គណបក្សនយោបាយចំនួន៣បានមកចុះបញ្ជីឈរឈ្មោះបោះឆ្នោតនិងបញ្ជីបេក្ខជនឈរបោះឆ្នោត នីតិកាលទី៦ ឆ្នាំ២០១៨ គិតត្រឹមថ្ងៃទី២ខែឧសភាម្សិលមិញ នេះបើតាមគណៈកម្មាធិការជាតិរៀបចំការបោះឆ្នោត (គ.ជ.ប)។
អ្នកនាំពាក្យ គ.ជ.ប លោក ហង្ស ពុទ្ធា ប្រាប់ VOD នៅព្រឹកនេះថា គ.ជ.ប ចុះបញ្ជីគណបក្សនយោបាយបានចំនួន៣គណបក្សហើយគិតត្រឹមម៉ោង៥ល្ងាចម្សិលមិញ ដែលក្នុងនោះរួមមាន គណបក្សប្រជាជនកម្ពុជា គណបក្សយុវជនកម្ពុជា និងគណបក្សសញ្ជាតិកម្ពុជា។
បើតាម គ.ជ.ប ការចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះត្រូវធ្វើឡើងតាមទម្រង់ បែបបទលេខ ១០០៨ ដោយគណបក្សនយោបាយត្រូវបំពេញពាក្យសុំចុះបញ្ជីនេះចំនួន២ (ពីរ) ច្បាប់ និងត្រូវមានឯកសារភ្ជាប់មកជាមួយចំនួន ១០ (ដប់)។
ការចុះបញ្ជីគណបក្សនយោបាយមានរយៈពេល១៥ថ្ងៃ គិតចាប់ពីថ្ងៃទី៣០ ខែមេសា ដល់ថ្ងៃទី១៤ ខែឧសភា។ ហើយការបោះឆ្នោត នីតិកាលទី៦ នឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ នេះបើតាមប្រតិទិន គ.ជ.ប៕
