ប្រជាជនកូរ៉េខាងត្បូងរាប់ម៉ឺននាក់ បានចេញតវ៉ានៅកណ្ដាលទីក្រុងសេអ៊ូលនៅល្ងាចថ្ងៃសៅរ៍នេះ នៅក្នុងបាតុកម្មធំបំផុតមួយរបស់ប្រទេសនេះ ដែលទាមទារឲ្យប្រធានាធិបតី អ្នកស្រី ផាក ហ្គឹនហេ ចុះចេញពីតំណែងជុំវិញរឿងអាស្រូវពុករលួយ។
យោងតាមប៉ូលិស មនុស្សប្រហែល ៤ម៉ឺន ៣ពាន់នាក់ ស្ថិតនៅកន្លែងបាតុកម្មដុតទៀននៅក្បាលព្រលប់ថ្ងៃនេះ។ ប៉ុន្តែ អ្នករៀបចំបាតុកម្មនិយាយថា ចំនួនមហាជនដល់ទៅ ១សែននាក់ បានប្រមូលផ្ដុំគ្នា ដែលធ្វើឲ្យបាតុកម្មនេះក្លាយជាការតវ៉ាធំបំផុតមួយ ចាប់តាំងពីបាតុកម្មកាលពីឆ្នាំ២០០៨ ប្រឆាំងនឹងការនាំចូលសាច់គោអាមេរិក។
អ្នកស្រី ផាក ហ្គឹនហេ បានរងការវាយប្រហារពីរឿងអាស្រូវពាក់ព័ន្ធនឹងមិត្តចាស់ម្នាក់ ដែលត្រូវបានគេចោទថាបានប្រើប្រាស់មិត្តភាពជាមួយប្រធានាធិបតី ដើម្បីលូកលាន់ក្នុងកិច្ចការរដ្ឋ។ អ្នកស្រី ផាក បានសន្យាសហការជាមួយរដ្ឋអាជ្ញាក្នុងការស៊ើបអង្កេត។
ពលរដ្ឋកូរ៉េបានផ្ទុះកំហឹងដោយសារតែសេចក្ដីរាយការណ៍និយាយថា អ្នកស្រីបានក្បត់ទំនុកចិត្តមហាជន និងដឹកនាំរដ្ឋាភិបាលខុសឆ្គង ដោយសារតែរឿងអាស្រូវពាក់នឹងគ្រួសារ ឬមិត្តភក្តិ៕