អ្នកស្ម័គ្រចិត្តបង្កើតកម្មវិធីមហោស្រពអក្សរសិល្ប៍ខ្មែរ បានអំពានាវរកថវិកាក្នុងគោលបំណងរៀបចំព្រឹត្តិការណ៍ «មហោស្រពអក្សរសិល្ប៍ខ្មែរ» ឱ្យដំណើរការបានរៀងរាល់ឆ្នាំ ដើម្បីបំផុសស្មារតីឱ្យយុវជនស្រលាញ់ការអាន និងលើកកម្ពស់ស្នាដៃអ្នកនិពន្ធខ្មែរ។
នាយកគ្រប់គ្រងមហោស្រពអក្សរសិល្ប៍ខ្មែរ លោក ឃុត សុខៀន បានឱ្យដឹងថា មហោស្រពអក្សរសិល្ប៍ គឺបានចាប់ផ្តើមដំបូងក្នុងឆ្នាំ២០១៧ ដោយអ្នកស្ម័គ្រចិត្តមួយក្រុម។ លោកថាការបង្កើតកម្មវិធីនេះគឺជំរុញឱ្យពលរដ្ឋកម្ពុជា ជាពិសេសយុវជនឱ្យស្រលាញ់អក្សរសិល្ប៍ជាតិ ស្រលាញ់សិល្បៈ វប្បធម៌របស់ខ្លួន និងការបង្កើតភាពជិតស្និតរវាងអ្នកនិពន្ធ និងអ្នកអាន។
ប្រភពដដែលបន្តថា ថវិកាចំណាយលើព្រឹត្តិការណ៍ មហោស្រពអក្សរសិល្ប៍ខ្មែរនាពេលកន្លងមក ដែលទទួលបានពីយុទ្ធនាការរៃអង្គាសថវិកាតាមបណ្តាញសង្គម និងការចូលរួមពីក្រុមហ៊ុនឯកជននានានោះ មិនទាន់អាចទ្រទ្រង់ដំណើរការមហោស្រពមួយនេះឱ្យបានគ្រប់គ្រាន់បាននៅឡើយ។
បន្ថែមពីលើនេះ លោកបារម្ភថា មិនអាចដំណើរការមហោស្រពមួយនេះបានឱ្យបានជារៀងរាល់ឆ្នាំបន្តទៀត ករណីដែលមិនមានថវិកាក្នុងការទ្រទ្រង់ដើម្បីរៀបចំកម្មវិធីទៅមុខទៀត។
លោកបន្តថា៖ «ពិបាកដែរក្នុងមូយឆ្នាំៗ[បើ] យើងទៅរកថវិការអត់បាន យើងពិបាកនឹងរកមនុស្សមកធ្វើការងារដោយស្ម័គ្រចិត្តបានច្រើនឆ្នាំ។ ចិងវាប៉ះពាល់ដល់ធនធានមនុស្សដែរអ្វីដែរសំខាន់យើងមានថវិការគាំទ្រពួកគាត់ទោះបីស្ម័គ្រចិត្តក៏ដោយ វាត្រូវមានកំរៃតិចតួច ថ្លៃសាំងថ្លៃហូបចុក ថ្លៃស្នាក់នៅ គៀវគរថវិការអត់គ្រប់គា្រន់វាប៉ះពាល់ដំណើរការទាំងមូលដែរ»។
នាយកគ្រប់គ្រងមហោស្រពអក្សរសិល្ប៍ខ្មែររូបនេះ បានអំពាវនាវឱ្យពលរដ្ឋចូលរួមឧបត្ថម្ភជាថវិកា ដើម្បីគាំទ្រកម្មវិធីមួយនេះ ឱ្យមានសកម្មភាពដូចវិស័យដទៃទៀត។
លោកបន្តថា៖ «ការកៀរកថវិកាសម្រាប់ធ្វើសកម្មភាពមហោស្រពអក្សសិល្ប៍ គឺជារឿងសំខាន់ណាស់ ដែលទាមទារឱ្យមានការចូលរួម ពីគ្រប់មជ្ឈដ្ឋាន ទាំងប្រជាពលរដ្ឋ ទាំងមន្រ្តីរាជការ នាម៉ឺនសព្វមុនមន្រ្តី ក្តុម្ពី អីផ្សេងៗហ្នឹង ចង់ឱ្យមានការចូលរួមជាថវិកា មកដល់ពួកយើង ដើម្បីពួកយើងដំណើរការធ្វើមហោស្រពហ្នឹងជាបន្តបន្ទាប់បាន»។
មហោស្របអក្សរសិល្ប៍ខ្មែរលើកទី៥ ត្រូវបានប្រារព្ធឡើងរយៈពេល ៣ថ្ងៃ ចាប់ពីថ្ងៃទី២១ ដល់២៣ ខែតុលា ឆ្នាំ២០២២ ក្រោមប្រធានបទ «មត៌ករស់នៃអក្សរសិល្ប៍» នៅវិទ្យាល័យពោធិ៍សាត់ និងទីតាំងមួយចំនួនទៀតក្នុងខេត្តពោធិ៍សាត់ មានពលរដ្ឋចូលរួមប្រមាណ៤០០០នាក់។
ក្នុងព្រឹត្តិការណ៍នេះ កម្មវិធីជាច្រើនត្រូវបានរៀបចំឡើងដូចជា សិក្ខាសាលា ការតាំងពិពណ៌សៀវភៅ ការប្រកួតប្រជែងស្នាដៃអក្សសិល្ប៍ កំណាព្យ រឿងខ្លី ការសម្តែងចាប៉ីដងវែង ល្ខោននិយាយ និងរបាំជាដើម។
