យុវជនដែលស្រឡាញបរិស្ថានថ្លែងថា ការដាំព្រៃកោងការវានឹងជួយការពារ និងទប់ស្កាត់នៃការបម្រែបម្រួលអាកាសធាតុ ដែលពិភពលោកកំពុងតែជួបប្រទះ ខណៈដែលយុទ្ធនាការដាំព្រៃកោងកាងឡើងវិញនៅតំបន់ខ្លះដែលបាត់បង់ដោយការកាប់បំផ្លាញនេះ នៅមានកម្រិត ដែលមិនទាន់ឆ្លើយតបពីទំហំដែលបាត់បង់នៅឡើយ។
កញ្ញា ស៊ុន ស្រីណៃ ជាយុវតីម្នាក់ក្នុងចំណោមយុវជនផ្សេងទៀត រស់នៅរាជធានីភ្នំពេញ ប្រាប់វីអូឌីថា បញ្ហាអាកាសធាតុមានការប្រែប្រួលមិនឈប់ឈរពីមួយទៅមួយថ្ងៃ។ ការផ្លាស់ប្តូរដែលមិនទៀងទាត់នេះ គឺមានភាពស្មុគស្មាញក្នុងការបែងចែកឱ្យដាច់រវាងរដូវប្រាំង និងរដូវវស្សា ហើយបម្រែប្រួលអាកាសធាតុនេះ ពេលខ្លះនៅរដូវប្រាំងបែរជាមានភ្លៀងខ្យល់ព្យុះ ឬទឹកជំនន់ជាដើម។
ជាប្រធានយុវជន និងជានិច្ចជាកាលតែងកៀរគរឱ្យមានយុទ្ធនាការដាំព្រៃកោងកាង នៅតំបន់សហគមន៍ត្រពាំងសង្កែ កញ្ញា ស៊ុន ស្រីណៃ លើកឡើងថា ដោយមើលឃើញប្រធានស័ក្តិទាំងនេះហើយ ទើបជំរុញឱ្យក្រុមយុវជន បំផុសគំនិតដាំព្រៃកោងកាងឡើងវិញ ដើម្បីជួយការពារបរិស្ថានផង និងបានជាប្រយោជន៍សម្រាប់សហគមន៍ផង។
កញ្ញាបន្តថា៖«សំណូមពរមួយទៀត សុំឱកាសចូលរួមពីយុវជន សហគមន៍ អាជ្ញាធរគ្រប់មូលដ្ឋាន ក្រសួងពាក់ព័ន្ធ រួមគ្នាដាំដើមឈើឡើងវិញដោយបច្ចុប្បន្នយើងឃើញថា ដើមឈើមានការបាត់បង់ច្រើន។ អ៊ីចឹង ស្នើសុំឱ្យមានការដាំដើមឈើឡើងវិញឱ្យបានគ្រប់មជ្ឈដ្ឋានទាំងអស់ដើម្បីរក្សារស្ថិរភាពនៃការប្រែប្រួលអាកាស»។
បើតាមកញ្ញា ស៊ុន ស្រីណៃ ការបាត់បង់ព្រៃឈើ និងការបំភាយឧស្ម័នពុលពីរោងចក្រផ្សេងៗ ទៅកាន់បរិយាកាស ជាមូលហេតុដែលធ្វើឱ្យស្រទាប់អូហ្ស៊ូនស្តើងហើយនាំឱ្យមានការកើនឡើងនៃកម្តៅ និងប្រែប្រួលអាកាសធាតុ។ ប្រភពបន្តថា ដោយសារការមើលឃើញបែបនេះធ្វើឱ្យកញ្ញាបន្តខិតខំដឹកនាំយុវជនដាំដើមកោងការជារាងរាល់ឆ្នាំ ដែលយុវជនទាំងនោះមកពីបណ្ដាខេត្តផ្សេងៗរួមទាំងមកពីភ្នំពេញផងដែរ។
