រដ្ឋមន្ត្រីក្រសួងមហាផ្ទៃ ប្រកាសនៅថ្ងៃនេះថា ពិធីបុណ្យអុំទូកនៅឆ្នាំនេះត្រូវផ្អាកជាថ្មី ដោយសារបញ្ហាជំងឺកូវីដ-១៩។
ព្រះរាជពិធីបុណ្យអុំទូក អកអំបុក និងសំពះព្រះខែ នៅឆ្នាំ២០២១នេះ នឹងប្រព្រឹត្តទៅរយៈពេល៣ថ្ងៃ ចាប់ពីថ្ងៃទី១៨ ដល់ថ្ងៃទី២០ ខែវិច្ឆិកា។
រដ្ឋមន្ត្រីក្រសួងមហាផ្ទៃ លោក ស ខេង បានថ្លែងក្នុងពិធីចូលកាន់តំណែងអភិបាលខេត្តបាត់ដំបង នាព្រឹកថ្ងៃចន្ទនេះថា បញ្ហាជំងឺកូវីដ-១៩ មិនទាន់ដឹងថានឹងត្រូវបិទបញ្ចប់នៅពេលណានោះទេ ដែលការនេះតម្រូវឱ្យពលរដ្ឋគ្រប់រូបត្រូវចេះសម្របខ្លួនរស់នៅជាមួយស្ថានភាពនេះ តាមវិធានសុខាភិបាលនិងការណែនាំរបស់រដ្ឋាភិបាល ដើម្បីទប់ស្កាត់រលកចម្លង។
លោកថា៖ «ឥលូវនេះ យើងចូលដល់ខែតុលា គឺខែ១០! តាមការសម្រេចរបស់រដ្ឋាភិបាល ឆ្នាំនេះគឺយើងមិនបានធ្វើបុណ្យអុំទូក អកអំបុក ដូចបណ្ដាឆ្នាំមុនៗទេ ដោយសារបញ្ហាកូវីដ»។
កាលពីឆ្នាំមុន រដ្ឋាភិបាលក៏បានប្រកាសផ្អាកព្រះរាជពិធីបុណ្យអុំទូក អកអំបុក និងសំពះព្រះខែ នៅរាជធានីភ្នំពេញ ដោយសារវិបត្តិជំងឺកូវីដ-១៩នេះផងដែរ។
គួរបញ្ជាក់ថា កម្ពុជាក៏ធ្លាប់ខកខានប្រារព្ធព្រះរាជពិធីបុណ្យមួយនេះរយៈពេល៣ឆ្នាំជាប់ៗគ្នាកាលពីឆ្នាំ២០១១ ឆ្នាំ២០១២ និងឆ្នាំ២០១៣ ក្រោយពីមានហេតុការណ៍រត់ជាន់គ្នានៅកោះពេជ្រ ដែលបណ្ដាលឱ្យមនុស្សជាង៣៥០នាក់ស្លាប់ និងដោយសារហេតុផលគ្រោះទឹកជំនន់ និងក្រោយការសោយទិវង្គតរបស់ព្រះបរមរតនកោដ្ឋព្រះបាទ នរោត្ដម សីហនុ។ ក្នុងឆ្នាំ២០១៤ ពិធីបុណ្យអុំទូកត្រូវបានរៀបចំធ្វើឡើងវិញ តែក៏បានខកខានម្ដងទៀតនៅឆ្នាំ២០១៥ ដោយសារកម្ពស់ទឹកទន្លេរាក់ពេក មិនអាចអុំទូកបាន។
ដោយឡែក ក្នុងពិធីផ្លាស់ប្ដូរតំណែងអភិបាលខេត្តបាត់ដំបងនៅព្រឹកមិញនេះដែរ លោក ស ខេង រដ្ឋមន្ត្រីក្រសួងមហាផ្ទៃ ក៏បានបន្តផ្ដាំផ្ញើអតីតអភិបាលខេត្តកំពង់ធំ លោក សុខ លូ ដែលត្រូវមកកាន់តំណែងជាអភិបាលខេត្តបាត់ដំបង ជំនួសលោក ងួន រតនៈ ដែលត្រូវប្ដូរទៅកាន់ខេត្តកំពង់ធំវិញនោះ ឱ្យបន្តដោះស្រាយបញ្ហានៅមូលដ្ឋានជូនប្រជាពលរដ្ឋ និងពង្រឹងផ្ទៃក្នុង ខណៈរដ្ឋាភិបាលនឹងរៀបចំការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅឆ្នាំ២០២២ខាងមុខ។
បើតាមមេដឹកនាំរូបនេះ ការផ្លាស់ប្ដូរអភិបាលខេត្ត គឺដើម្បីពង្រឹងប្រសិទ្ធភាពការងារជូនប្រជាពលរដ្ឋ ហើយថាបច្ចុប្បន្ន ខេត្តបាត់ដំបងមានអភិបាលខេត្តចំនួន១១រូបហើយ ត្រូវបានផ្លាស់ប្ដូរមកដឹកនាំខេត្តនេះ គិតត្រឹមអភិបាលថ្មី លោក សុខ លូ។
