អគ្គនាយកដ្ឋានពន្ធដារ បានប្រកាសថា ខ្លួនប្រមូលចំណូលពន្ធបានដល់ទៅជាង ៨០០លានដុល្លារនៅត្រីមាសទី១ក្នុងឆ្នាំនេះ ជាតួលេខដែលមានកំណើនដល់ទៅជាង ១២ភាគរយ បើធៀបនឹងត្រីមាសទី១កាលពីឆ្នាំមុន។
ក្នុងសេចក្ដីប្រកាសព័ត៌មានកាលពីសប្ដាហ៍មុន អគ្គនាយកដ្ឋានពន្ធដារ បានប្រកាសថា ខ្លួនប្រមូលបានចំណូលថវិកាពន្ធដល់ទៅចំនួន ៨៣៤.៧៧លានដុល្លារ នៅចន្លោះខែមករា ដល់ដំណាច់ខែមីនាកន្លងមកនេះ ដោយបានកើនឡើងលើសពីផែនការរំពឹងទុកដល់ទៅ ៣៦.៤៨ភាគរយឯណោះ។
អគ្គនាយកដ្ឋានពន្ធដារ បានប្រកាសទៀតថា ចំណូលពន្ធដារនៅត្រីមាសទី១ក្នុងឆ្នាំនេះ បានកើនឡើងចំនួន ៧៣.៦លានដុល្លារ ឬអត្រាកំណើន ១២.៣៥ភាគរយ បើធៀបនឹងតួលេខកាលពីត្រីមាសទី១ ក្នុងឆ្នាំ២០១៨កន្លងមក។
បើតាមសេចក្ដីប្រកាសព័ត៌មានដដែល កម្ពុជាប្រមូលពន្ធបានជាង ៤៧៦លានដុល្លារនៅក្នុងខែមីនាកន្លងមកនេះ ដោយបានកើនឡើងពីចំនួន ២៩.៥២លានដុល្លារ ឬមានកំណើន ៦.៦១ភាគរយ បើធៀបនឹងតួលេខក្នុងខែមីនាកាលពីឆ្នាំមុន។
កម្ពុជាប្រមូលចំណូលពន្ធអាករគ្រប់ប្រភេទបានចំនួនជាង ២,១៩៧លានដុល្លារកាលពីឆ្នាំ២០១៨កន្លងមក ហើយបានកើនឡើងខ្ទង់ ១៣.៣៧ភាគរយ បើធៀបនឹងតួលេខចំណូលពន្ធអាករកាលពីឆ្នាំ២០១៧កន្លងមក៕
