កម្ពុជានឹងនាំចេកអំបូងលឿងលើកដំបូងទៅកាន់ប្រទេសចិននៅខែមីនា ឆ្នាំ២០១៩ខាងមុខនេះ ក្រោយពេលអ្នកជំនាញចិនត្រួតពិនិត្យគុណភាពនិងអនាម័យ។
ប្រធាននាយកដ្ឋានការពារដំណាំ អនាម័យ និងភូតគាមអនាម័យ លោក កែ មុន្ធីវុធ បានប្រាប់ វីអូឌី ឲ្យដឹងថា អ្នកជំនាញចិននឹងមកប្រទេសកម្ពុជានៅពាក់កណ្តាលខែកុម្ភៈ ដើម្បីវាយតម្លៃលើគុណភាពនិងភូតគាមអនាម័យលើដំណាំចេកលឿង ហើយបន្ទាប់មកនឹងសម្រេចផ្តល់សិទ្ធឲ្យក្រុមហ៊ុនណាមួយដែលមានស្តង់ដារទីផ្សារដើម្បីនាំចេញ។
លោក កែ មុន្ធីវុធ បានមានប្រសាសន៍ថា៖ «នៅខែ២ ថ្ងៃទី១៧នេះ អ្នកជំនាញចិនអាចមកបាន ហើយអនុវត្តនីតិវិធី ពិនិត្យ និងវាយតម្លៃបចេ្ចកទេស អនុឡោមភាពខាងអនាម័យនិងភូតគាមអនាម័យ ហើយពេលគេត្រឡប់ទៅវិញគេរៀបចំធ្វើរបាយការណ៍ ហើយអាចចំណាយពេល។ ក្នុងអំឡុងពេលខែ៣ សង្ឃឹមថា យើងនឹងអាចនាំចេញទៅបាន » ។
យោងតាមការចុះផ្សាយលើទំព័រហ្វេសប៊ុករបស់ក្រសួងកសិកម្ម កាលពីថ្ងៃទី២០ ខែមករា ឆ្នាំ២០១៩ ឲ្យដឹងថា រដ្ឋមន្រ្តីក្រសួងកសិកម្ម លោក វេង សាខុន បានចូលរួមពិធីវេចខ្ចប់ចេកអំបូងលឿងរបស់ក្រុមហ៊ុនកៅស៊ូបឹងកេត ដើម្បីត្រៀមនាំចេញទៅទីផ្សារប្រទេសចិនជាលើកដបូង។
ប្រភពដដែលបានឲ្យដឹងថា ក្រុមហ៊ុកៅស៊ូបឹងកេត បានដាំដុះចេកអំបូងលឿងលើផ្ទៃដីសាកល្បង ៥០០ហិចតា ក្នុងនោះផ្ទៃដី១០០ហិចតា កំពុងធ្វើការប្រមូលផលនិងវេចខ្ចប់នាំចេញទៅកាន់ទីផ្សារចិន ហើយគ្រោងពង្រីកផ្ទៃដីដាំដុះឲ្យដល់ ១,៥០០ហិចតា ដើម្បីឆ្លើយតបតាមតម្រូវការទីផ្សារប្រទេសចិន។
កម្ពុជាបាននាំចេកអំបូងលឿងទៅប្រទេសវៀតណាមជាង១ឆ្នាំមកហើយដែរ។ គិតមកដល់ឆ្នាំ២០១៩នេះ មានក្រុមហ៊ុនដាំដុះដំណាំចេកចំនួន១០ហើយ ដែលបានចុះបញ្ជីសម្រាប់នាំចេញទៅកាន់ទីផ្សារក្រៅប្រទេស៕
