លោកនាយករដ្ឋមន្ត្រី ហ៊ុន សែន បានប្រាប់ប្រមុខការទូតអ៊ុយក្រែនថា ជំហរកម្ពុជានៅតែប្រឆាំងចំពោះការឈ្លានពានមកលើអធិបតេយ្យ និងបូរណភាពដែនដីរបស់រដ្ឋឯករាជ្យ ហើយក៏មិនគាំទ្រដល់ការបំបែករដ្ឋ ឬការទន្ទ្រានឈ្លានពានយកទឹកដីពីប្រទេសដទៃឡើយ។
ការអះអាងនេះ ធ្វើឡើងក្នុងជំនួបផ្លូវការរវាងលោកនាយករដ្ឋមន្ត្រី ហ៊ុន សែន និងរដ្ឋមន្ត្រីការបរទេសអ៊ុយក្រែន លោក ដឹមីត្រូ គូលេបា (Dmytro Kuleba) នាវិមានសន្តិភាព នៅព្រឹកថ្ងៃទី៩ ខែវិច្ឆិកា ឆ្នាំ២០២២ ស្របពេលប្រទេសអ៊ុយក្រែងកំពុងរងការឈ្លានពាន និងបំបែករដ្ឋពីសំណាក់ប្រទេសរុស្ស៊ី។
ទំព័រហ្វេសប៊ុករបស់នាយករដ្ឋមន្រ្តីឱ្យដឹងថា ក្នុងជំនួបរវាងថ្នាក់ដឹកនាំកម្ពុជា និងរដ្ឋមន្ត្រីការបរទេសអ៊ុយក្រែននៅព្រឹកថ្ងៃពុធ លោក ហ៊ុន សែន អះអាងប្រាប់ភាគីអ៊ុយក្រែនថា កម្ពុជាធ្លាប់ឆ្លងកាត់សង្គ្រាម និងធ្លាប់ទទួលរងការឈ្លានពានផងដែរ។ លោកបន្តថា ដូច្នេះកម្ពុជាយល់ពីអារម្មណ៍របស់ប្រជាជនអ៊ុយក្រែននៅពេលបច្ចុប្បន្ន។
លោកបន្ថែមថា ជំហររបស់កម្ពុជាចំពោះសង្គ្រាមនៅអ៊ុយក្រែន គឺការប្រកាន់ភ្ជាប់ និងគោរពគោលការណ៍ដែលបានចែកក្នុងធម្មនុញ្ញអង្គការសហប្រជាជាតិ និងច្បាប់អន្តរជាតិ ព្រមទាំងប្រឆាំងចំពោះការបំបែករដ្ឋ ឬការឈ្លានពានអ៊ុយក្រែនផងដែរ។
ទំព័រហ្វេសប៊ុកនាយករដ្ឋមន្ត្រីសរសេរថា៖ «កម្ពុជាប្រឆាំងនឹងការឈ្លានពាន ប្រឆាំងការគំរាមកំហែង ឬការប្រើប្រាស់ហិង្សាមកលើអធិបតេយ្យ និងបូរណភាពដែនដីរបស់រដ្ឋឯករាជ្យនិងមិនគាំទ្រដល់ការបំបែករដ្ឋ ឬការទន្ទ្រានយកទឹកដីពីប្រទេសដទៃឡើយ»។
ប្រភពដដែលបន្តថា រដ្ឋមន្ត្រីការបរទេសប្រទេសអ៊ុយក្រែន បានអរគុណកម្ពុជា ដ្បិតកម្ពុជាធ្លាប់បានចេញសេចក្តីថ្លែងការណ៍តាមរយ:រដ្ឋមន្ត្រីការបរទេសអាស៊ាន ចំពោះការគាំទ្របង្ហាញពីកង្វល់ជុំវិញស្ថានការណ៍នៅក្នុងប្រទេសអ៊ុយក្រែន។
កង្វល់នោះ គឺកម្ពុជាបានទាមទារឱ្យបញ្ឈប់ការប្រើប្រាស់កម្លាំងប្រដាប់អាវុធជាបន្ទាន់ និងងាកមករកការចរចាដោយសន្តិវិធីវិញ។ លើសពីនេះ កម្ពុជាក៏បានធ្វើជាសហស្ថាបនិកគាំទ្រចំពោះសេចក្តីសម្រេចចិត្តរបស់មហាសន្និបាតអង្គការសហប្រជាជាតិ ដែលពាក់ព័ន្ធនឹងការឈ្លានពានមកលើអ៊ុយក្រែនពីសំណាក់ប្រទេសរុស្ស៊ីថែមទៀតផង។
