មន្ត្រីជាន់ខ្ពស់របស់គណបក្សយុវជនកម្ពុជាមួយរូបបានអះអាងថា បើគ្មានលុយសម្រាប់ធ្វើនយោបាយ នោះយុវជននឹងមិនអាចសម្រេចគោលដៅមហិច្ឆតានយោបាយរបស់ខ្លួនបាននោះទេ ខណៈគណបក្សនយោបាយដែលនៅក្រៅរដ្ឋាភិបាលមួយចំនួនយល់ថា ដើមទុនដើម្បីធ្វើនយោបាយពិតប្រាកដ គឺសមត្ថភាពដឹកនាំទៅវិញទេ។
លោក ឯម សុខសុវណ្ណ ប្រធាននាយកដ្ឋានកិច្ចការនយោបាយរបស់គណបក្សយុវជនកម្ពុជា បានថ្លែងប្រាប់ វីអូឌី ថាប្រសិនបើយុវជនប្រឡូកក្នុងឆាកនយោបាយ ហើយគ្មានលទ្ធភាពចូលរួមក្នុងសកម្មភាពនយោបាយ នោះពួកគេនឹងមិនអាចសម្រេច ឬពិបាកសម្រេចគោលដៅនយោបាយតែម្ដង។
យុវជនដែលមានវ័យ៣៣ឆ្នាំ និងជាអតីតអនុប្រធានយុវជនគណបក្សសង្គ្រោះជាតិប្រចាំខេត្តស្វាយរៀងរូបនេះ បញ្ជាក់បន្ថែមថា ពាក្យ “លទ្ធភាព” គឺលោកចង់សំដៅទៅដល់ធនធានថវិកាដែលអ្នកនយោបាយត្រូវចំណាយក្នុងសកម្មភាពនយោបាយតែម្ដង។
ហាក់ផ្ទុយពីការអះអាងនេះ បេក្ខជនមេឃុំគណបក្សប្រជាធិបតេយ្យមូលដ្ឋាន លោក មិន ពៅ បានលើកឡើងថា កត្តាជាអាទិភាពដែលធ្វើឱ្យយុវជនជោគជ័យក្នុងវិស័យនយោបាយពិតប្រាកដ មិនមែនជាលទ្ធភាពផ្នែកហិរញ្ញវត្ថុទេ តែផ្ទុយទៅវិញ នោះគឺជាសមត្ថភាពផ្នែកបញ្ញាស្មារតី។
លោកបន្តថា៖ «ខ្ញុំមើលឃើញថា បញ្ហាសំខាន់គឺសមត្ថភាពធំ។ លុយកាក់ឬធនធានហ្នឹងគឺជាការចាត់ចែង យើងមិនបដិសេធ តែវាមិនមែនជាអាទិភាពទេ តែយើងត្រូវមានសមត្ថភាពគ្រប់គ្រងវា»។
បើតាមលោក មិន ពៅ ជាបេក្ខជនមេឃុំ ដែលហ៊ានចូលរួមប្រកួតប្រជែងការបោះឆ្នោតឃុំ-សង្កាត់កាលពីខែមិថុនាថ្មីៗនេះ បានសង្កត់ធ្ងន់ថា ការធ្វើនយោបាយមិនមែនជាការចុះចែកលុយឱ្យពលរដ្ឋឡើយ តែវាគឺជាការបង្ហាញសមត្ថភាពដឹកនាំ និងគោលនយោបាយទៅកាន់ម្ចាស់ឆ្នោត អំពីភាពជាអ្នកនយោបាយរបស់ខ្លួន ដើម្បីទាក់ទាញការគាំទ្រពីម្ចាស់ឆ្នោត។
នៅពេលគេនិយាយអំពីសកម្មភាពនយោបាយ គេមិនអាចមិននិយាយអំពីទស្សនៈរបស់បណ្ឌិត កែម ឡី បាននោះទេ ដែលកាលលោកនៅមានជីវិតលោកតែងចេញវិភាគនយោបាយ និងផ្ដល់ជាដំណោះស្រាយចំពោះបញ្ហាសង្គមនានា។ សារទាំងនោះបានទាក់ទាញការគាំទ្រជាច្រើនពីសំណាក់ពលរដ្ឋរាប់លាននាក់ ដោយលោកពុំបានចំណាយធនធានថវិកាដើម្បីផ្សព្វផ្សាយនោះឡើយ។
