នាយករដ្ឋមន្រ្ដីនៃសាធារណរដ្ឋប្រជាមានិតចិន លោក លី ខឺឈាង បានមកដល់កម្ពុជាហើយ កាលពីយប់ថ្ងៃទី៨ ខែវិច្ឆិកា ឆ្នាំ២០២២ ដើម្បីបំពេញទស្សនកិច្ចផ្លូវការ អំឡុងពេលនៃដំណើរការរៀបចំកិច្ចប្រជុំកំពូលអាស៊ានចាប់ផ្តើម។
បើតាមក្រសួងការបរទេសកម្ពុជាឱ្យដឹងថា កិច្ចប្រជុំកំពូលអាស៊ានលើកទី៤០ និង៤១ ព្រមទាំងកិច្ចប្រជុំពាក់ព័ន្ធ ដែលកម្ពុជាធ្វើជាម្ចាស់ផ្ទះ ត្រូវបានរៀបចំឡើងនៅរាជធានីភ្នំពេញ មានរយៈពេល ៦ថ្ងៃ ពោលគឺគិតចាប់ពីថ្ងៃទី៨ ដល់ថ្ងៃទី១៣ ខែវិច្ឆិកា ឆ្នាំ២០២២។
ទំព័រហ្វេសប៊ុកផ្លូវការរបស់ក្រសួងការបរទេសកម្ពុជានៅថ្ងៃទី៩ ខែវិច្ឆិកា បានឱ្យដឹងថា នាយករដ្ឋមន្រ្ដីនៃសាធារណរដ្ឋប្រជាមានិតចិន លោក លី ខឺឈាង និងភរិយា បានអញ្ជើញមកដល់ប្រទេសកម្ពុជាកាលពីយប់មិញ ដើម្បីបំពេញទស្សនកិច្ចផ្លូវការនៅកម្ពុជា។
ក្រសួងការបរទេសកម្ពុជាសរសេរថា៖ «នៅយប់ថ្ងៃទី០៨ ខែវិច្ឆិកា ឆ្នាំ២០២២ ឯកឧត្តម លី ខឺឈាង នាយករដ្ឋមន្រ្ដីនៃសាធារណរដ្ឋប្រជាមានិតចិន និងលោកជំទាវ បានអញ្ជើញមកដល់ព្រលានយន្តហោះអន្តរជាតិភ្នំពេញដោយសុវត្ថិភាព ដើម្បីចាប់ផ្ដើមទស្សនកិច្ចផ្លូវការ នៅព្រះរាជាណាចក្រកម្ពុជា»។
សេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិកម្ពុជា កាលពីថ្ងៃទី៥ ខែវិច្ឆិកា បានលើកឡើងថា នាយករដ្ឋមន្រ្ដីចិន លោក លី ខឺឈាង មកបំពេញទស្សនកិច្ចនៅកម្ពុជាពីថ្ងៃទី៨ ដល់ថ្ងៃទី១១ ខែវិច្ឆិកា ឆ្នាំ២០២២ ដើម្បីជួបជាមួយលោកនាយករដ្ឋមន្រ្តី ហ៊ុន សែន ក្នុងកិច្ចសហប្រតិបត្តិការជាដៃគូគ្រប់ជ្រុងជ្រោយ។
ប្រភពដដែលបន្ថែមថា ក្រោយជំនួបជាមួយលោក ហ៊ុន សែន នាយករដ្ឋមន្រ្ដីចិននឹងចូលរួមដាក់កម្រងផ្កាគោរពព្រះវិញាណក្ខន្ធព្រះបាទ នរោត្តម សីហនុ ព្រះបរមរតនកោដ្ឋ និងបន្តទស្សនកិច្ចនៅខេត្តសៀមរាប ដើម្បីចូលរួមពិធីស្ថាបនាឡើងវិញនូវប្រាសាទតាកែវផងដែរ៕
