ប្រជាពលរដ្ឋឃុំព្រែកសំបួរ ស្រុកពាមជរ ខេត្តព្រៃវែង ចោទមេឃុំ និងមន្រ្តីពាក់ព័ន្ធផ្សេងទៀត ថាបានព្យាយាមកាត់ដីរដ្ឋបាលឃុំចំនួន ៣ហិកតា យកធ្វើជាកម្មសិទ្ធផ្ទាល់ខ្លួន ប៉ុន្តែត្រូវបានអាជ្ញាធរបដិសេធ និងថាជារឿងភ័ន្តច្រឡំ។
ប្រជាពលរដ្ឋរស់នៅឃុំព្រែកសំបួរ ដែលសុំមិនបញ្ចេញឈ្មោះ បានអះអាងនៅថ្ងៃចន្ទនេះថា ដីរដ្ឋបាលឃុំព្រែកសំបួរចំនួន ៣ហិកតា ត្រូវបានមន្រ្តីដែលមកពីគណបក្សប្រជាជនកម្ពុជា រួមមានអតីតអភិបាលស្រុកពាមជរ លោក សេង ធា អតីតមេឃុំព្រែកសំបួរលោកស៊ុន យ៉ឹម មេឃុំស្ដីទីព្រែកសំបួរ លោក កយ សុផល ស្មៀនឃុំ និងមន្រ្តីសូរិយោដីជាដើម បានលួចកាត់ដីចែកគ្នាជា ៩ចំណែក កាលពីឆ្នាំ២០២១មកម្លេះ ប៉ុន្តែរឿងនេះទើបតែមានការបែកធ្លាយឯកសារ កាលពីចុងខែតុលា ឆ្នាំ២០២២នេះ។
លោកថា៖ «យើងដឹងព័ត៌មានសំងាត់ពីមន្រ្តីគេដែរ ខាងហ្នឹងគេចែកគ្នាអ៊ីចឹងបានបែកធ្លាយមក ព្រោះចំណែកហ្នឹងវាអត់គ្រប់គ្នាដែរ គប់គិតគ្នាតែមួយក្រុម»។
លោកបន្តថា ការពុះដីរដ្ឋចែកគ្នា ដោយយកធ្វើជាកម្មសិទ្ធិពីសំណាក់មន្រ្តីទាំងនោះ បានធ្វើឱ្យប្រជាពលរដ្ឋមិនសប្បាយចិត្ត និងផ្ទុះការតវ៉ា ទាមទារឱ្យរក្សាដីឃុំនោះទុកជាសម្បត្តិរដ្ឋវិញ។
លោកថា៖ «ក្នុងនាមគាត់ជាអ្នកដឹកនាំ មិនគួរមានគំនិតទុច្ចរិតដែលចង់បានសម្បត្តិសាធារណៈទៅដាក់ជាសម្បត្តិឯកជន និយាយទៅទង្វើវាហាក់ដូចជាចោរ គាត់មិនបានឱ្យប្រជាពលរដ្ឋដឹងណា គាត់អត់មានប្រជុំ អត់មានប្រកាសក្រុមប្រឹក្សាប្រកាសឱ្យដឹងព្រមព្រាងឯកភាពឯណា»។
តំណាងពលរដ្ឋឃុំព្រែកសំបួរ លោក សន សុង បានឱ្យដឹងដែរថា ក្រោយបែកធ្លាយឯកសារដែលមន្ត្រី និងអតីតមន្ត្រីនៅស្រុកពាមជរនេះលួចកាត់ដីរដ្ឋបាលឃុំព្រែកសំបួរ យកធ្វើកម្មសិទ្ធនេះ ប្រជាពលរដ្ឋចំនួន ១៦០នាក់ បានធ្វើញត្តិ និងផ្តិតមេដៃ ដាក់ទៅអធិការនគរបាលស្រុក ប៉ុន្តែត្រូវបានអាជ្ញាធរបញ្ជាក់ថា ករណីនេះជាការភ័ន្តច្រឡំ និងជាកំហុសរបស់មេឃុំមុន ដែលបានទទួលមរណភាពទៅហើយ។
