ក្រុមយុវជនលើកឡើងថា នឹងឈប់ទទួលយកស្នាមមេដៃ និងលិខិតផ្ទេរសិទ្ធិរបស់ប្រជាពលរដ្ឋនៅត្រឹមថ្ងៃពុធសប្តាហ៍ក្រោយ ហើយគ្រោងដាក់លិខិតនៅសាលារាជធានីភ្នំពេញនៅចុងសប្តាហ៍ដដែល ដើម្បីស្នើសុំធ្វើបាតុកម្ម ទាមទារឱ្យរដ្ឋាភិបាលបញ្ឈប់ការចេញបណ្ណស្នាក់នៅអចិន្ត្រៃយ៍ដល់ជនបរទេស និងលុបគម្រោងបង្កើតអគារសិក្សាភាសាវៀតណាម នៅសាកលវិទ្យាល័យភូមិន្ទភ្នំពេញ។
យុវជន អ៊ំ ឈុម បានឱ្យដឹងនៅថ្ងៃអាទិត្យនេះថា គិតត្រឹមថ្ងៃទី១៦ ខែតុលានេះ ក្រុមការងាររបស់យុវជនបានប្រមូលស្នាមមេដៃនិងលិខិតផ្ទេរសិទ្ធិរបស់ប្រជាពលរដ្ឋបានប្រមាណ ៣០០នាក់ និងឈប់ទទួលត្រឹមថ្ងៃពុធទី១៩ ខែតុលា។ លោកបន្តថា ក្រោយពេលឈប់ទទួលយកស្នាមមេដៃ ពួកគេនឹងយកសំណើទៅដាក់នៅសាលារាជធានីភ្នំពេញចុងសប្តាហ៍ដដែល ដើម្បីស្នើសុំធ្វើបាតុកម្ម នៅទីលានប្រជាធិតេយ្យទាមទារឱ្យរដ្ឋាភិបាលបញ្ឈប់ការចេញបណ្ណស្នាក់នៅអចិន្ត្រៃយ៍ដល់ជនបរទេស និងលុបគម្រោងបង្កើតអគារសិក្សាភាសាវៀតណាម នៅក្នុងសាកលវិទ្យាល័យភូមិន្ទភ្នំពេញ។
លោកបញ្ជាក់ថា៖ «គិតត្រឹមថ្ងៃអាទិត្យនេះ យើងប្រមូលស្នាមមេដៃបានប្រហែលជា៣០០សក្ខីភាព និយាយទៅផ្ញើមកគ្រប់២៥រាជធានី-ខេត្តក្រុងតែម្តង ។ យើងអាចនឹងឈប់ប្រមូលស្នាមេដៃត្រឹមថ្ងៃពុធសប្តាហ៍ក្រោយនេះ ហើយយើងអាចដាក់ចូលនៅសាលារាជធានីភ្នំពេញនៅចុងសប្តាហ៍ក្រោយនេះតែម្តង»។
លោកបន្ថែមថា៖ «ចំហនៃការទាមទាររបស់យើង គឺយើងទាមទារឱ្យរដ្ឋាភិបាលបញ្ឈប់ការចេញបណ្ណស្នាក់នៅអចិន្ត្រៃយ៍ដល់ជនបរទេសខុសច្បាប់ និងលុបគម្រោងបង្កើតអគារសិក្សាភាសាវៀតណាមនៅក្នុងសាកលវិទ្យាល័យភូមិន្ទភ្នំពេញ»។
យុវជនម្នាក់ទៀត លោក ខុន រស្មី ដែលបានចូលរួមជាមួយយុវជន ធែល ធីលែន និងយុវជនផ្សេងទៀត ក្នុងការតវ៉ានិងដាក់ញត្តិនោះ បានលើកឡើងថា ពួកគាត់ជួបការលំបាកច្រើនក្នុងការប្រមូលស្នាមមេដៃពីប្រជាពលរដ្ឋនៅតាមបណ្តារាជធានី-ខេត្ត ដោយសារតែមានពលរដ្ឋខ្លះ គាត់ត្រូវបានអាជ្ញាធរមូលដ្ឋានគំរាមកំហែង និងខ្លះទៀតខ្លាចមានការចោទប្រកាន់ឬចាប់ខ្លួនជាដើម។ យ៉ាងណា លោកថា ទោះជាមានការចាប់ខ្លួនលោក ធែល ធីលែន និងមានការគំរាមកំហែងតាមរូបភាពណាក៏ដោយ ក៏ក្រុមយុវជននៅតែបន្តប្រមូលស្នាមេដៃរហូតដល់ថ្ងៃទី១៩ ខែតុលា ហើយយកលិខិតដាក់ទៅរដ្ឋបាលរាជធានីភ្នំពេញនៅចុងសប្តាហ៍ក្រោយនេះ ដើម្បីស្នើសុំធ្វើបាតុកម្មនៅទីលានប្រជាធិបតេយ្យ នាពេលឆាប់ៗខាងមុខនេះ។
លោកអំពាវនាវថា៖ «ខ្ញុំសូមអំពាវនាវដល់ប្រជាពលរដ្ឋទាំងអស់ ទាំងនៅក្នុងស្រុក និងក្រៅស្រុកមានការគាំទ្រ និងមានការចូលរួមនៅអំឡុងពេលដែលពួកយើងយកញត្តិដាក់នៅសាលារាជធានីភ្នំពេញ និងនៅពេលធ្វើបាតុកម្មត្រូវចូលរួមឱ្យបានច្រើនកុះករផងដែរ»។
