មន្រ្តីសមាជិកក្រុមប្រឹក្សាឃុំមួយចំនួន មកពីគណបក្សភ្លើងទៀននៅខេត្តព្រៃវែង អះអាងថា ប្រធានក្រុមប្រឹក្សាឬ មេឃុំបក្សកាន់អំណាច មិនប្រគល់ការងារឱ្យពួកគេធ្វើតាមតួនាទីរៀងៗខ្លួននោះឡើយ។
លោក ហែន ស៊ីថា ជំទប់ទី២កូតាមកពីគណបក្សភ្លើងទៀន នៅឃុំសំរោង ស្រុកស្វាយអន្ទរ ខេត្តព្រៃវែង ដែលធ្លាប់មានបទពិសោធន៍ជាមន្រ្តីឃុំ៣អាណត្តិជាប់គ្នា លើកឡើងពីការមិនអស់ចិត្ត ដោយមិនអាចធ្វើការបម្រើរាស្រ្តឱ្យស្របតាមឆន្ទៈបាន ដោយសារការរើសអើងផ្នែកនយោបាយ ត្បិតការងាររបស់ពួកគេដែលត្រូវធ្វើ ប្រធានក្រុមប្រឹក្សាមិនបានផ្តល់ឱ្យនោះឡើយ។
លោកនិយាយថា៖ «យើងប្ដេជ្ញាចិត្តបម្រើប្រជាពលរដ្ឋដែលបោះឆ្នោតឱ្យ យើងគិតថាប្រជាពលរដ្ឋដែលបោះឱ្យយើងក៏វាច្រើនណាស់ដែរ[ជាង១ ៦០០នាក់]។ ដល់ពេលមុខតំណែងគេអត់ឱ្យសោះ។ អាហ្នឹងជារឿងមួយអយុត្តិធម៌សម្រាប់អ្នកគាំទ្រខាងខ្ញុំ។
លោក ស៊ីថា បន្ថែមថា កាលពីចុង ខែកក្កដា បន្ទាប់ពីប្រជុំគណៈកម្មការឃុំដើម្បីបែងចែកការងារតាមតួនាទីរៀងៗខ្លួន មេឃុំសំរោងបានបង្វែរការងារជំទប់ទី២ ទៅឱ្យជំទប់ទី១ដែលមកពីគណបក្សប្រជាជនកម្ពុជាទាំងអស់។
លោក ស៊ីថា បញ្ជាក់ថា៖ «ជំទប់ទី២ជួយលើរដ្ឋបាល សន្តិសុខ សណ្ដាប់ធ្នាប់សាធារណៈ តែគេមិនធ្វើចឹង គេដាក់ជំទប់ទី១ មកទាំងអស់»។
មន្រ្តីឃុំសំរោងមកពីបក្សភ្លើងទៀនរូបនេះឱ្យដឹងទៀតថា បច្ចុប្បន្នលោកគ្រាន់តែទៅអង្គុយក្នុងបន្ទប់ក្រុមប្រឹក្សានៅសាលាឃុំ តាំងពីព្រឹករហូតដល់ល្ងាច ហើយក៏ចេញទៅផ្ទះ។ ករណីនេះលោកបានរាយការណ៍ទៅកាន់ប្រធានបក្សភ្លើងទៀនប្រចាំខេត្តព្រៃវែង និងរង់ចាំការណែនាំពីថ្នាក់លើរបស់ខ្លួនថា តើត្រូវធ្វើបែបណាបន្តទៀត?។
លោក និយាយថា៖ «សួរគេ(មេឃុំ)គេថាលើមតិភាគច្រើនបានគឺបាន។ គេចង់បិទពួកប្រឆាំងមិនឱ្យធ្វើអី គេចង់ធ្វើបាន។ ឱ្យមកអង្គុយតែកេះដី មិនឱ្យការងារ»។
មន្រ្តីគណបក្សជំទាស់រូបនេះ បង្ហាញពីកង្វល់អំពីបញ្ហាក្នុងមូលដ្ឋានមួយចំនួន ដូចជាករណីយុវជនជក់គ្រឿងញៀន បទល្មើសនេសាទ និងភាពយឺតយ៉ាវនៃការផ្ដល់សេវាសាធារណៈជូនប្រជាពលរដ្ឋជាដើម។
