សមាគមមីក្រូហិរញ្ញវត្ថុកម្ពុជា បានណែនាំជាថ្មីឲ្យគ្រឹះស្ថានមីក្រូហិរញ្ញវត្ថុទាំងអស់បញ្ជាក់ប្រាប់ប្រជាពលរដ្ឋឲ្យបានច្បាស់ថាគ្រឹះស្ថានមីក្រូហិរញ្ញវត្ថុទាំងអស់ជារបស់ឯកជនសុទ្ធសាធ។
យោងតាមសេចក្តីប្រកាសព័ត៌មានចេញផ្សាយនៅថ្ងៃទី២៨ខែឧសភាឆ្នាំ២០១៨នេះ សមាគមមីក្រូហិរញ្ញវត្ថុកម្ពុជា បានរំលឹកឲ្យគ្រឹះស្ថានមីក្រូហិរញ្ញរួមទាំងមន្រ្តីឥណទានទាំងអស់ប្រាប់ដល់ពលរដ្ឋថាលុយដែលពលរដ្ឋខ្ចីជារបស់ឯកជន មិនមែនជារបស់រដ្ឋឡើយ។
យោងតាមសេចក្តីប្រកាសព័ត៌មានដដែលនេះ ការផ្សព្វផ្សាយពីការលុបបំណុលឬការផ្សព្វផ្សាយស្រដៀងគ្នាជាសម្មភាពប្រជាភិថុតិ ដែលជម្រុញឲ្យប្រជាពលរដ្ឋខ្ចីហួសពីតម្រូវការបង្កជាបញ្ហាធ្ងន់ធ្ងរដល់សេដ្ឋកិច្ចគ្រួសារនិងសង្គម។
សេចក្តីប្រកាសព័ត៌មានរបស់សមាគមមីក្រូហិរញ្ញវត្ថុកម្ពុជាធ្វើឡើងមួយថ្ងៃបន្ទាប់ពីសម្ដេចព្រះ នរោត្តម រណឫទ្ធិ ប្រធានគណបក្សហ៊្វុនស៊ិនប៉ិច បានសន្យាជាថ្មីនៅពេលព្រះអង្គចុះជួបជាមួយប្រជាពលរដ្ឋនៅខេត្តតាកែវកាលពីម្សិលមិញ ថានឹងជួយដោះស្រាយបំណុលជូនប្រជាពលរដ្ឋដែលជំពាក់ធនាគារនៅពេលគណបក្សព្រះអង្គឈ្នះឆ្នោតដឹកនាំរដ្ឋាភិបាល។
តាមសេចក្តីប្រកាសព័ត៌មានរបស់ធនាគាជាតិកម្ពុជាដែលចេញផ្សាយកាលពីថ្ងៃទី១៨ខែសីហាឆ្នាំ២០១៧កន្លងទៅ ស្ថាប័ននេះបានព្រមានចាត់វិធានការតាមផ្លូវច្បាប់ចំពោះអ្នកដែលផ្សព្វផ្សាយថានឹងមានការលុបបំបាត់បំណុលរបស់អតិថិជន។
កាលពីឆ្នាំពី២០១៧កន្លងទៅលោកនាយរដ្ឋមន្រ្តីហ៊ុន សែន បានធ្វើយុទ្ធនាការនានាជាច្រើនព្រមទាំងបញ្ជាក់ម្ដងហើយម្ដងទៀតប្រាប់ប្រជាពលរដ្ឋទូទាំងប្រទេសថាគ្រឹះស្ថានមីក្រូហិរញ្ញវត្ថុទាំងអស់ជារបស់ឯកជនមិនមែនជារបស់រដ្ឋទេ ដើម្បីកុំឲ្យពលរដ្ឋភ័ន្តច្រលំថាពួកគេជំពាក់លុយរដ្ឋ។