វីអូឌីមិនអាចសុំការបំភ្លឺពីអ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី បានទេនៅរសៀលថ្ងៃអាទិត្យនេះ ។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត ពន្យល់ថា នៅក្នុងច្បាប់ស្តីពីការធ្វើបាតុកម្មដោយសន្តិវិធី គ្រាន់តែប្រជាពលដ្ឋជូនដំណឹងសុំធ្វើបាតុកម្ម ឬការជួបជុំគ្នាដោយសន្តិវីធីនៅទីលានប្រជាធិបតេយ្យ ដោយមិនចាំបាច់មានការយល់ព្រមពីសាលារាជធានីភ្នំពេញ ក៏ពួកគេអាចជួបជុំបានដែរ ប៉ុន្តែការជួបជុំនោះត្រូវធ្វើឡើងក្រោមមនុស្ស២០០នាក់។
លោក អំ សំអាត លើកឡើងថា បើសិនជាសាលារាជធានីភ្នំពេញមិនអនុញាតតាមការស្នើសុំរបស់ក្រុមយុវជននោះទេ ជាការរំលោភលើសិទ្ធិរបស់ប្រជាពលរដ្ឋក្នុងការជួបជុំដោយសន្តិវិធី។
លោកបន្តថា៖ «បើមិនមានការអនុញាតទេ ជាការរំលោភលើសិទ្ធ និងរំលោភលើច្បាប់ស្តីពីការធ្វើបាតុកម្មដោយសន្តិវិធី ព្រោះនៅក្នុងច្បាប់ អាចជួបជុំគ្នាធ្វើបាតុកម្មដោយសន្តិវិធីក្រោម២០០នាក់»។
ទាក់ទងគម្រោងស្នើសុំធ្វើបាតុកម្មប្រឆាំងការផ្តល់បណ្ណស្នាក់នៅអចិន្ត្រៃយ៍ដល់ជនបរទេស និងគម្រោងបង្កើតដេប៉ាតឺម៉ង់សិក្សាភាសាវៀតណាមនេះ យុវជនម្នាក់ក៏ត្រូវបានសមត្ថកិច្ចចាប់ខ្លួនក្រោយបានជួបមន្ត្រីរដ្ឋបាលរាជធានីភ្នំពេញ ដោយសមត្ថកិច្ចសំអាងលើបទចោទទៅលើយុវជនក្នុងសំណុំរឿងកាលពី៦ឆ្នាំមុន។
ក្នុងដីកាបង្គាប់ឱ្យឃុំខ្លួនរបស់សាលាដំបូងខេត្តកណ្ដាល ចុះថ្ងៃទី៤ ខែតុលា ឆ្នាំ២០២២នេះ បានឱ្យដឹងថា កាលពីអំឡុងឆ្នាំ២០១៦ ឈ្មោះ ធែល ធីលែន បានលួចលក់អចលនវត្ថុ[ដី]របស់អ្នកដទៃ ដែលមិនមែនជារបស់ខ្លួន ដែលប្រព្រឹត្តនៅភូមិព្រែកដូនហែម ឃុំព្រែកអំពិល ស្រុកខ្សាច់កណ្តាល ខេត្តកណ្តាល។
តែយ៉ាងណា អ្នកស្រី លី ធីតា ដែលជាភរិយារបស់លោក ធែល ធីលែន បានបដិសេធចំពោះការចោទប្រកាន់នេះ ដោយថា ដីដែលស្វាមីរបស់គាត់យកទៅដាក់បញ្ចាំនោះ ជាដីរបស់លោក ផៃ ធែល ដែលជាឪពុករបស់ស្វាមីគាត់ ហើយដីនោះ លោក ផៃ ធែល បានផ្ទេរសិទ្ធិកាន់កាប់ឱ្យលោក ធែល ធីលែន តាំងពីឆ្នាំ២០១៦មក។
មាត្រា៣៥ នៃរដ្ឋធម្មនុញ្ញ ចែងថា ប្រជាពលរដ្ឋខ្មែរទាំង២ភេទ មានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្តីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យនិងដោះស្រាយយ៉ាងហ្មត់ចត់ពីអង្គការរដ្ឋ។
ចំណែកមាត្រា៣៧ នៃរដ្ឋធម្មនុញ្ញ ចែងថា សិទ្ធិធ្វើកូដកម្មនិងធ្វើបាតុកម្មដោយសន្តិវិធី ត្រូវយកមកអនុវត្តនៅក្នុងក្របខណ្ឌនៃច្បាប់ ខណៈមាត្រា៤១ ចែងថា ប្រជាពលរដ្ឋខ្មែរមានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មាន សេរីភាពខាងបោះពុម្ពផ្សាយ និងសេរីភាពខាងជួបជុំ ជាដើម៕