អ្នកតាមដានមួយចំនួន បង្ហាញការព្រួយបារម្ភថា ប្រជាធិបតេយ្យនៅកម្ពុជា នៅតែបន្តដើរលើផ្លូវដ៏តូចចង្អៀត ទោះបីមានគណបក្សនយោបាយថ្មីៗជាច្រើន បានចូលរួមប្រកួតការបោះឆ្នោត សម្រាប់អាណត្តិថ្មីនេះក៏ដោយ។
កាលពីម្សិលមិញ គ.ជ.ប បានចេញសេចក្តីប្រកាស ទទួលស្គាល់គណបក្សដល់ទៅ២០ សម្រាប់ចូលរួមប្រកួតការបោះឆ្នោតជ្រើសតាំងតំណាងរាស្ត្រនីតិកាលទី៦នេះ ខណៈអាណត្តិមុនមានតែ៨គណបក្សប៉ុណ្ណោះចូលរួម ក្នុងនោះមានទាំងគណបក្សសង្គ្រោះជាតិផងដែរ។
ប៉ុន្តែនៅអាណត្តិថ្មីនេះ គ្មានគណបក្សសង្គ្រោះជាតិចូលរួមប្រកួតការបោះឆ្នោតទេ មានតែ គណបក្សប្រជាជនកម្ពុជា គណបក្សហ្វ៊ុនស៊ិនប៉ិច គណបក្សប្រជាធិបតេយ្យមូលដ្ឋាន គណបក្សសម្ព័ន្ធដើម្បីប្រជាធិបតេយ្យ និងគណបក្ស១៦ផ្សេងទៀត ។
មន្ត្រីឃ្លាំមើលការបោះឆ្នោតនៅអង្គការខុមហ្វែ្រល លោក កន សាវង្ស និយាយថា បើទោះបីជាអាណត្តិថ្មីនេះ មានគណបក្សនយោបាយ ចូលរួមប្រកួតលើសអាណត្តិមុនដល់ទៅ១២ក៏ដោយ ក៏ដំណើរការបោះឆ្នោតនេះមិនបានជំរុញយន្តការប្រជាធិបតេយ្យដែរ ដោយថា បក្សប្រឆាំងដ៏ធំ ដែលមានអ្នកគាំទ្រជាង៣លាននាក់ ត្រូវបានគេផាត់ចេញពីទីលានប្រកួត ។
លោក កន សាវង្ស វិភាគថា ដំណើរការបោះឆ្នោតបែបនេះ បានរារាំងដល់ការសម្រេចចិត្តរបស់ពលរដ្ឋជិតពាក់កណ្តាលប្រទេស ហើយបង្កើតឲ្យមានមន្ទិលពីការខ្វះភាពស្របច្បាប់ ជាតំណាង ក្នុងសង្គមប្រជាធិបតេយ្យ។
លោក កន សាវង្ស មន្ត្រីឃ្លាំមើលការបោះឆ្នោតនៅអង្គការខុមហ្វែ្រល
នាយកប្រតិបត្តិមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង យល់ថា ការដែលគណបក្សថ្មីៗច្រើនបានប្រកួតការបោះឆ្នោតច្រើតែមួយមុខ វាយតម្លៃថា ការរៀបចំការបោះឆ្នោតនោះ កំពុងដើរលើគន្លងប្រជាធិបតេយ្យពេញលេញទេ លោកថា គេត្រូវពិនិត្យមើកពីកត្តារួមផ្សំផ្សេងៗទៀត រួមទាំងគ្មានការគំរាមកំហែងផ្នែកនយោបាយផងដែរ។
លោក យង់ គិមអេង នាយកប្រតិបត្តិមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព
អ្នកវិភាគនយោបាយ លោក ឯម សុវណ្ណារ៉ា វិភាគថា ដំណើរការបោះឆ្នោតមួយ បានបើកទូលាយឲ្យតែគណបក្សថ្មីៗ តូចៗចូលរួមច្រើន តែព្យាយាមផាត់គណបក្សប្រឆាំង ឬគណបក្សធំចេញពីទីលានប្រកួតដូចបច្ចុប្បន្ន លោកថា ទំនងជាគ្មានការស្វាគមន៍ពីប្រទេសលោកសេរីទេ។
លោកថា៖«បើសិនជាអន្តរជាតិមិនទទួលយកបាន គឺធ្វើឲ្យកម្ពុជាហ្នឹងស្ថិតក្នុងភាពឃ្លាតឆ្ងាយពីអន្តរជាតិហើយ។ចង់បញ្ជាក់ថាសហគមន៍អន្តរជាតិយើងចង់ផ្តោតទៅលើតែសហរដ្ឋអាមេរិក និងសភាពអឺរុបទេព្រោះជាអ្នកមានឥទ្ធិពល ហើយដែលកម្ពុជាពឹងពាក់ទីផ្សាររបស់ពួកគេ ហើយនិងឥទ្ធិពលរបស់ពួកគេខ្លាំង»។
យ៉ាងណាក៏ដោយ លោកនាយករដ្ឋមន្ត្រីអះអាងកាលពីសប្តាហ៍មុនអំឡុងចុះជួបកម្មករថា ការហក់ឡើងចំនួនគណបក្សចូលរួមប្រកួតការបោះឆ្នោតនៅអាណត្តិថ្មីនេះ ជាការរីកចម្រើននៃលទ្ធិប្រជាធិបតេយ្យនៅកម្ពុជា ហើយថា ការបង្កើតរដ្ឋាភិបាលថ្មី មិនអាស្រ័យលើសហគមន៍អន្តរជាតិទេ អាស្រ័យលើស្ថាប័នក្នុងស្រុក គឺ គជប ។
ប៉ុន្តែអ្នកតាមដានថា បើសហគមន៍អន្តរជាតិមិនទទួលស្គាល់លទ្ធផលបោះឆ្នោត កម្ពុជានឹងខាតបង់ ។
