាក់មេឃុំបម្រើរាស្រ្ត គឺមេឃុំចៅសង្កាត់មកពីគណបក្សភ្លើងទៀន»។
អ្នកស្រី ស្រីនួន បានបន្ថែមទៀតថា គណៈកម្មាធិការជាតិរៀបចំការបោះឆ្នោត បានសម្រេចលើករណីនេះរួចហើយកាលពីខែមិថុនា ដោយពិន័យជាប្រាក់ចំនួន៥លានរៀល ឬប្រហែល១ ២៥០ដុល្លារ។ អ្នកស្រីនិយាយថា អ្នកស្រីមិននឹកស្មានថា តុលាការកោះហៅអ្នកស្រីម្តងទៀតចំពោះករណីដដែលនេះសោះ។
អ្នកស្រីបន្ថែមទៀតថា៖ «ខ្ញុំគិតថាករណីនេះចប់ហើយ ហើយខ្ញុំមិនដឹងថានៅមានបណ្ដឹងនៅតុលាការនៅឡើយទេ។ ខ្ញុំគិតថា ករណីនេះជាការគំរាមកំហែង និងមានហេតុផលនយោបាយមកលើនាងខ្ញុំ ក្នុងនាមជាជំទប់ឃុំទី២»។
អ្នកស្រីបន្តទៀតថា អ្នកស្រីនឹងពិគ្រោះជាមួយមេធាវីការពារក្តី លោក សំ សុគង់ មុនថ្ងៃកំណត់ដែលតុលាការហៅទៅសាកសួរ។
លោក មុនីកុសល និងអ្នកស្រី ស្រីនួន ត្រូវបានកោះហៅឱ្យចូលបំភ្លឺនៅតុលាការខេត្តរៀងខ្លួន នៅថ្ងៃទី១៦ ខែសីហា ខាងមុខនេះ៕
បកប្រែនិងសម្រួលដោយលោក លី សេងហន ចេញពីអត្ថបទដើមភាសាអង់គ្លេស៖ Two Candlelight Party Officials Summoned for Court Questioning