មិនខុសគ្នាទេ យុវជន អុន កម៉ារី ដែលរស់នៅផ្ទាល់នឹងសហគមន៍ត្រពាំងសង្កែនេះ ឱ្យដឹងថា ក្នុងនាមជាយុវជនមួយរូប គឺរូបគេមិនដែលធ្វេសប្រហែសឡើយ អំពីការការពារ និងបំផុសឱ្យពលរដ្ឋចូលរួមដាំព្រៃកោងកាងឡើងវិញនេះ។ ក្រៅពីថែទាំហើយ រូបគេក៏ជាអ្នកដែលរស់នៅផ្ទាល់ក្នុងសហគមន៍ ក៏បានរួមចំណែកក្នុងការបណ្តុះកូនព្រៃកោងកាងថ្មីៗបន្តទៀតដែរ។ ម្យ៉ាងវិញ អ្វីដែលសំខាន់ជាងនេះ គឺបានចុះផ្សព្វផ្សាយ និងអប់រំពលរដ្ឋឱ្យយល់ដឹងពីការការពារ ព្រៃកោងកាងនេះ ព្រោះវាបានផ្តល់អត្ថប្រយោជន៍ច្រើន សម្រាប់សហគមន៍។
លោកបន្តថា៖«មួយទៀតជាការរួមចំណែកពីភ្ញៀវទេសចរឬក៏ក្រុមហ៊ុន សកលវិទ្យាល័យនានាដែលគាត់ទិញដើមកោងកាងដាំជាអនុសាវរីយ៍។ អ៊ីចឹងក៏ទាមទាឱ្យយុវជនចូលរួមជាមួយដែរ។ ខ្ញុំសង្ឃឹមថាការចូលរួមចំណែករបស់យុវជនទាំងនេះជាផ្នែកនៃការចូលរួមលើកកម្ពស់បរិស្ថាន និងទប់ស្កាត់បញ្ហាផ្សេងៗដូចគ្រោះធម្មជាតិជាដើម» ។
សហគមន៍ត្រពាំងសង្កែជាសហគមន៍ អេកូរទេសចរណ៍ធម្មជាតិ ក្នុងចំណោមសហគមន៍ផ្សេងទៀត នៅក្នុងស្រុកទឹកឈូរ ខេត្តកំពត។ បច្ចុប្បន្ន សហគមន៍ត្រពាំងសង្កែនេះ មិនត្រឹមជួយផ្តល់ការងារសម្រាប់ពលរដ្ឋនៅក្នុងសហគមន៍ផ្ទាល់ និងប្រយោលដែលអាចប្រកបរបរនេសាទ ជាលក្ខណៈគ្រួសារទេ ដែននេសាទនេះ ក៏ជាផ្នែកមួយដែលជួយទាក់ទាញភ្ញៀវទេសចរណ៍ជាតិ និងអន្តរជាតិ ឱ្យមកលេងកំសាន្តជាហូរហែផងដែរ ពីមួយឆ្នាំទៅមួយឆ្នាំ។
សហគមន៍ត្រពាំងសង្កែនេះ មានទំហំផ្ទៃដី ៥១០ហិកតា។ ព្រៃកោងកាងដែលមានស្រាប់គ្រប់ដណ្តប់លើផ្ទៃដីប្រមាណ ៥៦ហិកតា ក្នុងនោះដីដាំថ្មីបានចំនួន ២៥ហិកតា។
ប្រធានសហគមន៍ត្រពាំងសង្កែ លោក ស៊ឹម ហ៊ីម ថ្លែងថា ព្រៃកោងកាងក្រៅពីបានជួយទប់ស្កាត់ការបម្រែបម្រួលអាកាសធាតុហើយ វាថែមទាំងជាជម្រកជីវៈចម្រុះ និងជាឆ្នាំងបាយរបស់ប្រជាពលរដ្ឋរស់នៅតំបន់នេះថែមទៀតផង។ មិនតែប៉ុណ្ណោះ ព្រៃកោងកាងក្នុងទំហំមួយហិកតា អាចស្រូបជាតិពុល តាមរយៈការបំពុលអាកាសធាតុបានមួយតោនជាតិពុលទៀតផង ។
បើតាមប្រធានសហគមន៍រូបនេះ តាមរយៈវិស័យទេសចរណ៍ក្នុងស្រុក គឺមួយថ្ងៃៗ សហគមន៍ទទួលបានភ្ញៀវទេសចរ មិនដែលដាច់នោះទេ ជាពិសេសចំនួនភ្ញៀវទេសចរ ដែលសង្កេតឃើញធ្វើដំណើរកម្សាន្តញឹកញាប់ និងកើនឡើងសម្រាប់សហគមន៍ត្រពាំងសង្កែគឺរដូវបុណ្យទាន។
