ថ្នាក់ដឹកនាំសហគមន៍ដែលមានឈ្មោះ«ស្រ្តីក្លាហានគីឡូលេខ៦» ក្នុងរាជធានីភ្នំពេញ លើកឡើងថាយុវជន និងកុមារនៅក្នុងសហគមន៍ប្រមាណ ៨០ភាគរយហើយ ត្រូវបង្ខំចិត្តបោះបង់ការសិក្សារបស់ពួក ដោយសារកត្តាជីវភាពក្រីក្រ ខណៈដែលមន្ត្រីរាជរដ្ឋាភិបាលធ្លាប់ចាត់ទុកការបោះបង់ការសិក្សានេះថាគឺជារឿងគួរឱ្យព្រួយបារម្ភ។
ប្រធានសហគមន៍ស្រ្តីក្លាហានគីឡូលេខ៦ អ្នកស្រី យ៉ាង ផាន់នី ឱ្យដឹងថា ក្រៅពីបញ្ហាប្រឈមធំៗជាច្រើនទៀតនៅក្នុងសហគមន៍ សិស្សបោះបង់ការសិក្សានេះក៏ជារឿងដែលស្មុគស្មាញមួយបន្ថែមទៀតដែរ។ អ្នកស្រីបន្តថា សព្វថ្ងៃនេះយុវជនចាប់ពីកម្រិតអនុវិទ្យាទៅដល់វិទ្យាល័យ បានបង្ខំចិត្តបោះបង់ការរៀនសូត្ររបស់ខ្លួនព្រោះតែបញ្ហាជីវភាព សម្រាប់សហគមន៍«ស្រ្តីក្លាហានគីឡូលេខ៦» ស្ទើរមួយរយភាគរយទៅហើយ ដែលធ្វើឱ្យធនធានមួយនេះ កាន់តែបន្តធ្លាក់ចុះ។
អ្នកស្រីបន្ដថា៖«ក្មេងៗចាប់ពីអាយុ១០ឆ្នាំឡើងគឺបោះបង់ការសិក្សាចោល ហើយទៅធ្វើការអីផ្សេងអ៊ីចឹងទៅ ហើយវាសឹងតែ៧០ទៅ៨០%ដែលឈប់រៀន ដោយសារបន្ទុកគ្រួសារ ពីព្រោះក្នុងមួយគ្រួសារយ៉ាងតិចក៏មានសមាជិក៤នាក់ដែរ»។
បើតាមប្រធានសហគមន៍រូបនេះមើលឃើញថា មូលហេតុចម្បងដែលនាំឱ្យយុវជនមួយចំនួនធំ ត្រូវបង្ខំចិត្តឈប់រៀនសូត្រ ដោយសារអាណាព្យាបាល រកចំណូលមិនសូវបានក្នុងបរិបទជំងឺកូវីដ-១៩ និងសមាជិកក្នុងគ្រួសារខ្លះមានកូនច្រើនជាដើម ជាបន្ទុកដែលពួកគេត្រូវជួយរកចំណូលសម្រាប់គ្រួសារ។
អង្គការសហប្រជាជាតិ រកឃើញថា ក្នុងឆ្នាំ២០២០ សិស្សជាង៣លាននាក់នៅទូទាំងប្រទេសកម្ពុជាបានប៉ះពាល់ការសិក្សា បន្ទាប់ពីគ្រឹះស្ថានសិក្សារដ្ឋនិងឯកជនបានបិទដំណើរការជាបណ្តោះអាសន្នដោយសារការរីករាលដាលជំងឺកូវីដ-១៩។
ក្នុងរបាយការណ៍ដែលចេញផ្សាយលើទំព័រហ្វេសប៊ុកអង្គការសហប្រជាជាតិនៅកម្ពុជា កាលពីថ្ងៃទី២១ ខែកក្កដា ឆ្នាំ២០២១ ឱ្យដឹងថា មុនពេលមានរោគរាតត្បាតជំងឺកូវីដ-១៩ កម្ពុជាបានសម្រេចគោលដៅអភិវឌ្ឍន៍ប្រកបដោយចីរភាព ឬ SDG ទី៤ ស្តីពីការរៀនសូត្រប្រកបដោយគុណភាពនិងចីរភាព។ ប៉ុន្តែចាប់តាំងពីខែមីនា ឆ្នាំ២០២០ ដែលមានការឆ្លងរីករាលដាលនៃជំងឺកូវីដ-១៩មក សិស្សចំនួនជាង៣លាន២សែននាក់បានរងផលប៉ះពាល់ការរៀនសូត្រ បន្ទាប់ពីរដ្ឋាភិបាលកម្ពុជាបានបិទសាលារៀនដោយសារវិបត្តិកូវីដ-១៩។
