លោកនាយករដ្ឋមន្ត្រី ហ៊ុន សែន លើកឡើងថា ការផ្អាកព្រះរាជពិធីបុណ្យអុំទូកនៅក្នុងរាជធានីភ្នំពេញ នៅឆ្នាំនេះ មិនមែនដោយសារតែរាជរដ្ឋាភិបាលអស់ថវិកាដូចការវិភាគរបស់ជនមួយចំនួននោះទេ ប៉ុន្តែដោយសារកត្តាផ្សេងៗ ដូចជា ជំងឺកូវីដ-១៩មិនទាន់បាត់ទាំងស្រុង និងកម្ពុជាត្រូវមានភារៈទទួលភ្ញៀវបរទេសរៀបចំកិច្ចប្រជុំកំពូលអាស៊ាន ដែលលោក ហ៊ុន សែន ថាលោកមិនអាចលៃលកពេលវេលាដើម្បីគ្រប់គ្រងសភាពការណ៍ដែលមានមនុស្សច្រើននៅក្នុងពេលតែមួយបាននោះឡើយ។   

មន្ត្រីជាន់ខ្ពស់រដ្ឋាភិបាលថា ការផ្អាកប្រារព្ធពិធីបុណ្យអុំទូកឆ្នាំនេះ គឺដោយសារតែរដ្ឋាភិបាលមានភាពមមាញឹកខ្លាំងក្នុងនាមជាម្ចាស់ផ្ទះរៀបចំ «កិច្ចប្រជុំកំពូលអាស៊ាន» ដែលចាំបាច់ត្រូវធានានូវសន្តិសុខជូនមេដឹកនាំបរទេស រួមទាំងមេដឹកនាំប្រទេសមហាអំណាចផង ដែលត្រូវចូលរួមប្រជុំនៅកម្ពុជា។ រីឯ សង្គមស៊ីវិលយល់ថា វត្តមានភ្ញៀវសំខាន់ៗចំពេលពិធីបុណ្យជាតិដ៏ធំនេះ វារឹតតែជារឿងដែលមិនគួរផ្អាក ពោលគឺជាឱកាសបង្ហាញពីប្រពៃណីដ៏ល្អរបស់ជាតិ។