លោក មុជ សាមាន មេឃុំសំរោង ស្រុកស្វាយអន្ទរ ខេត្តព្រៃវែង បដិសេធជុំវិញការចោទប្រកាន់ថា លោកពុំបានផ្ដល់ការងារឱ្យជំទប់ទី២ ដែលមាននិន្នាការនយោបាយខុសគ្នាទៅតាមតួនាទី។
លោក សាមាន និយាយថា៖ «វាអត់ទាន់មានការងារអ្វីចាំបាច់។ ទាំងអស់គ្នាអត់ទាន់មានការងារ។ និយាយមិនឱ្យធ្វើការម៉េច ប្រជាជនបោះឆ្នោតឱ្យទាំងអស់គ្នា»។
ដោយឡែក ជំទប់ទី២ កូតាគណបក្សភ្លើងទៀន នៅឃុំដំរីពួន ស្រុកស្វាយអន្ទរ លោក អូម លីណា រៀបរាប់ថា រយៈជាងមួយខែបន្ទាប់ពីប្រកាសចូលកាន់មុខតំណែងរៀងខ្លួន មេឃុំពុំដែលប្រើលោកឱ្យធ្វើការងារ ហើយប្រគល់ការងារទៅឱ្យជំទប់ទី១ ដែលមកពីគណបក្សប្រជាជនកម្ពុជាជំនួសវិញ។
លោក លី ណា បញ្ជាក់ថា៖ «ការងារជំទប់ទី២ លទ្ធកម្មដោះស្រាយវិវាទអីគេមិនឱ្យកាន់ទេ។ ការកសាងអីៗគេមិនដែលប្រើទេ»។
ទាក់ទិនបញ្ហានេះអភិបាលស្រុកស្វាយអន្ទរ ខេត្តព្រៃវែង លោក ប៉ិច សុង យល់ឃើញថា សាលាឃុំប្រហែលមិនទាន់មានការងារអ្វីដាក់ឱ្យធ្វើច្រើន ដោយសារតែមន្រ្តីឃុំអាណត្តិថ្មីទើបតែប្រកាសចូលកាន់តំណែង។
លោក ប៉ិច សុង មានប្រសាសន៍ថា៖ «បើមានបញ្ហាគឺមេឃុំគាត់ប្រើហើយ ព្រោះជំទប់ទី១ និង២ជាជំនួយការគាត់ មានការងារអីគាត់អ្នកប្រើ»។
នៅពេលសួរថា បន្ទាប់ពីការបែងចែកការងាររួចជំទប់ទី២ មិនត្រូវបានគេផ្ដល់ការងារឱ្យ លោកអភិបាលស្រុករូបនេះនឹងណែនាំទៅមេឃុំទាំងអស់អំពីបញ្ហានេះ។
លោកបន្តថា ៖ «ចាំប្រាប់មេឃុំកុំភ័យឱ្យតែពូកែធ្វើការងារដើម្បីបម្រើប្រជាពលរដ្ឋ និងប្រទេសជាតិ។ អត់អីទេចាំខ្ញុំជួបមេឃុំ»។
ចំណែកនាយករដ្ឋបាលខេត្តព្រៃវែង លោក ឈៀង សុវណ្ណរ៉ា មានប្រសាសន៍ថា រដ្ឋបាលខេត្តមិនទាន់ទទួលដំណឹងនេះនៅឡើយទេ។
លោក សុវណ្ណរ៉ា និយាយថា៖ «មិនដឹងដែរ។ បើគេនៅមូលដ្ឋាននោះ មិនទាន់មានរបាយការណ៍»។
ទោះបីជាយ៉ាងនេះក្តី លោក ទេស ឃឿន អាយុ៦១ឆ្នាំ ជាពលរដ្ឋម្នាក់រស់នៅភូមិសំរោង ឃុំសំរោង ស្រុកស្វាយអន្ទរ ខេត្តព្រៃវែង និយាយថា លោកចង់ឃើញមន្រ្តីក្នុងឃុំដែលមកពីចម្រុះបក្សនយោបាយទាំងអស់ អាចធ្វើការងាររួមគ្នាដើម្បីបម្រើប្រជាពលរដ្ឋពិតប្រាកដ ចៀសវាងនូវការប្រកាន់បក្ខពួកឬ និន្នាការនយោបាយ។
