កូដករក្រុមហ៊ុនណាហ្គាវើលដ៍ នៅថ្ងៃសៅរ៍ទី១២ ខែវិច្ឆិកា បានអំពាវនាវដល់ប្រធានាធិបតីសហរដ្ឋអាមេរិក លោក ចូ បៃដិន ជួយជំរុញទៅរាជរដ្ឋាភិបាលកម្ពុជាឱ្យដោះស្រាយវិវាទការងារនៅក្រុមហ៊ុនល្បែងមួយនេះ និងគោរពសិទ្ធិបញ្ចេញមតិ សិទ្ធិមនុស្ស ព្រមទាំងបញ្ឈប់ការប្រើប្រាស់អំពើហិង្សាទៅលើក្រុមអ្នកតវ៉ាដោយសន្តិវិធី។
ការអំពាវនាវនេះ បានធ្វើឡើងស្របពេលប្រធានាធិបតីសហរដ្ឋអាមេរិក លោក ចូ បៃដិន បានមកដល់កម្ពុជាហើយនៅព្រឹកថ្ងៃទី១២ ខែវិច្ឆិកា ដើម្បីចូលរួមកិច្ចប្រជុំកំពូលអាស៊ាន-អាមេរិកនៅរាជធានីភ្នំពេញ ដែលកម្ពុជាធ្វើជាម្ចាស់ផ្ទះ។
ការធ្វើកូដកម្មដោយអហិង្សានៅថ្ងៃទី១២ ខែវិច្ឆិកា នៅខាងមុខក្រុមហ៊ុនណាហ្គាវើលដ៍២ របស់កូដករណាហ្គាវើលដ៍ជិត១០០នាក់បានស្លៀកសម្លៀកបំពាក់ឯកសណ្ឋានបុគ្គលិក និងមានការកាន់បដាក្នុងខ្លឹមសារទាមទារឱ្យមានដំណោះស្រាយវិវាទការងារ និងគោរពសិទ្ធិការងារ ជាដើម។
កូដករណាហ្គាវើលដ៍កញ្ញា ផាត ចាន់ណា អាយុ៣០ឆ្នាំ បានឱ្យដឹងថា ក្រុមហ៊ុនណាហ្គាវើលដ៍ បានបញ្ឈប់ថ្នាក់ដឹកនាំសហជីពប្រចាំក្រុមហ៊ុន និងបុគ្គលិកដោយអយុត្តិធម៌ ហើយការដោះស្រាយនោះទៀតសោតក៏នៅពុំទាន់មានតម្លាភាព និងយុត្តិធម៌សម្រាប់ពួកគាត់នៅឡើយ។
ស្របពេលដែលប្រធានាធិបតីសហរដ្ឋអាមេរិក លោក ចូ បៃដិន មកជួបមេដឹកនាំកម្ពុជា និងអាស៊ានផង កូដករណាហ្គាវើលដ៍រូបនេះ ស្នើដល់មេដឹកនាំប្រទេសប្រជាធិបតេយ្យរូបនេះឱ្យជួយដោះស្រាយបញ្ហាសិទ្ធិមនុស្សនៅកម្ពុជា ជាពិសេសកូដករណាហ្គាវើលដ៍ ដែលកំពុងរងភាពអយុត្តិធម៌។
កញ្ញាបន្តថា៖«ខ្ញុំសូមសំណូមពរដល់គាត់។ លោក ចូ បៃដិន គាត់ជាប្រធានាធិបតីធំក្នុងប្រទេសសេរីឱ្យជួយមើលដល់សិទ្ធិសេរីភាពនៅក្នុងប្រទេសកម្ពុជាផង ដែលជាក់ស្ដែងមិនមែនតែក្រុមកូដករណាហ្គាវើលដ៍ដែលជួបរឿងអយុត្តិធម៌ និងរំលោភសិទ្ធិមនុស្សគឺទូទាំងផ្ទៃប្រទេសហើយ គ្រប់កន្លែង មិនថាដីធ្លី មិនថាអ្វីៗ»។
ចំណែកកូដករណាហ្គាវើលដ៍ដែលមិនមានឈ្មោះកាត់ពីការបញ្ឈប់ពីការងារ អ្នកស្រី ប៊ន ស៊ីណា អាយុ៣៧ឆ្នាំ បានឱ្យដឹងថា ខាងសាលារាជធានីភ្នំពេញចេញលិខិតនាពេលកន្លងទៅមិនឱ្យបុគ្គលិកណាហ្គាវើលដ៍មិនពួកគេធ្វើកូដកម្មអំឡុងពេលកិច្ចប្រជុំកំពូលអាស៊ាននេះគឺជាចេតនាគំរាមកំហែង និងមិនមានចេតនាក្នុងការដោះស្រាយបញ្ចប់វិវាទការងារនោះទេ។
អ្នកស្រីបន្ថែមថា មូលហេតុដែលកូដករណាហ្គាវើលដ៍បន្តធ្វើកូដកម្មតស៊ូមតិនៅថ្ងៃនេះក្នុងគោលបំណងស្នើមេដឹកនាំបណ្ដាប្រទេសអាស៊ាន ឬប្រធានាធិបតីសហរដ្ឋអាមេរិកជួយរកយុត្តិធម៌ដល់ពួកគេ ពិសេសឱ្យបុគ្គលិក និងសហជីពចូលធ្វើការវិញ ដ្បិតថា ប្រសិនបើមិនមានវត្តមានសហជីពនោះម្ចាស់កាស៊ីណូនឹងរំលោភលើសិទ្ធិបុគ្គលិកបន្តទៀត។
