សហភាពការងារកម្ពុជា ព្រមានដឹកនាំធ្វើបាតុកម្មទ្រុងទ្រាយធំមួយនៅពេលឆាប់ៗនេះ ដោយអះអាងថា បើអាជ្ញាធរនៅតែបន្តគំរាមកំហែង អតីតអ្នកបើកបររថយន្តកាពីតូល មិនឲ្យធ្វើយុទ្ធនាការណ៍ចុះចែកខិតប័ណ្ណតាមទីសាធារណៈដោយសន្តិវិធីជំរុញឲ្យលើកម្ពស់សិទ្ធិការងារនោះ។
នៅពេលថ្មីៗនេះ អតីតអ្នកបើកបររថយន្តឲ្យក្រុមហ៊ុនកាពីតូល បានបន្តចុះចែកខិតប័ណ្ណ នៅទីប្រជុំជន ក្នុងរាជធានីភ្នំពេញ និងតាមបណ្តាខេត្តមួយចំនួន អំពាវនាវឲ្យសាធារណជនបន្តផ្អាកជិះរថយន្តក្រុមហ៊ុនកាពីតូល ដែលពួកគេថាយុទ្ធនាការណ៍នោះ ដើម្បីដាក់សម្ពាធឲ្យក្រុមហ៊ុននោះ យកពួកគេទាំង៤៥នាក់ ចូលធ្វើការវិញ។
ប៉ុន្តែការតវ៉ាប៉ុន្មានខែមកនេះ គ្មានដំណោះស្រាយទេ ចំណែកក្រុមអ្នកធ្វើយុទ្ធនាការវិញ ត្រូវតុលាការចាប់ឃុំខ្លួនពីរនាក់ នៅពន្ធនាគារព្រៃស និងខ្លះទៀតត្រូវអាជ្ញាធរចុះរារាំង ពិសេសអតីតអ្នកបើកបររថយន្តម្នាក់ទៀតនៅខេត្តបាត់ដំបង ត្រូវសមត្ថកិច្ចនៅខេត្តនេះ ចាប់ឃាត់ខ្លួននិងបញ្ជូនទៅតុលាការនៅថ្ងៃសៅរ៍នេះ។
នៅថ្ងៃទី១៩ ខែមីនានេះដែល សហភាពការងារកម្ពុជា បានចេញសេចក្តីថ្លែងការ បង្ហាញការសោកស្តាយទៅនឹងវិធានការណ៍ចាប់ឃាត់ខ្លួន លោក លី ហុង នៅម្តុំមន្ទីរពេទ្យពពី ក្រុងបាត់ដំបង នៅពេលបុរសរូបនោះកំពុងចុះចែកខិតប័ណ្ណអំពាវនាវនេះ។
សហភាពការងារកម្ពុជា ជំរុញឲ្យអាជ្ញាធរដោះលែងលោក លី ហុង ជាបន្ទាន់ ដោយអះអាងថា ការចុះចែកខិតប័ណ្ណរបស់លោក លី ហុង នោះសហភាពការងារថា លោកលី ហុង មិនបានធ្វើអ្វីខុសច្បាប់ទេ។
ប៉ុន្តែអធិការក្រុងបាត់ដំបង លោក យឹម វិចិត្រ អះអាងថា ការឃាត់ខ្លួនលោក លី ហុងដែលចុះចែកខិតប័ណ្ណនោះ លោកថា ដោយសារតែការធ្វើសកម្មភាពនោះ គ្មានការអនុញ្ញាត្តិ។
យ៉ាងណាក៏ដោយ សហភាពការងារកម្ពុជា ព្រមានថា បើសិនពុំមានការដោះលែង លោក លី ហុង ទេពួកគេថា នឹងធ្វើបាតុកម្មក្នុងទ្រុងទ្រាយធំប្រឆាំងនឹងក្រុមហ៊ុន និងអាជ្ញាធរនៅពេលខាងមុខ។
កាលពីចុងឆ្នាំ២០១៥ ក្រុមហ៊ុនកាពីតូល បានបញ្ឈប់បុគ្គលិកជាអ្នកបើកបររថយន្ត ចំនួន៤៥នាក់ ដោយអះអាងថា អ្នកទាំងនោះ បានដាក់ភ្ញៀវតាមផ្លូវ រំលោភបទបញ្ជាផ្ទៃក្នុង បង្កឲ្យអ្នកធ្វើដំណើរមិនសប្បាយចិត្ត និងប៉ះពាល់ដល់ការប្រកួតប្រជែង របស់ក្រុមហ៊ុន។
ប៉ុន្តែអ្នកដែលក្រុមហ៊ុនបញ្ឈប់ការងារវិញបានបញ្ជាក់ថា ក្រុមហ៊ុនកាពីតូលទៅវិញទេ ដែលពួកគេថាបានរំលោភច្បាប់ការងារយ៉ាងធ្ងន់ធ្ងរ ដោយអះអាងថា ការបណ្តេញពួកគេចេញពីការងារហេតុផលតែមួយគត់គឺ ដោយសារពួកគេបានជូនដំណឹងពីការបង្កើតសហជីពជំរុញលក្ខខណ្ឌការងារក្នុងក្រុមហ៊ុននោះ។
ភាពចម្រូងចម្រាសនៃវិវាទការងារនៅក្រុមហ៊ុនកាពីតូលនេះ បានធ្វើឲ្យអតីតបុគ្គលិកដែលក្រុមហ៊ុនបានបញ្ឈប់ចេញតវ៉ាជាហូហែរហូតបច្ចុបន្ននេះ។