អ្នកនិពន្ធមួយរូប លោក ទឹម ម៉ានី ដែលបានចូលរួមលើកកម្ពស់ស្នាដៃនៃការតែងនិពន្ធ ក្នុងកម្មវិធីនេះ បានបង្ហាញការសាទរ នៅពេលដែលមានព្រឹត្តិការណ៍មួយនេះកើតឡើង។ អ្នកនិពន្ធរូបនេះ ក៏ប្រាថ្នាចង់ឃើញមហោស្របអក្សរសិល្ប៍នេះ មានសកម្មភាពជាប្រចាំ ហើយពង្រីកវិសាលភាពរបស់ខ្លួន ទៅតំបន់គោលដៅដទៃទៀត តាមលទ្ធផលដែលអាចធ្វើទៅបាន។
លោកបន្តថា៖ «ជាគំនិតលោកគ្រូ! រំភើប ចង់ឱ្យមានជានិច្ចនិរន្តរ៍ ចង់ឱ្យខេត្តនីមួយៗ ធ្វើដោយខ្លួនឯងដែរ លោកគ្រូនឹងចូលរួម» ។
អ្នកនិពន្ធវ័យ ៧៧ ឆ្នាំរូបនេះ បានឱ្យដឹងថា លោកដាក់បង្ហាញសា្នដៃ ក្នុងមហោស្រពមហោស្របអក្សរសិល្ប៍ខ្មែរលើកទី៥នេះ មានប្រលោមលោកជាង១០រឿង និងមានសៀវភៅស្តីពីវិធីសាស្រ្តតែងនិពន្ធផងដែរ។ លោកសង្កេតឃើញថា មហោស្រពអក្សរសិល្ប៍ខ្មែរ ក៏ជាផ្នែកមួយចូលរួមផ្លាស់ប្តូរឥរិយាបថយុវជនឱ្យចាប់អារម្មណ៍ការអាន និងការតែងនិពន្ធកាន់់ច្រើនឡើង។
ប្រធាននាយកដ្ឋានសៀវភៅ និងការអាន នៃក្រសួងវប្បធម៌ និងវិចិត្រសិល្បៈ លោក កុក រស់ លើកឡើងថា លោកគាំទ្រ រាល់សកម្មភាពភាពដែលលើកកម្ពស់ស្នាដៃអក្សសិល្ប៍ខ្មែរ។ បន្ថែមពីលើនេះ ការបង្កើតឱ្យមានសកម្មភាពនៃមហោស្រពអក្សរសិល្ប៍ វានឹងជួយឱ្យវិស័យអំណាននៅកម្ពុជា លេចធ្លោរ និងទាក់ទាញការអានកាន់តែច្រើន។
លោកថ្លែងថា៖ «បងមានចំណាប់អារម្មណ៍ខ្លាំង និងសូមគាំទ្រចំពោះការរៀបចំបង្កើតឱ្យមានមហោស្រពអក្សរសិល្ប៍មួយនេះឡើង ដើម្បីជួយជំរុញការបង្កើតស្នាដៃតែងនិពន្ធ និងការអាននៅកម្ពុជា ស្របនឹងផែនការសកម្មភាពដែលនាយកដ្ឋានសៀវភៅ និងការអាន បាននឹងកំពុងធ្វើសព្វថ្ងៃនេះផងដែរ»។
លោក កុក រស់ ឱ្យដឹងទៀតថា ដើម្បីលើកកម្ពស់ស្នាដៃ និងគុណតម្លៃរបស់អ្នកនិពន្ធខ្មែរ ក្រសួងវប្បធម៌ និងវិចិត្រសិល្បៈ បានរៀបចំយន្តការជាបន្តបន្ទាប់ ដូចជា ជំរុញក្រសួងស្ថាប័ន អង្គការ សមាគម សង្គមស៊ីវិល និងវិស័យឯកជន ចូលរួមសហការរៀបចំការប្រលងស្នាដៃតែងនិពន្ធនេះឱ្យបានញឹកញាប់។ មិនតែប៉ុណ្ណោះ ពាក់ព័ន្ធការរៀបចំប្រលងស្នាដៃតែងនិពន្ធប្រលោមលោក និងកំណាព្យ ក្រសួងបានធ្វើជាប្រចាំ គិតមកដល់ពេលនេះ បានផ្តល់ជារង្វាន់លើកទឹកចិត្តជិត២០ពានរង្វាន់រួចហើយ។
ស្របគ្នានឹងចក្ខុវិស័យរបស់ក្រសួងវប្បធម៌ និងវិចិត្រសិល្បៈនេះដែរ នាយកគ្រប់គ្រងមហោស្រពអក្សរសិល្ប៍ខ្មែរ លោក ឃុត សុខៀន ប្តេជ្ញាថា លោកមានបំណងនឹងដឹកនាំមហោស្របអក្សរសិល្ប៍ខ្មែរ ឱ្យបានរៀងរាល់ឆ្នាំ នៅគ្រប់ខេត្តក្នុងប្រទេសកម្ពុជា ដើម្បីជំរុញឱ្យយុវជន នៅតាមបណ្តាខេត្ត មានឱកាសយល់ដឹងពីស្នាដៃអក្សសិល្ប៍ កាន់តែទូលំទូលាយបន្ថែមទៀត៕
អត្ថបទដោយ៖ វណ្ណ ប្រសិទ្ធ