នៅទីបំផុត កីឡាករវ័យក្មេងពេជ្រ ម្ទេសខ្មាំង មកពីក្លឹបអរុណរះកីឡា បានក្លាយជាម្ចាស់ខ្សែក្រវាត់ជើងឯកដូចការគ្រោងទុកមែន នៅក្នុងព្រឹត្តិការណ៍កំពូលជើងឯក Tiffy Super Fight វគ្គ៣ដែលបានធ្វើឡើងនៅប៉ុស្ដិ៍លេខ៥កាលពីល្ងាចថ្ងៃទី១០ មេសា។ នេះជាលទ្ធផលដែលគេចង់បាន ហើយក៏ជាជ័យជម្នះគួរជាទីមោទនៈផងដែរសម្រាប់កីឡាកររូបនេះក្នុងឱកាសបុណ្យចូលឆ្នាំខ្មែរ។
កីឡាករចំនួន៤រូបដែលឡើងប្រកួតនៅថ្ងៃផ្ដាច់ព្រ័ត្រនោះរួមមាន កីឡាករចាន់ គង់រាជ មកពីក្លឹបប្រដាល់តាព្រហ្មមានជ័យ ប្រកួតជាមួយកីឡាករយិន បូរិន មកពីក្លឹបអាស៊ីកីឡា ដណ្ដើមយកលេខ៣និងកីឡាករពេជ្រ ម្ទេសខ្មាំង ប្រកួតជាមួយកីឡាករឡូញ វ៉ាន់ឌី មកពីក្លឹបពន្លឺវិបុលរិទ្ធី ដណ្ដើមយកចំណាត់ថ្នាក់លេខ១។ សមាសភាពទាំង៤ កើតចេញពីការប្រកួតជម្រុះយ៉ាងស្វិតស្វាញប្រមាណច្រើនខែមកហើយ ក្នុងពេលដែលព្រឹត្តិការណ៍ចាប់ផ្ដើម គឺមានបេក្ខជនចូលរួមសរុប៣២រូប ហើយតម្រូវឲ្យឡើងប្រកួតគ្នាចាញ់ធ្លាក់ៗ រហូតនៅសល់តែ៤នាក់ចុងក្រោយ។
ឆ្លងកាត់ការប្រកួតដែលត្រូវគេមើលឃើញថាម្នាក់ៗសុទ្ធតែប្រឹងអស់ពីសមត្ថភាពនោះ កីឡាករជើងចាស់ យិន បូរិន បានត្រឹមចំណាត់ថ្នាក់លេខ៤ ដោយទទួលបានពានកិត្តិយសមួយ ទឹកប្រាក់៥០០ដុល្លារនិងកីឡាករ ចាន់ គង់រាជ ទទួលបានចំណាត់ថ្នាក់លេខ៣ ទទួលបានពានកិត្តិយសមួយ អមដោយទឹកប្រាក់៧៥០ដុល្លារ។ ដោយឡែកសម្រាប់ការប្រកួតរបស់គូឯកគឺកីឡាករ ពេជ្រ ម្ទេសខ្មាំង ដែលអ្នកណាក៏ទទួលស្គាល់ជាជើងខ្លាំងកំពុងឡើងសន្ទុះនៅលើសង្វៀននោះ បានក្លាយជាម្ចាស់ជើងឯក បន្ទាប់ពីបានវាយផ្ដួលកីឡាករ ឡូយ វ៉ាន់ឌី ឲ្យស្គាល់បរាជ័យដោយពិន្ទុ។ កីឡាករពេជ្រ ម្ទេសខ្លាំង ត្រូវគេឃើញមិនមែនឈ្នះងាយនោះទេ ថ្វីដ្បិតតែបច្ចេកទេសនិងបទពិសោធន៍របស់កីឡាកររូបនេះ គួរតែឈ្នះគូប្រកួតដោយងាយជាងនេះយ៉ាងណាក្ដី។ នោះគឺដោយសារតែឡូញ វ៉ាន់ឌី ក៏បានបញ្ចញអស់ស្នៀតដែលគ្រូចែកអោយនិងស្ទុះវាយលុយដោយស្ដាយកម្លាំងដើម្បីចង់ឈ្នះដូចគ្នា។
ជាក់ស្ដែងនៅទឹកទី២ និងទី៣ អ្នកណាក៏ឃើញនោះដែរថាអ្នកទាំងពីរវាយគ្នាទៅវិញទៅមក ដោយកីឡាករម្ទេសខ្មាំងល្អកែងនិងម៉ាត់ ប៉ុន្តែក៏ត្រូវគូប្រកួតសងវិញដោយជង្គង់ ម៉ាត់និងទាត់សឹងនឹងទ្រមខ្លួនត្រឡប់មកវិញផងដែរ។ ថ្វីដ្បិតថាបានត្រឹមតែជើងឯករង ប៉ុន្តែឡូញ វ៉ាន់ឌី ដែលជាជើងថ្មីហាក់បានកន្ទ្រាក់មហាជនឲ្យកត់សម្គាល់ពីសមត្ថភាពរបស់គេពីការប្រកួតនេះ។
ចំណាត់ថ្នាក់លេខ១ទទួលបានទឹកប្រាក់ចំនួន៤ពាន់ដុល្លារនិងពានជើងឯកមួយ។ កីឡាកររូបនេះត្រូវបានប្រកាសថានឹងបានតំណាងឲ្យប៉ុស្ដិ៍លេខ៥ចេញទៅប្រកួតនៅក្នុងប្រទេសថៃក្នុងពេលខាងមុខ ដោយក្នុងនោះក៏ទទួលបានប្រាក់ខែឧបត្ថម្ភចំនួន២ខែពីកម្មវិធីផងដែរ។ ចំណាត់ថ្នាក់លេខ២ គឺកីឡាករ ឡូញ វ៉ាន់ឌី ក៏ទទួលបានពានកិត្តិយសមួយផងដែរ អមដោយទឹកប្រាក់ចំនួន២០០០ដុល្លារ។ កីឡាកររូបនេះ ត្រូវគេឃើញពេញចិត្តនឹងទទួលយកលទ្ធផលដែលខ្លួនប្រកួតចាញ់ ដោយសារតែក្នុងពិភពប្រដាល់គឺគេទើបតែហក់ចូលក្រោយនិងមិនអាចប្រដូចសមត្ថភាពទៅនឹងពេជ្រ ម្ទេសខ្មាំងដែលជារៀមច្បងនោះឡើយ។
កីឡាករជើងឯកបានប្រកាសក្រោយពីប្រកួតឈ្នះថានេះគឺជាអ្វីដែលគេចង់បានបំផុតដោយសារតែការប្រឹងប្រែងនៅលើសង្វៀនកន្លងមក បើទោះជាមានឈ្មោះបោះសំឡេង ប៉ុន្តែគេមិនទាន់មានឈ្មោះថាម្ចាស់ខ្សែក្រវាត់ឬជាម្ចាស់ជើងឯកណាមួយឡើយ។ ពេជ្រ ម្ទេសខ្មាំង ប្រកាសថា ឪពុកម្ដាយនិងសាច់ញាតិរបស់លោក គឺពិតជាសប្បាយចិត្តបន្ទាប់ពីលោកអាចដណ្ដើមបានពានជើងឯកនៅមុនឱកាសបុណ្យចូលឆ្នាំនេះ៕