អង្គការសហប្រជាជាតិ បន្តថា ការប៉ះពាល់នេះបានជំរុញឱ្យវិស័យអប់រំមានការធ្លាក់ចុះយ៉ាងខ្លាំងក្នុងការអភិវឌ្ឍមនុស្ស (HDI) នៅកម្ពុជាសម្រាប់ឆ្នាំ២០២០ ដោយធ្លាក់ចុះជិត៤ភាគរយ (៣,៩៣%) បើប្រៀបធៀបពីឆ្នាំ២០១៩ ឬស្មើនឹងការលុបបំបាត់រាល់ការរីកចម្រើនលើវិស័យអប់រំដែលបានធ្វើក្នុងរយៈពេល៤ឆ្នាំកន្លងមក។
យុវជន ខុម សម្បត្តិ បច្ចុប្បន្នជាកម្មករលីសែង ដើម្បីជួយរកចំណូលសម្រាប់សម្រាលបន្ទុកក្រុមគ្រួសារ និយាយថា ខ្លួនពិតជាមិនចង់ឈប់រៀនទេ ប៉ុន្តែដោយសារកត្តាជីវភាពខ្វះខាត ត្រូវបង្ខំចិត្តឱ្យរូបគេឈប់រៀនត្រឹមថ្នាក់អនុវិទ្យាល័យ។ រស់នៅភូមិក្រោលគោ សង្កាត់គីឡូលេខ៦ ខណ្ឌឬស្សីកែវ រាជធានីភ្នំពេញ សម្បត្តិ លើកឡើងដោយខ្លីថា រូបគេពិតជាមានសោកស្តាយ ប៉ុន្តែដោយគ្មានជម្រើសគឺត្រូវបង្ខំចិត្តបោះបង់ការសិក្សា ទាំងមិនអស់ចិត្ត។
លោកបន្តថា៖«ខ្ញុំចង់រៀនដែរ តែជីវភាពលំបាកពេកក៏ឈប់រៀនជួយរកលុយម៉ែឪខ្ញុំទៅ»។
ចំណែក របាយការណ៍ដែលចេញដោយក្រសួង អប់រំយុវជន និងកីឡា ស្ដីពីគោលដៅអប់រំសម្រាប់ឆ្នាំសិក្សា ២០១៩-២០២៣ ប្តេជ្ញាថា ក្រសួងនឹងសម្រេចគោលដៅដើម្បីឈានទៅកាត់បន្ថយសិស្សបោះបង់ការសិក្សា ក្រោមប្រធានបទ«ការបណ្ដុះបណ្ដាលធនធានមនុស្សសម្រាប់បរិវត្ដកម្មសេដ្ឋកិច្ច ឌីជីថល » ។
ហាក់ផ្ទុយពីយុវជនផ្សេងទៀត សម្រាប់យុវជន ព្រំ រតនៈ ដែលកំពុងសិក្សាថ្នាក់ទី១០នៃវិទ្យាល័យឬស្សីកែវ រាជធានីភ្នំពេញ ប្រាប់ វីអូឌី ថា មូលហេតុដែលរូបគេនៅតែបន្ដការសិក្សា ដោយសារឃើញពីតម្លៃនៃការសិក្សាទៅថ្ងៃខាងមុខទៀត អាចនឹងជួយឱ្យជីវិតមានភាពល្អប្រសើរ។ ម្យ៉ាងវិញទៀត ការជម្នះបានចំពោះការសិក្សានេះ ក៏មានការលើកទឹកចិត្ត និងគាំទ្រពីអាណាព្យាបាលដែរ។
លោកបន្តថា៖«កត្ដាដែលខ្ញុំបន្ដការសិក្សា ពីព្រោះខ្ញុំមើលឃើញថាការសិក្សាវាជាស្ពានមួយសម្រាប់អនាគតខ្ញុំ។ ការសិក្សាននេះមានការជំរុញពីឪពុកម្ដាយខ្ញុំ និងខ្ញុំខ្លួនឯង» ។
ចៅសង្កាត់គីឡូលេខ៦ ខណ្ឌឬស្សីកែវ លោក ម៉ៅ វណ្ណា ថ្លែងថា អាជ្ញាធរមិនដែលព្រងើយកន្តើយទេ ជាពិសេសទាក់ទងការសិក្សា និងបញ្ហាប្រឈមផ្សេងៗទៀតរបស់យុវជន ដែលកំពុងស្ថិតនៅក្នុងវ័យសិក្សានេះ។ ដោយឡែក បញ្ហាយុវជនបោះបង់ការសិក្សានៅក្នុងសហគមន៍ ក្នុងនាមអាជ្ញាធរ លោកក៏មានក្ដីបារម្ភដែរ។ បើទោះបែបណា មកដល់ពេលនេះលោកនៅមិនទាន់ទទួលបានទិន្នន័យជាក់លាក់ អំពីតួលេខសិស្សបោះបង់ការសិក្សានេះនៅឡើយទេ។