អ្នកស្រីថា៖«ខាងពួកខ្ញុំជាបុគ្គលិកនេះគ្រាន់តែទាមទារសុំឱ្យទទួលយកបុគ្គលិកដែលនៅសេសសល់មួយនាក់ជាង ព្រមទាំងប្រធាន សហជីព និងសកម្មជនទាំងអស់ហ្នឹងចូលធ្វើការវិញជាចំណុចសំខាន់ដែលពួកយើងចង់បាន ចំណុចផ្សេងៗទៀតយើងអាចដោះស្រាយគ្នាបាន»។
វីអូឌី នៅមិនទាន់សុំការអត្ថាធិប្បាយជុំវិញករណីនេះពីអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានទេ នៅថ្ងៃសៅរ៍នេះ។
អភិបាលរងរាជធានីភ្នំពេញ លោក កើត ឆែ មានប្រសាសន៍ថា លោកមិនដឹងថាគោលបំណងនៃការទាមទារ ឬស្នើសុំរបស់កូដករណាហ្គាវើលដ៍អំពីអ្វីនោះទេ តែពួកគេដែលបន្តចេញធ្វើកូដកម្មក្នុងថ្ងៃនេះនឹងប្រឈមជាមួយផ្លូវច្បាប់ដូចដែលសេចក្ដីជូនដំណឹងរបស់សាលារាជធានីភ្នំពេញបានចេញកាលពីពេលកន្លងទៅ។
លោកបន្តថា៖«អូនឯងមើលលិខិតហ្នឹងគេសរសេរថាម៉េច? ថាបើគាត់ធ្វើទៀតហ្នឹងនឹងទទួលខុសត្រូវចំពោះមុខច្បាប់ លិខិតហ្នឹងសរសេរគ្រប់គ្រាន់ហើយតើ»។
នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា អ្នកស្រី ចក់ សុភាព បានលើកឡើងថា វិវាទការងាររវាងក្រុមហ៊ុនណាហ្គាវើលដ៍ បានអូសបន្លាយជាងមួយឆ្នាំមិនទាន់មានដំណោះស្រាយនៅឡើយ។ តែផ្ទុយទៅវិញកូដករណាហ្គាវើលដ៍ បែរជាត្រូវរងអំពើហិង្សា ចាប់ខ្លួន ឃាត់ខ្លួនពីសំណាក់ពីអាជ្ញាធរទៅវិញដោយគ្រាន់តែពួកគេធ្វើកូដកម្មដោយសន្តិវិធី។
អ្នកស្រីបន្ថែមថា មូលហេតុដែលកូដករស្នើទៅមេដឹកនាំប្រទេសផ្សេងៗឱ្យជួយរកដំណោះស្រាយជូនពួកគេនោះ ដោយសារតែក្រសួងពាក់ព័ន្ធមិនបានរកដំណោះស្រាយសមស្របជូនពួកគេនោះឡើយទេ។
អ្នកស្រីបន្តថា៖«ជាធម្មតាទេនៅពេលដែលមិនអាចទទួលដំណោះស្រាយពីអាជ្ញាធរមានសមត្ថកិច្ចនៅប្រទេសយើងហ្នឹង ជាធម្មតាពួកគាត់ព្យាយាមស្វែងរកកិច្ចអន្តរាគមន៍ពីអន្តរជាតិផ្សេងៗ»។
អ្នកស្រីបន្ថែមថា៖«គឺជាជំនួបកំពូលពីអាស៊ានហ្នឹងថ្នាក់ដឹកនាំសំខាន់ទាំងប្រធានាធិបតី ចូ បៃដិន ហ្នឹងគាត់បានអញ្ជើញមក។ ចង់មិនចង់គាត់អំពាវនាវដល់ថ្នាក់ដឹកនាំទាំងអស់ហ្នឹងដើម្បីមានឱកាសជួបជាមួយក្នុងការពាំនាំបញ្ហាទាំងអស់ហ្នឹងដើម្បីឱ្យពួកគាត់ទទួលបានដំណោះស្រាយ»។
វិវាទការងារក្រុមហ៊ុនណាហ្គាវើលដ៍បានកើតឡើងជាង១ឆ្នាំមកហើយ ក្រោយពេលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា «ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩»។ យ៉ាងណា បុគ្គលិកដែលចេញធ្វើកូដកម្មរយៈពេល១០ខែមកនេះ អះអាងថា ការបញ្ឈប់នោះដោយសារថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ៕