លោក ឃឿន និយាយថា៖ «ក្នុងនាមខ្ញុំជាប្រជាពលរដ្ឋចង់ឱ្យគេធ្វើការស្រុះស្រួលគ្នា ឱ្យបានក្នុងការបម្រើជាតិអ្នកបោះឆ្នោតឱ្យ ចង់បានតែប៉ុណ្ណឹង។ ធ្វើម៉េចឱ្យបម្រើរាស្រ្ត រាស្រ្តត្រូវការធ្វើអ្វីវាទាន់ចិត្ត»។
នៅដើមខែសីហា ឆ្នាំ២០២២នេះ គណបក្សភ្លើងទៀនប្រចាំខេត្តកំពង់ធំ បានដាក់លិខិតសុំអន្តរាគមន៍ពីអភិបាលខេត្ត ដើម្បីប្រគល់បន្ទប់ធ្វើការ ភារកិច្ចការងារ និងឯកសណ្ឋាន ឱ្យជំទប់ទី១ ជំទប់ទី២ និងសមាជិកក្រុមប្រឹក្សាឃុំ-សង្កាត់មកពីគណបក្សភ្លើងទៀនដែលមានចំនួន៤៤ឃុំ-សង្កាត់ ត្បិតពួកគេថា តាំងប្រកាសសុពលភាពចូលបំពេញការងារមក ប្រធានក្រុមប្រឹក្សាឃុំ-សង្កាត់មិនបានផ្តល់កន្លែង និងការងារឱ្យពួកគេធ្វើឡើយ។
អគ្គលេខាធិការគណបក្សភ្លើងទៀន លោក លី សុធារ៉ាយុទ្ធ មានប្រសាសន៍ថា លោកកំពុងតែប្រមូលព័ត៌មានទាក់ទិននឹងការរើសអើងផ្នែកនយោបាយក្រោមរូបភាពផ្សេងៗគ្នាមកលើមន្រ្តីឃុំបក្សភ្លើងទៀន។
លោក រ៉ាយុទ្ធ បញ្ជាក់ថា៖ «ចាំខ្ញុំមានព័ត៌មានក្នុងដៃសិន តើព័ត៌មានប្រភេទណា ការរំលោភ រំលោភបែបណាខ្លះ រើសអើង រើសអើងបែបណាជាលក្ខណៈទូទៅអត់អាចនិយាយបាន ព្រោះក្នុងដំណាក់កាលប្រមូលព័ត៌មាននៅឡើយ»។
អ្នកនាំពាក្យសមាគមការពារសិទ្ធិមនុស្សអាដហុក លោក សឹង សែនករុណា ជំរុញឱ្យមន្រ្តីឃុំបក្សភ្លៀងទៀន ស្វែងរកអន្តរាគមន៍ពីអាជ្ញាធរថ្នាក់លើជុំវិញបញ្ហាទាំងនេះ។
លោក ករុណា និយាយថា៖ «បើតួនាទីរបស់គាត់មិនត្រូវឱ្យ ខ្ញុំគិតថាជំទប់ទី២[កូតាបក្សភ្លើងទៀន]គួរតែធ្វើរបាយការណ៍ជាលាយលាក់អក្ស ទៅខាងអាជ្ញាធរថ្នាក់លើឬខាងស្រុកខេត្ត ឬសេចក្ដីរាយការណ៍ទៅក្រសួងមហាផ្ទៃ»។
យោងតាមមាត្រា៤០ នៃច្បាប់ស្ដីពីការគ្រប់គ្រងរដ្ឋបាលឃុំ-សង្កាត់ បានឱ្យដឹងថា ជំទប់ទី២ ឬចៅសង្កាត់រងទី២ ទទួលជួយមេឃុំ ចៅសង្កាត់ លើកិច្ចការរដ្ឋបាល សង្គមកិច្ច សេវាសាធារណៈ និងសណ្ដាប់ធ្នាប់សាធារណៈ។
មេឃុំ ឬចៅសង្កាត់ អាចប្រគល់ភារកិច្ចបន្ថែមពីលើភារកិច្ចដែលបែងចែកខាងលើនេះ ដល់ជំទប់ឬចៅសង្កាត់រងរបស់ខ្លួនផងដែរ៕
