ក្រសួងការបរទេសអាមេរិក បានអំពាវនាវឲ្យរដ្ឋាភិបាលកម្ពុជាចៀសវាង រាល់ការគំរាមកំហែងផ្នែកនយោបាយ ខណៈយុទ្ធនាការឃោសនា រកសំឡេងឆ្នោតកំពុងប្រព្រឹត្តទៅរហូតដល់ថ្ងៃបោះឆ្នោតឃុំសង្កាត់។
យោងតាមការចុះផ្សាយរបស់សារព័ត៌មានអន្ដរជាតិ AP កាលពីថ្ងៃទី១៩ឧសភាកន្លងទៅ ឲ្យដឹងថា រដ្ឋ មន្ដ្រីក្រសួងការបរទេសអាមេរិកទទួលបន្ទុកកិច្ចការប្រចាំតំបន់អាស៊ីបូព៌ា និងប៉ាស៊ីហ្វិកលោកស្រី Alicia Edwards មានប្រសាសន៍ថា សហរដ្ឋអាមេរិកទទូចឲ្យរដ្ឋាភិបាលរបស់លោកនាយករដ្ឋមន្ដ្រី ហ៊ុន សែន ធ្វើយ៉ាងណាធានាឲ្យបាននូវសិទ្ធិនយោបាយ ដោយចៀងវាងការគំរាមកំហែង បំភិតបំភ័យ និង ត្រូវគោរព សិទ្ធិបញ្ចេញមតិរបស់ពលរដ្ឋកម្ពុជាទាំងអស់ ខណៈការបោះឆ្នោតឃុំសង្កាត់កំពុងខិតចូលមកដល់។
វីអូឌីមិនអាចទាក់ទងអ្នកនាំពាក្យគណបក្សប្រជាជនណាម្នាក់ដើម្បីឆ្លើយតបទៅនឹងការលើកឡើងនេះទេ ខណៈដែលលោកឈឹម ផវរុណ ថាលោកមិនធ្វើអត្ថាធិប្បាយនោះទេ ដោយថាវីអូឌីបានមិនចាក់ផ្សាយសំឡេងគាត់ដែលបានសម្ភាសន៍។
លោកថា៖ «ទេបងអត់មានបដិសេធទេ អាហ្នឹងប្អូនឯងភូតបាត់ទៅហើយ។ ប្អូនឯងនិយាយថាដោយសារតែវិទ្យុវីអូឌីសម្ភាសន៍គាត់អត់យកទៅផ្សាយបានជាគាត់មិនដឹងថាផ្តល់បទសម្ភាសន៍មិចទៀតបើគាត់សម្ភាសន៍ហើយអត់យកទៅផ្សាយតែប៉ុហ្នឹង។ រឿងរបស់បងអត់បដិសេធទេ ប៉ុន្តែសម្ភាសន៍ហើយអត់យកទៅផ្សាយតើសម្ភាសន៍ហើយយកធ្វើអី? ប្អូនឯងយកទៅចុះផ្សាយហ្នឹងទៅ តែបើភូតប្អូនឯងអត់សុចរិតហើយណា»។
សាស្ត្រាចារ្យវិទ្យាសាស្ត្រនយោបាយលោក សូ ចន្ថា យល់ថា ការលើកឡើងរបស់សហរដ្ឋអាមេរិកនេះ ដោយសារតែប្រទេសនេះបានមើលឃើញនូវសារគំរាមកំហែងជាច្រើនរបស់បក្សកាន់អំណាច ដែលអាចធ្វើឲ្យមានឥទ្ធិពលដល់ការសម្រេចចិត្តរបស់ពលរដ្ឋក្នុងពេលបោះឆ្នោតខាងមុខ។ លោកបន្ថែមថា ការបារម្ភរបស់សហរដ្ឋអាមេរិកនេះក៏អាចមានឥទ្ធិពលទៅលើរដ្ឋាភិបាលកម្ពុជាផងដែរ។
លោកថា៖ «តិចឬច្រើនវាមានឥទ្ធិពលដោយសារតែយើងឃើញថារាល់ការបោះឆ្នោតនៅប្រទេសណាក៏ដោយយើងចង់បានភាពស្របច្បាប់នៅលើឆាកអន្តរជាតិនោះ អញ្ចឹងកម្ពុជាយើងដូចគ្នាយើងបានអញ្ចើញសហភាពអឺរ៉ុប និងប្រទេសផ្សេងៗ មកសង្កេតការណ៍ដើម្បីអី? គឺដើម្បីភាពស្របច្បាប់នាការបោះឆ្នោតនាពេលខាងមុខនោះ អញ្ចឹងយើងឃើញថាដើម្បីឲ្យការបោះឆ្នោតនៅកម្ពុជាដើម្បីឲ្យអន្តរជាតិគេទទួលស្គាល់ គឺត្រូវគោរពស្តង់ដារប្រជាធិបតេយ្យដែលមាននៅលើពិភពលោកផងដែរ»។
ការអំពាវនាវរបស់មន្ដ្រីការទូតអាមេរិកនេះ ធ្វើឡើងបន្ទាប់ពីលោកនាយករដ្ឋមន្ដ្រី ហ៊ុន សែន បានថ្លែងសារគំរាមដដែលៗថា បើគណបក្សប្រជាជនចាញ់ឆ្នោតនោះ កម្ពុជាអាចនឹងផ្ទុះសង្គ្រាម។ បន្ថែមលើសនេះ កាលពីថ្ងៃទី១៤ឧសភា រដ្ឋមន្ដ្រីក្រសួងការពារជាតិកម្ពុជា លោក ទៀ បាញ់ ក៏បានគំរាមជាសាធារណៈដោយថាលោកនឹង «វាយបាក់ធ្មេញ» ចំពោះជនណាហ៊ានចេញមុខតវ៉ាលទ្ធផលបោះឆ្នោត។
សូមជំរាបថា បើតាមប្រតិទិនរបស់ គ.ជ.ប យុទ្ធនាការឃោសនារកសំឡេងឆ្នោត គឺប្រព្រឹត្តទៅចាប់ ពីថ្ងៃទី២០ខែឧសភា ដល់ថ្ងៃទី២មិថុនាឆ្នាំ២០១៧។ ចំណែកការ បោះឆ្នោតក្រុម ប្រឹក្សាឃុំសង្កាត់អាណត្តិទី៤ នឹងធ្វើឡើងចំថ្ងៃទី៤ ខែមិថុនា ឆ្នាំ២០១៧៕