លោកបន្តថា៖«ការចូលរួមរបស់យុជនក្នុងការដាំដើមកោងកាងគឺមានសារៈសំខាន់សម្រាប់សហគមន៍ ហើយការចូលរួមរបស់យុវជនគឺជាការងារសង្គម។ សម្រាប់ភ្ញៀវដែលមកត្រពាំងសង្កែ សម្រាប់ប្រចាំខែជាមធ្យមប្រហែលជា ៣ ០០០នាក់ ប៉ុន្តែខែណាដែលជាថ្ងៃបុណ្យគឺច្រើននៅក្នុងមួយថ្ងៃមានរហូតទៅដល់១ ០០០នាក់ ហើយបើក្នុងខែណាមានបុណ្យច្រើនគឺច្រើនសម្រាប់ភ្ញៀវប្រចាំខែ»។
ចំណែក ប្រធានកម្មវិធីផ្នែកស្រាវជ្រាវ និងតស៊ូមតិនៃសហគមន៍បណ្តាញយុវជនកម្ពុជា(CYN) លោក ហេង គឹមហុង ចាត់ទុកសកម្មភាពរបស់យុវជន ដែលចូលរួមការពារបរិស្ថាន និងបំផុសចលនាឱ្យដាំព្រៃកោងកាងឡើងវិញនេះ គឺជាផ្នែកមួយដ៏រ៉ឹងមាំសម្រាប់សហគមន៍ត្រពាំងសង្កែនេះ។
លោកបន្តថា ការរួមកម្លាំងគ្នាបែបនេះរបស់ក្រុមយុវជន ជាសារបង្ហាញឱ្យអាជ្ញាធរ និងភាគីពាក់ព័ន្ធទៀតយល់ពីតម្លៃនៃការថៃរក្សា និងការការពារព្រៃកោងកាង ឱ្យកាន់តែច្បាស់។ មួយវិញទៀត ការដែលហ៊ានប្រឈមមុខ ចំពោះគ្រោះថ្នាក់ និងការបញ្ឈប់បានពីសកម្មភាពរបស់ឈ្មួញដែលមានអំណាច ដែលទន្រ្ទានព្រៃកោងកាងធ្វើជាកម្មសិទ្ធិ វាជាការគួរឱ្យមោទនភាព និងគួរគោរពសម្រាប់ក្រុមយុវជន។
លោកបន្តថា៖«ខ្ញុំគិតថារាជរដ្ឋាភិបាលត្រូវតែពង្រឹងការអនុវត្តច្បាប់ រៀបចំប្រព័ន្ធការងារបែបម៉េចឱ្យបានល្អប្រសើរដើម្បីទប់ស្កាត់សកម្មភាពកាប់បំផ្លាញឈូសឆាយព្រៃកោងកាងនេះ ជាពិសេសអាជ្ញាធម៌គួរតែផ្តល់ជាបណ្ណសរសើរ និងលើកទឹកចិត្តបន្ថែមទៀតដល់សហគមន៍ដែលខិតខំការពារ ឬក៏មហាជនដែលគាត់ចូលរួមក្នុងកិច្ចការនេះ» ។
សម្រាប់លោក ស៊ីម ហ៊ីម ប្រធានសហគមន៍ត្រពាំងសង្កែ សង្កេតឃើញថា អ្វីដែលជាបញ្ហាប្រឈម និងការព្រួយបារម្ភរបស់សម្រាប់សហគមន៍ គឺក្រុមហ៊ុនឯកជនទទួលបានសិទ្ធិវិយោគពីរដ្ឋាភិបាលនៅតាមតំបន់ឆ្នេរសមុទ្រ ហើយបំផ្លាញព្រៃកោងកាងដែលធ្វើឱ្យប៉ះពាល់ទៅដល់ជីវៈចម្រុះនៅក្នុងសមុទ្រ។ លោកថា ការបាត់បង់នេះ នឹងធ្វើឱ្យជីវភាពរបស់ប្រជាពលរដ្ឋទាំងផ្ទាល់ និងប្រយោល ត្រូវធ្លាក់ចុះសេដ្ឋកិច្ច ហើយអ្នកខ្លះអាចនឹងបង្ខំចិត្តធ្វើចំណាកស្រុកថែមទៀតផង៕
អត្ថបទដោយ៖ កញ្ញា ឆន វិរីយ៉ា