យ៉ាងហោចណាស់ មានមន្ត្រីសន្តិសុខពន្ធនាគារ១០នាក់ និងអ្នកទោសចំនួន៤នាក់ផ្សេងទៀតបានស្លាប់នៅក្នុងការវាយប្រហារដ៏គួរឱ្យភ្ញាក់ផ្អើលមួយនៅពន្ធនាគាររដ្ឋមួយកន្លែង តាមបណ្ដោយព្រំដែនប្រទេសម៉ិកស៊ិក ដែលបង្កឡើងដោយខ្មាន់កាំភ្លើងមួយក្រុម។ នេះបើតាមការចុះផ្សាយដោយសារព័ត៌មាន New York Post។
ក្នុងហេតុការណ៍នេះក៏មានអ្នកទោសចំនួន២៤នាក់បានរត់គេចខ្លួនចេញពីពន្ធនាគារនេះផងដែរ។
យោងតាមអាជ្ញាធររដ្ឋ Chihuahua ប្រទេសម៉ិកស៊ិក បានលើកឡើងថា ពន្ធនាគារមួយកន្លែងក្នុងទីក្រុង Ciudad Juarez ត្រូវបានរងការវាយប្រហារកាលពីព្រឹកថ្ងៃអាទិត្យ ដែលក្នុងនោះក៏បានបណ្ដាលឱ្យមនុស្ស ១៣នាក់រងរបួស បន្ថែមពីលើការស្លាប់ចំនួន១៤នាក់ផងដែរ។
ជាមួយគ្នានេះ កាសែតរបស់អាមេរិកមួយក៏បានរាយការណ៍ឱ្យដឹងដែរថា ក្រុមខ្មាន់កាំភ្លើងនៅក្នុងរថយន្តដែលបំពាក់ដោយប្រព័ន្ធការពារគ្រាប់កាំភ្លើង បានទៅដល់ទីតាំងពន្ធនាគារ Cereso No. 3 នៅវេលាម៉ោងប្រមាណជា៧ព្រឹក ហើយក៏បានចាប់ការផ្តើមបាញ់ប្រហារ។
ទោះជាយ៉ាងណា ទាហានម៉ិកស៊ិក និងសមត្ថកិច្ចនៅក្នុងតំបន់ កាលពីថ្ងៃអាទិត្យម្សិលមិញ អាចគ្រប់គ្រងស្ថានការណ៍នៅទីតាំងពន្ធនាគារនោះវិញបាន ប៉ុន្តែបន្ទាប់ពីអ្នកទោសជាង២០នាក់បានរត់គេចខ្លួនចេញអស់ទៅហើយ។
ទាក់ទិននឹងករណីនេះ អាជ្ញាធរប្រចាំរដ្ឋ Chihuahua បានបន្ថែមថា មន្ត្រីរបស់ខ្លួនកំពុងតែស៊ើបអង្កេតលើឧប្បត្តិហេតុដ៏សាហាវនេះ។
គួរបញ្ជាក់ថា អំពើហិង្សា គឺតែងតែកើតឡើងញឹកញាប់នៅតាមពន្ធនាគារទាំងឡាយក្នុងប្រទេសម៉ិកស៊ិក ខណៈកាលពីខែសីហាកន្លងទៅ កុបកម្មមួយក៏បានផ្ទុះឡើងនៅក្នុងពន្ធនាគារមួយនេះផងដែរ ដែលក្នុងនោះបានបណ្ដាលឱ្យមនុស្ស១១នាក់ស្លាប់៕