យុវជនមួយក្រុមបានលើកឡើងថា អាជ្ញាធរដែលរៀបចំសណ្តាប់ធ្នាប់នៅសួនមុខវត្តបទុមវតី ក្នុងខណ្ឌដូនពេញ រាជធានីភ្នំពេញបានរឹតត្បិតពួកគេ មិនឱ្យយកសៀវភៅដាក់នៅទីសាធារណៈ សម្រាប់ប្រជាពលរដ្ឋទូទៅអានដោយឥតគិតថ្លៃ ដោយតម្រូវឱ្យស្នើសុំលិខិតពីសាលាក្រុងជាមុនសិន មុននឹងចេញធ្វើសកម្មភាព។
យុវតីឈ្មោះ ឆែម ស្រីគា ហៅខ្លឹមសារ បានឱ្យដឹងសៅរ៍នេះថា រូបគេតែងតែប្រមូលសៀវភៅចាស់ៗយកទៅដាក់នៅទីសាធារណៈ ប្រមាណ៣ឆ្នាំមកហើយ ចាប់តាំងពីឆ្នាំ ២០២០មក។ ប្រភពបន្តថា ពីមុនក្រុមការងាររបស់នាង តែងរៀបចំការងារនេះនៅតាមបណ្តាខេត្ត តែទើបតែ ៣ខែចុងក្រោយនេះ ក្រុមការងារបានលើកទឹកចិត្តឱ្យមានអំណាន ជ្រើសរើសរាជធានីភ្នំពេញ ដើម្បីឱុ្យសាធារណជន បានអានដោយឥតគិតថ្លៃដូចដែលធ្លាប់បានធ្វើរួចមកហើយ នៅតាមខេត្តក្នុងពេលកន្លងទៅ។
យុវតី ឆែម ស្រីគា បន្តថា៖« នៅសប្តាហ៍មុនថ្ងៃសៅរ៍ [ទី២៩] ហ្នឹង អាជ្ញាធរគេហ្នឹងបានចុះមកហាមឃាត់ឱ្យខ្ញុំទៅសុំការអនុញ្ញាតពីសាលារាជធានី គេប្រាប់ថា សួនសារណៈហ្នឹងមិនមែនជាកន្លែងអានសៀវភៅទេ »។
បើតាមយុវតីវ័យ ២១ឆ្នាំ រូបនេះ ប្រាប់ វីអូឌី ថា កាលពីថ្ងៃទី២៩ ខែតុលា ឆ្នាំ២០២២ អាជ្ញាធរក្នុងខណ្ឌដូនពេញ ដែលប្រចាំការនៅសួនទល់មុខវត្តបទុមវតី បានមកហាមឃាត់ក្រុមការងាររបស់ខ្លួនឱ្យបញ្ឃប់សកម្មភាពដាក់សៀវភៅបន្តទៀត ដោយទាមទារឱ្យមានលិខិតអនុញ្ញាតពីសាលាក្រុងជាមុនសិន។
ប្រភពដដែល បន្តថា សៀវភៅដែលយកឱ្យសាធារណជនអាននៅសួនច្បារនោះ ឧបត្ភម្ភពីសម្បុរសជននានា នៅតាមបណ្តាញសង្គម ដែលរួមមានប្រភេទ សៀវភៅស្តីពីការលើកទឹកចិត្ត ការធ្វើអាជីវកម្ម និងសៀវភៅប្រលោមលោកជាដើម ។
កញ្ញា ឆែម ស្រីគា លើកឡើងទៀតថា ការចូលរួមសកម្មភាពសង្គមនៅពេលនេះ គឺដើម្បីបណ្តុះស្មារតីសាធារណជន ជាពិសេសយុវជន ឱ្យមានគំនិតស្រលាញ់ការអាន ជាជាងការមកអង្គុយលេងសាសងគ្នានៅទីសាធារណៈ។
យុវតីបន្តថា« ខ្ញុំសម្លឹងឃើញភាគច្រើននៅទីតាំងសាធារណៈបែបហ្នឹង គាត់អត់ចាប់អារម្មណ៍ក្នុងការស្វែងរកចំណេះ។ ភាគច្រើនគាត់មកអង្គុយសាសងគ្នា អង្គុយញាំស្រា អីចឹងទៅ។ ខ្ញុំឃើញបែបហ្នឹង ខ្ញុំក៏កើតមានគំនិតថា យើងមានសៀវភៅស្រាប់ហើយ។ ចឹងយើងយកមកដាក់នៅទីសាធារណ
ៈបែបហ្នឹងដើម្បីឱ្យគាត់មានឱកាសបានអានសៀវភៅ»។
ពាក់ព័ន្ធករណីនេះ អភិបាលខណ្ឌដូនពេញ លោក ជា ខេមា មិនអាចសុំការបកស្រាយបានទេ នៅថ្ងៃសៅរ៍នេះ ដោយលោកអះអាងថា កំពុងជាប់រវល់។ យ៉ាងនេះក្តី អភិបាលរងខណ្ឌដូនពេញ លោក ឈឹម ឌីណា បដិសេដដោយខ្លីថា មិនមានករណីបែបនេះកើតឡើង នៅក្នុងមូលដ្ឋានរបស់លោកនោះទេ។