លោកថា៖ «ពីដើមមកដីហ្នឹងជាដីរបស់សាលាឃុំ តាំងពីឆ្នាំ៧៩ ៨០[១៩៧៩-១៩៨០] មកដល់ពេលបច្ចុប្បន្ន មានមេឃុំឡើងក្រោយៗ ក៏មានគំនិតវាស់ដីសាលាឃុំហ្នឹងចែកគ្នា ហើយខ្ញុំក៏អត់ដឹងដល់ពេលយូរ គេវាស់តាំង២០២១ តែខ្ញុំទើបនឹងដឹងថ្ងៃទី២៧ ២៨ចុងខែតុលាហ្នឹង[…]ដល់ឥឡូវគេទើបបាញ់ប្លង់ថ្មី ហើយឥឡូវគេចោទថាពេលដែលវាស់ដីហ្នឹង លោកមេឃុំ ស៊ុន យ៉ឹម [អតីតមេឃុំព្រែកសំបួរ] គាត់នៅមេឃុំ កាលគាត់អត់ទាន់ស្លាប់ ហើយឥឡូវមេឃុំស្ដីទីគាត់អត់ទាន់ដឹង ដល់ម្សិលមិញទៅដោះស្រាយគេសុំទោស ហើយគេព្យាយាមការពារដីហ្នឹងមិនឱ្យនរណាយកឡើយ»។
វីអូឌី មិនទាន់អាចសុំការឆ្លើយតបពីមេឃុំស្ដីទីព្រែកសំបួរ លោក កយ សុផល ដែលរងការចោទប្រកាន់បានទេ នៅថ្ងៃចន្ទនេះ។
ចំណែកឯ ស្មៀនឃុំព្រែកសំបួរ លោក អោម សុគន្ធ បានឱ្យដឹងថា ករណីដែលពលរដ្ឋចោទមន្ត្រីថាមានការកាត់ដីរដ្ឋបាលឃុំចែកគ្នាធ្វើកម្មសិទ្ធិនោះ គឺជារឿងភ័ន្តច្រឡំទេ ដោយលោកថា ឈ្មោះមេឃុំ និងអ្នកផ្សេងៗទៀតនៅលើដីរដ្ឋបាលឃុំនោះ គ្រាន់តែតំណាងឱ្យរដ្ឋប៉ុណ្ណោះ។
លោកថា៖ «តាមពិតនេះ គ្រាន់តែជាដីមានឈ្មោះមេឃុំ គ្រាន់តែតំណាងដីរបស់រដ្ឋបាលឃុំ ព្រោះមេឃុំគាត់ជាតំណាងឱ្យឃុំរបស់រដ្ឋ ដល់គាត់ឃើញឈ្មោះមេឃុំឈ្មោះអ៊ីចឹងទៅ គាត់ថាមេឃុំ ក្រុមប្រឹក្សា ជំទប់រួមដៃគ្នា[លួចយកដីរដ្ឋ]»។
អ្នកសម្របសម្រួលអាដហុកប្រចាំខេត្តព្រៃវែង អ្នកស្រី អៀង គឹមលី យល់ឃើញថា ប្រសិនបើមានករណីកាត់ដីរដ្ឋបែបនេះមែន គឺជារឿងខុសច្បាប់ ព្រោះថារាល់ការលក់ ឬផ្ទេរកម្មសិទ្ធិដីរដ្ឋណាមួយ ទាមទារឱ្យមានអនុក្រឹត្យដែលចេញដោយនាយករដ្ឋមន្រ្តី តាមរយៈការធ្វើអនុបយោគជាដើម ហើយមន្រ្តីពាក់ព័ន្ធគួរតែស៊ើបអង្កេតចំពោះការលក់ដីរដ្ឋនេះផងដែរ។
អ្នកស្រីថា៖ «បើលក់មែនខុសច្បាប់ហើយ ព្រោះគាត់មានអំណាចជាងនាយករដ្ឋមន្រ្តីទៀត អ្នកដែលចេញអនុក្រឹត្យបានមានតែនាយករដ្ឋមន្រ្តីទេ ដែលចុះហត្ថលេខាលើហ្នឹង បើអត់មានអនុក្រឹត្យមានន័យថាគាត់ធំជាងទៀត គាត់ធ្វើហ្នឹងមិនគោរពតាមច្បាប់»៕