បើទោះយ៉ាងនេះក៏ដោយចុះ លោក ប៉ា ចន្ទរឿន ប្រធានមជ្ឈមណ្ឌលប្រជាធិបតេយ្យកម្ពុជា ហាក់មិនឯកភាពទៅលើសមត្ថភាពតែមួយមុខថាអាចនឹងទទួលបានជោគជ័យក្នុងជីវិតនយោបាយនោះឡើយ ប្រសិនបើយុវជនពុំមានថវិកាគ្រប់គ្រាន់ទេ គឺពិតជាពិបាកក្នុងការធ្វើសកម្មភាពនយោបាយពិតមែន។
លោកបន្តថា៖ «ធ្វើអីក៏ដោយ គឺត្រូវការផ្នែកបច្ចេកទេស ធនធានហិរញ្ញវត្ថុ មិនថាតែធ្វើនយោបាយទេ ធ្វើអីក៏ដោយ»។
អ្នកវិភាគសង្គមរូបនេះអះអាងទៀតថា យុវជនដែលមានមហិច្ឆតាប្រឡូកក្នុងឆាកនយោបាយ យ៉ាងហោចណាស់ក៏ត្រូវមានប្រភពចំណូល និងមុខរបរច្បាស់លាស់ដែរ មុនពេលពួកគេចូលក្នុងសង្វៀននយោបាយ ទើបអាចធ្វើឱ្យក្ដីសុបិនរបស់យុវជនដែលចូលរួមក្នុងសកម្មភាពភាពនយោបាយសម្រេចបានតាមគោលបំណងរបស់ខ្លួន។
ដោយឡែក ក្រុមការងារគណបក្សប្រជាជនចុះជួយឃុំរលាំងចក ស្រុកសំរោងទង ខេត្តកំពង់ស្ពឺ លោក ឡុង សុផល អះអាងប្រាប់ វីអូឌី ថាចាប់តាំងពីពេលលោកចូលរួមជាមួយបក្សកាន់អំណាចមក គឺលោកចូលរួមធនធានថវិកាតាមលទ្ធភាព ដោយមិនមានការដាក់កម្រិតថវិកាណាមួយនោះទេ ។
លោកបន្តថា៖ «ចំពោះវិស័យសាធារណៈ បើសិនយើងមានទឹកចិត្តរួមចំណែកជាសម្ភារឬថវិកាសម្រាប់ពលរដ្ឋហ្នឹង គឺធ្វើតាមដែលយើងមាន អត់មានការបង្ខិតបង្ខំទេ គឺទៅតាមសមត្ថភាព-លទ្ធភាព»។
ចំណែកឯយុវជន គង់ រ៉ៃយា ដែលជាសកម្មជនគណបក្សភ្លើងទៀន ហាក់បង្ហាញជំហរមិនសូវជាគាំទ្រប៉ុន្មាននោះទេ ដែលថាយុវជនទាល់តែមានលុយទើបអាចធ្វើនយោបាយបាននោះ។ ប្រសិនបើទាល់តែមានថវិកា ទើបអាចចូលសង្វៀននយោបាយបាន ប្រាកដណាស់នឹងពុំមានយុវជនណាហ៊ានចូលប្រឡូកក្នុងឆាកនយោបាយឡើយ។
យុវជនដែលធ្លាប់ជាប់ពន្ធធនាគារដោយសារបញ្ហានយោបាយរូបនេះ បានសង្ងត់ធ្ងន់ថា ការដែលមានចំណេះដឹង និងឈ្វេងយល់ពីនយោបាយ ទើបជាកត្តាសំខាន់ពិតប្រាកដ ដែលយុវជនត្រូវមាន មិនមែនពឹងផ្អែកលើប្រភពថវិកាតែមួយផ្នែកនោះទេ។
ជំរឿនជាតិ ឆ្នាំ២០១៩ ប្រជាជនដែលជាយុវជនប្រមាណ ២ភាគ៣ នៃប្រជាជនកម្ពុជាសរុបជាង១៦លាននាក់៕
រាយការណ៍ដោយ៖ លោក ឃី ពិសី