លោកបន្តថា៖ «មិនមានករណីគ្រាន់តែមកអានសៀវភៅ គេដេញចេញទេ! មិនអាចទេ មិនមានករណីចឹងទេ! ខ្ញុំសូមការពារចឹង។ បើយុវជនហ្នឹងចង់ដឹងពីព័ត៌មានច្បាស់ យុវជនហ្នឹងមកជួបខ្ញុំនៅសាលាខណ្ឌដូនពេញមក»។
ចំណែក អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានជំរុញឱ្យអាជ្ញាធរមូលដ្ឋាន សម្របសម្រួលរកទីតាំងឱ្យក្រុមយុវជន ដែលមានគំនិតចូលរួមលើកកម្ពស់វិស័យអំណានជាជាងការហាមឃាត់។ លោកបន្តថាប្រសិនបើបែបនេះមែន នោះមានន័យថា វាជាការអនុវត្តផ្ទុយពីគោលនយោបាយរបស់ក្រសួងអប់រំយុវជន និងកីឡា ដែលតែងតែមានសកម្មភាពបំផុសស្មារតីយុវជនឱ្យស្រលាញ់ការអាន។
លោកបន្តថា ៖«ករណីនេះ អាជ្ញាធរនៅមូលដ្នានហ្នឹង ជាពិសេសសន្តិសុខហ្នឹង គួរតែសម្របសម្រួល ធ្វើយ៉ាងណាឱ្យគាត់ដាក់តាំងសៀវភៅហ្នឹងឱ្យសាធារណជនបានអាន។ វាជាផលប្រយោជន៍សាធារណៈ វាមិនមែនជាផលប្រយោជន៍បុគ្គលទេ។ គួតែមានការជួយសម្របសម្រួលរកទីតាំងណា រកកន្លែងណាមួយដើម្បីជាជាកន្លែងសមគួរអាចគាត់ដាក់តាំងនូវសៀវភៅទាំងអស់នៅ»។
សម្រាប់នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា (CCHR) លោកស្រី ចក់ សុភាព ចាត់ទុកការហាមឃាត់នេះថា គឺជាការរំលោភសិទ្ធិរបស់ប្រជាពលរដ្ឋក្នុងការចូលរួមសកម្មភាពសង្គម ដែលផ្ទុយពីរដ្ឋធម្មនុញ្ញកម្ពុជាបានកំណត់។
លោកស្រីបន្ត «ខ្ញុំឃើញនៅពេលដែលយុវជនមានការផ្តួចផ្តើមគំនិតល្អៗដើម្បីបរិស្ថាន ដើម្បីបុព្វហេតុក្នុងការលើកកម្ពស់ការយល់ដឹងក្នុងចំណោមសាធារណជនហ្នឹងហាក់ដូចជាមិនទទួលបានសាទរពីអាជ្ញាធរទេ។អាជ្ញាធរតែងតែបង្កភាពលំបាក ហើយពេលខ្លះហ្នឹងតម្រូវឱ្យយុវជនមានការស្នើសុំការអនុញ្ញាត ។ ខ្ញុំមើលទៅជាការបន្ទុចបង្អាក់ ភាពសកម្មរបស់ពលរដ្ឋទៅវិញ»។
រដ្ឋធម្មនុញ្ញកម្ពុជា មាត្រា៣៥ ចែងថា ប្រជាពលរដ្ឋខ្មែរទាំងពីរភេទ មានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ ។ សេចក្តីស្នើទាំងឡាយរបស់ប្រជាពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ ។
យ៉ាងណាមិញ សម្រាប់ យុវតី ឆែម ស្រីគា ប្រាប់ថារូបគេ និងក្រុមការងារនឹងបន្តសកម្មភាព យកសៀវភៅ ដាក់នៅតាមសួនសាធារណៈ សាជាថ្មីម្តងទៀត ដើម្បីជំរុញឱ្យយុជន ងាកមកចាប់អារម្មណ៍ការអានឱ្យបានកាន់តែច្រើនឡើង៕