តាមរយៈហ្វេសប៊ុកលោក ហ៊ុន សែន ដដែល បានស្រង់ការលើកឡើងរបស់ ប្រមុខការទូតអ៊ុយក្រែនថា សុខសន្តិភាព ស្ថិរភាព និងការអភិវឌ្ឍគ្រប់វិស័យទាំងអស់ដែលកម្ពុជាមានពេលបច្ចុប្បន្ននេះ គឺជាសេចក្តីប្រាថ្នារបស់ប្រជាជនអ៊ុយក្រែនចង់បាន។
វីអូឌីបានព្យាយាមសុំការឆ្លើយតបបន្ថែមពីអ្នកនាំពាក្យក្រសួងការបរទេសកម្ពុជា លោក ជុំ សន្ទរី នៅថ្ងៃ៩ ខែវិច្ឆិកា ជាច្រើនសារ ប៉ុន្តែមិនអាចទាក់ទងបាន។
អ្នកជំនាញផ្នែកវិទ្យាសាស្ត្រនយោបាយលោក ឯម សុវណ្ណរ៉ា បានលើកឡើងថា ការមកបំពេញទស្សនកិច្ចរបស់រដ្ឋមន្ត្រីការបរទេសអ៊ុយក្រែនជាសញ្ញាវិជ្ជមានមួយ ក្នុងនាមកម្ពុជាជាប្រធានអាស៊ាន។
លោក សុវណ្ណរ៉ា បន្ថែមថា ក្នុងកិច្ចប្រជុំកំពូលអាស៊ានខាងមុខនេះ អាចនឹងមិនមានកិច្ចពិភាក្សាអំពីវិបត្តិនៅអ៊ុយក្រែននោះទេ តែអាចមានការពិភាក្សាអំពីកិច្ចព្រមព្រៀងលើដៃគូសហប្រតិបត្តិការ និងមិត្តភាពរវាងអ៊ុយក្រែនជាមួយអាស៊ាន។
លោកបន្តថា៖«អ៊ីចឹងវាជាចំណុចវិជ្ជមានមិនជាអ្វីទេ ហើយកន្លងមកកម្ពុជាឈរលើទស្សនច្បាប់អន្តរជាតិបានផ្ដួចផ្ដើមជាសហស្ថាបនិកក្នុងការចេញសេចក្ដីសម្រេចអង្គការសហប្រជាជាតិពីរលើក និងសហស្ថានិកក្នុងការថ្កោលទោសរុស្ស៉ីដែលចូលទៅកាត់ទឹកដីរបស់អ៊ុយ ក្រែនចូលទៅក្នុងសហព័ន្ធរុស្សីជាដើម»។
ក្រសួងការបរទេសកម្ពុជាកាលពីថ្ងៃទី១ ខែវិច្ឆិកា ឆ្នាំ២០២២ បានចេញសេចក្តីប្រកាសព័ត៌មានមួយជុំវិញលទ្ធផលនៃកិច្ចសន្ទនាតាមខ្សែទូរសព្ទរវាងលោកនាយករដ្ឋមន្ត្រី ហ៊ុន សែន ជាមួយប្រធានាធិបតីអ៊ុយក្រែន លោក វូឡូឌីម៉ែ ហ្សេឡិនស្គី (Volodymyr Zelenskyy) នៅថ្ងៃដដែលនោះ។
តាមរយៈកិច្ចសន្ទនានោះ លោក ហ៊ុន សែន បានបង្ហាញការសោកស្តាយដែលប្រទេសអ៊ុយក្រែនរងការវាយប្រហារពីសំណាក់ប្រទេសរុស្ស៊ី លើទីក្រុងកៀវ និងទីក្រុងផ្សេងៗទៀត បណ្តាលឱ្យបាត់បង់អាយុជីវិត និងរបួសជាច្រើន ព្រមទាំងខូចខាតហេដ្ឋានរចនាសម្ព័ន្ធ ដាច់ចរន្តអគ្គិសនី និងបំផ្លាញប្រព័ន្ធទឹកស្អាតយ៉ាងធ្ងន់ធ្ងរ។ បន្ថែមពីនេះ បណ្តាលឱ្យមានវិបត្តិថាមពល និងស្បៀងអាហារធ្ងន់ធ្ងរ រួមទាំងអតិផរណាកើនឡើងលើពិភពលោកថែមទៀតផង។
ប្រទេសរុស្ស៊ី បានចាប់ផ្តើមឈ្លានពានប្រទេសអ៊ុយក្រែនដោយកម្លាំងយោធា ដែលរុស្ស៊ីហៅថា ជាប្រតិបត្តិការយោធាពិសេស កាលពីខែកុម្ភៈ ឆ្នាំ២០២២៕
