តំណាងពលរដ្ឋជាង២០០គ្រួសារ នៅភូមិស្នាសង្គ្រាម ស្រុកប្រាសាទបាគង ខេត្តសៀមរាប រំពឹងថា អាជ្ញាធរនឹងជួយដោះស្រាយបញ្ហាដីធ្លីរបស់ពួកគាត់ដែលអូសបន្លាយជិត២០ឆ្នាំឱ្យដាច់ស្រេច ក្រោយបុណ្យអុំទូកចប់ ស្របពេលពួកគេកំពុងប្រឈមកង្វះដីធ្លីសម្រាប់បង្កបង្កើនផល។
ក្តីរំពឹងនេះ ធ្វើឡើងក្រោយពលរដ្ឋជាង ១០០នាក់ដែលអះអាងថាតំណាងឱ្យពលរដ្ឋ២១០គ្រួសារ លើទំហំដី ១៦០ហិកតា នៅស្រុកប្រាសាទបាគង ខេត្តសៀមរាប បានលើកគ្នាមកតវ៉ាម្តងហើយម្តងទៀតនៅមុខសាលាស្រុក សាលាខេត្ត ដើម្បីទាមទារសំណងដីធ្លីសមរម្យតាមតម្លៃទីផ្សារពាក់ព័ន្ធបញ្ហាដីធ្លីរ៉ាំរ៉ៃ ដែលអាជ្ញាធរអប្សរាបានដកហូតយកតាំងពីឆ្នាំ២០០៥។
ពលរដ្ឋរស់នៅភូមិស្នាសង្គ្រាម ឃុំបល្ល័ង្គ ស្រុកប្រាសាទបាគង ខេត្តសៀមរាប លោក សំ មុំ ប្រាប់ VOD នៅថ្ងៃពុធថា អភិបាលរងស្រុកប្រាសាទបាគងបានសន្យាជាមួយពលរដ្ឋថា អាជ្ញាធរនឹងចុះមកដោះស្រាយបញ្ហាដីធ្លីនេះជូនអ្នកភូមិដោយតម្លាភាព ក្រោយចប់ពិធីបុណ្យអុំទូក។ លោកបន្តថា ការសន្យារបស់អាជ្ញាធរនេះបានធ្វើឡើង នៅពេលអ្នកភូមិបានលើកគ្នាទៅសួរនាំដល់សាលាស្រុកកាលពីថ្ងៃទី ៣ ខែវិច្ឆិកា។
យ៉ាងណា ពលរដ្ឋនៅខេត្តសៀមរាបរូបនេះថា អ្នកភូមិកំពុងទន្ទឹមរង់ចាំដំណោះស្រាយឱ្យដាច់ស្រេច ដើម្បីលៃលកដីធ្វើស្រែចម្ការចិញ្ចឹមជីវិត ព្រោះជីវភាពរបស់ពួកគាត់ពឹងផ្អែកស្ទើរទាំងស្រុងលើរបរកសិកម្ម ស្របពេលតម្រុយដំណោះស្រាយនៅមិនទាន់លេចជារូបរាង។
លោកថា៖ «ខ្ញុំសង្ឃឹម ៣០% [ថាអាជ្ញាធរនឹងជួយដោះស្រាយក្រោយបុណ្យអុំទូក] បើសង្ឃឹម៥០%ទៅ ក្រែងវាមិនបាន។ ពលរដ្ឋមានតែការដាក់ពាក្យស្នើសុំគាត់រហូតដើម្បីឱ្យគាត់ជួយដោះស្រាយដីពលរដ្ឋ។ ពលរដ្ឋមិនមានដីសម្រាប់ធ្វើស្រែធ្វើចម្ការដើម្បីចិញ្ចឹមគ្រួសារទេ បើគិតទៅគាត់មានតែបាតផ្ទះ និងភូមិបន្តិចទេ»។
ចាប់តាំងពីពាក់កណ្តាលឆ្នាំ២០២២មក ប្រជាពលរដ្ឋរាប់សិបនាក់ រស់នៅភូមិស្នាសង្គ្រាម ឃុំបល្ល័ង្ក ស្រុកប្រាសាទបាគង ដែលមានដីអាស្រ័យផលនៅភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី បាននាំគ្នាដាក់ញត្តិ និងតវ៉ាជាបន្តបន្ទាប់នៅតាមស្ថាប័នរដ្ឋមួយចំនួនក្នុងខេត្តសៀមរាប ដើម្បីទាមទាររកដំណោះស្រាយ។
បើតាមអ្នកភូមិ ពួកគាត់ចំនួន២១០គ្រួសារ ត្រូវបានអាជ្ញាធរជាតិអប្សរាដាក់បង្គោលហ៊ុំព័ទ្ធយកដីស្រែអស់ ១៦០ហិកតា កាលពីឆ្នាំ២០០៥ ដោយសន្យាផ្តល់សំណងចន្លោះពី៥០០ដុល្លារ ទៅ៧០០ដុល្លារក្នុង១ហិកតា ប៉ុន្តែរហូតមកដល់ចុងឆ្នាំ២០២២នេះ ស្ថាប័នមួយនេះមិនទាន់ផ្តល់សំណងជូនពលរដ្ឋនៅឡើយ ដែលធ្វើឱ្យពួកគាត់កើតទុក្ខមិនសុខចិត្ត ហើយបន្តតវ៉ាម្តងហើយម្តងទៀត៕