លោកបន្តថា៖«ខ្ញុំអត់ទាន់បានព័ត៌មានពីគាត់[សហគមន៍ក្រោលគោគីឡូលេខ៦]។ គាត់ឧស្សាហ៍ជូនដំណឹងមកខ្ញុំ ប៉ុន្ដែរឿងយុវជនបោះបង់ការសិក្សាចាំខ្ញុំពិនិត្យម្ដងទៀត។ បើខ្ញុំមិនអាចដោះស្រាយបានក៏យើងមានដៃគូរសហការដើម្បីធ្វើរឿងហ្នឹងដែរ ឱ្យតែគាត់រាយការណ៍មកខ្ញុំ»។
វីអូឌី មិនទាន់អាចសុំការអត្ថាធិប្បាយពីលោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបាននៅឡើយទេ នៅថ្ងៃទី ២ វិច្ឆិកា។ ប៉ុន្ដែលោក ហង់ ជួនណារ៉ុន រដ្ឋមន្ត្រីក្រសួងអប់រំយុវជន និងកីឡា ធ្លាប់ប្រាប់អ្នកកាសែតក្នុងស្រុក នៅក្នុងសិក្ខាសាលាផ្សព្វផ្សាយស្តីពី របាយការណ៍ពិនិត្យតាមដានការអប់រំ ជាសាកលឆ្នាំ២០១៩ ថា លោកព្រួយបារម្ភចំពោះយុវជនបន្តធ្វើចំណាកស្រុក និងបោះបង់ចោលការសិក្សា ខណៈកម្ពុជាកំពុងត្រូវការធនធានមនុស្សដើម្បីចូលរួមក្នុងការអភិវឌ្ឍន៍សេដ្ឋកិច្ចជាតិ។
ដោយឡែក ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយ៉ាវី ថ្លែងថា ស្ថាប័នសាម៉ី និងរដ្ឋាភិបាលត្រូវបង្ហាញឆន្ទៈ ឱ្យបានមុតមាំក្នុងការធានា និងជំរុញឱ្យវិស័យអប់រំមានគុណភាព ជាពិសេសយុវជនដែលស្ថិតនៅក្នុងសហគមន៍ដែលជួបការលំបាកផ្នែកជីវភាព។
អ្នកស្រីបន្តថា៖«ក្រសួងអប់រំ និងរដ្ឋាភិបាលគួរតែគិតគូរពីបញ្ហារបស់យុវជនក្នុងសហគមន៍ក្រីក្រជាចម្បង ដើម្បីធានាបានថា ពួកគាត់អាចទទួលបានការអប់រំគ្របគ្រាន់ដែរទេ មុននឹងទៅដល់អ្នកផ្សេង»។
មិនខុសគ្នាទេ លោក ស៊ាង មួយឡៃ ប្រធានគម្រោងសិទ្ធិរស់នៅក្នុងទីក្រុងនៃអង្គការសមាគមធាងត្នោត និងជាអ្នកស្រាវជ្រាវបញ្ហាប្រឈម ក្នុងសហគមន៍គីឡូលេខ៦ រកឃើញថា បញ្ហាចម្បងដែលនាំឱ្យសិស្សបោះបង់ការសិក្សា គឺកត្តាជីវភាពក្រីក្រ។
នៅដើមឆ្នាំ ២០២១ អង្គការសមាគមធាងត្នោតរកឃើញថា ដោយសារភាពក្រីក្រកុមារក្នុង សហគមន៍មួយចំនួននៅក្នុងរាជធានីភ្នំពេញ ត្រូវបង្ខំចិត្តឈប់រៀន ឬមិនបានចូលរៀន ក្នុងនោះកុមារអាយុចន្លោះពី ៣ទៅ៥ឆ្នាំប្រហែល ៨០ភាគរយ មិនបានទៅរៀនថ្នាក់មតេយ្យសិក្សា។ ក្រៅពីនេះ កុមារអាយុចន្លោះពី ៦ ទៅ១១ឆ្នាំ ប្រហែល ៩ភាគរយ មិនបានចូលសាលារៀន ខណៈ១ភាគរយ បោះបង់ការសិក្សា ក្រោយចុះឈ្មោះចូលរៀនរួច៕