លោកនាយករដ្ឋមន្ត្រី ហ៊ុន សែន និងជាប្រធានអាស៊ានប្តូរវេននៅឆ្នាំ២០២២ បានប្រគល់ញញួរប្រធានអាស៊ានប្តូរវេនទៅប្រធានាធិបតីឥណ្ឌូនេស៊ីសម្រាប់តំណែងជាប្រធានអាស៊ានបន្តពីកម្ពុជានៅឆ្នាំ២០២៣ ខាងមុខនេះ។
នៅមុនបិទបញ្ចប់កិច្ចប្រជុំកំពូលអាស៊ាន លើកទី៤០ និង៤១ និងកិច្ចប្រជុំពាក់ព័ន្ធ ដែលកម្ពុជារៀបចំធ្វើជាម្ចាស់ផ្ទះ នៅរសៀល ថ្ងៃទី១៣ ខែវិច្ឆិកា ឆ្នាំ២០២២ លោក ហ៊ុន សែន បានប្រគល់ញញួរប្រធានអាស៊ាន ជូនដល់ ប្រធានាធិបតីឥណ្ឌូនេស៊ីលោក ចូកូ វីដូដូ ។
ឥណ្ឌូនេស៊ី ដែលជាប្រទេសសហស្ថាបនិកអាស៊ានមួយក្នុងចំណោមប្រទេសចំនួន៥ បានក្លាយទៅជាប្រធានអាស៊ានប្តូរវេន ជាថ្មី បន្តពីប្រទេសកម្ពុជា នៅឆ្នាំ២០២៣ ខាងមុខនេះ។
ក្នុងសន្ទរកថាបិទបញ្ចប់កិច្ចប្រជុំកំពូលអាស៊ានលើកទី៤០,៤១ និងកិច្ចប្រជុំពាក់ព័ន្ធនៅថ្ងៃទី១៣ ខែវិច្ឆិកា ឆ្នាំ២០២២ ប្រធានអាស៊ានជិតផុតអាណត្តិលោកនាយករដ្ឋមន្ត្រី ហ៊ុន សែន លើកឡើងថា រយៈពេល១ឆ្នាំហើយដែលលោកបានទទួលតំណែងជាប្រធានអាស៊ានប្តូរវេនបន្តពីព្រះចៅស៊ុលតង់ ហាជី ហាល់សាណាល់ ប៊ុលគីយ៉ា នៃប្រទេសប្រ៊ុយណេ ដារ៉ូសាឡឹម កាលពីថ្ងៃទី ២៨ ខែតុលា ឆ្នាំ២០២១។
ក្នុងរយៈពេល ១ឆ្នាំមកនេះ លោក ហ៊ុន សែន លើកឡើងថា ជាពេលវេលាពោលពេញទៅដោយអនុស្សាវរីយ៍ និងប្រវត្តិសាស្ត្រសម្រាប់លោក និងកម្ពុជា ដែលមានកិត្តិយសដ៏ខ្ពង់ខ្ពស់ទទួលបានតំណែងជាប្រធានប្តូរវេនរបស់អាស៊ាន។
លោកបន្តថា ខណៈដែលអាស៊ានបាននិងកំពុងខិតខំស្តារឡើងវិញពីផលប៉ះពាល់នៃជំងឺកូវីដ-១៩ និងដោះស្រាយវិបត្តិនៅប្រទេសមីយ៉ាន់ម៉ានោះ ស្ថានភាពមិនបានរំពឹងទុកក៏បានកើតឡើង ដែលប៉ះពាល់ធ្ងន់ធ្ងរដល់សេដ្ឋកិច្ច សង្គម និងសន្តិសុខ។ ទោះបីជាយ៉ាងនេះក្តី អាស៊ានបានគ្រប់គ្រងនិងសម្របសម្រួលលើបញ្ហាប្រឈមទាំងនោះ រហូតទទួលបានលទ្ធផលជាច្រើនគួរជាទីគាត់ចិត្ត។
សន្ទរកថា លោក ហ៊ុន សែន បន្តថា៖ «រយៈពេល៤ថ្ងៃមកនេះ យើងសម្រេចបាននូវកិច្ចសន្ទនាគ្រប់ជ្រុងជ្រោយ និងប្រកបដោយផ្លែផ្កាលើកិច្ចការបន្តទៅមុខ ដើម្បីពង្រឹងមជ្ឈភាពអាស៊ាន និងគុណតម្លៃរបស់យើង ជាមួយទំនាក់ទំនងជាមួយដៃគូខាងក្រៅ ជាពិសេសនៅពេលដែលសកលលោក កំពុងជួបប្រទះនឹងបញ្ហាស្មុគស្មាញក្នុងតំបន់ និងជាអន្តរជាតិ ដែលប្រែប្រួលយ៉ាងឆាប់រហ័ស»។
លោកនាយករដ្ឋមន្ត្រីសង្កត់ថា មជ្ឈភាពអាស៊ាន គឺជាកម្លាំងចលករចម្បងសម្រាប់កិច្ចសន្ទនា និងកិច្ចសហប្រតិបត្តិការជាមួយដៃគូរខាងក្រៅ តាមរយៈយន្តការដឹកនាំដោយអាស៊ាន។ ទោះបីជាស្ថិតនៅក្នុងស្ថានភាពយ៉ាងណាក៏ដោយ លោកថា ត្រូវរក្សាឯកភាពអាស៊ានដើម្បីអត្ថប្រយោជន៍ខ្ពស់បំផុតសម្រាប់តំបន់ទាំងមូល។
កម្ពុជាក្នុងនាមប្រធានអាស៊ានប្តូរវេនចាស់រូបនេះ សង្ឃឹមថា ឥណ្ឌូនេស៊ី ដែលក្លាយជាប្រធានអាស៊ានប្តូរវេនបន្ទាប់ទៅនេះ នឹងបន្តដឹកនាំអាស៊ានដើម្បីសម្រេចបាននូវគោលបំណងចម្បង គឺសហគមន៍អាស៊ាន ប្រកបដោយសុខសន្តិភាព ភាពធន់ និងបរិយាបន្ន៕
