សង្គមស៊ីវិលយល់ថា ការបោះឆ្នោតថ្នាក់ជាតិខាងមុខ ដែលគ្មានអតីតបក្សប្រឆាំងចូលរួម នឹងមិនឆ្លុះបញ្ចាំងគោលការណ៍ប្រជាធិបតេយ្យនោះទេ ដោយសារ ពលរដ្ឋពិបាកជ្រើសរើសគណបក្សនយោបាយ ដែលពួកគេពេញចិត្ត។
ការលើកឡើងបែបនេះ គឺបន្ទាប់ពីគណៈកម្មាធិការជាតិរៀបចំការបោះឆ្នោតអះអាងពីភាពត្រឹមត្រូវនៃការបោះឆ្នោតខាងមុខ ថាធ្វើឡើងតាមគោលការណ៍ប្រជាធិបតេយ្យ។
ក្នុងសេចក្ដីប្រកាសព័ត៌មាន កាលពីថ្ងៃម្សិលមិញ ប្រធានគណៈកម្មាធិការជាតិរៀបចំការបោះឆ្នោត លោក ស៊ិន ប៊ុកហុក បានព្យាយាមពន្យល់ពីសារៈសំខាន់នៃការបោះឆ្នោតអាណត្តិនេះ និងអំពាវនាវទៅពលរដ្ឋ ឲ្យចេញទៅបោះឆ្នោត ដោយលោកថា ការបោះឆ្នោតខាងមុខនេះ បានអនុវត្តតាមច្បាប់ មានភាពសេរី ត្រឹមត្រូវ និងយុត្តិធម៌ ហើយថា គណបក្សនយោបាយ ត្រូវតែទទួលស្គាល់លទ្ធផលបោះឆ្នោតនោះ។
បើតាមសេចក្ដីប្រកាសព័ត៌មានដដែលនេះ ពលរដ្ឋកម្ពុជា មានសិទ្ធិបោះឆ្នោតជ្រើសរើសតំណាងដែលពួកគេពេញចិត្ត ឬគណបក្សនយោបាយ ដែលមានគុណសម្បត្តិគ្រប់គ្រាន់ សាកសមធ្វើជាតំណាងរបស់ពួកគេ។
មន្ដ្រីជាន់ខ្ពស់កម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស យល់ថា នេះអាចជាការបង្ខិតបង្ខំពលរដ្ឋឲ្យចេញទៅបោះឆ្នោត ប្រសិនបើគណបក្សមួយ ដែលពួកទុកចិត្ត មិនមានឈ្មោះក្នុងបញ្ជីបោះឆ្នោត។
លោកបន្ដថា រដ្ឋាភិបាលកើតក្រោយការបោះឆ្នោតបែបបនេះ នឹងជួបបញ្ហាជាច្រើន ដូចជា ប្រតិកម្មរិះគន់ពីសហគមន៍អន្ដរជាតិ និងការមិនទទួលស្គាល់លទ្ធផលបោះឆ្នោតជាដើម។
លោក កន សាវាង្ស មន្ដ្រីជាន់ខ្ពស់កម្មវិធីផ្នែកអង្កេតរបស់អង្គការខុមហ្វ្រែល
អ្នកតាមដានពីការអភិវឌ្ឍសង្គម លោកបណ្ឌិត មាស នី យល់ថា គ.ជ.ប គួរពង្រឹងតួនាទីរបស់ខ្លួនឲ្យបានរ៉ឹងមាំជាងនេះ ដោយលោកថា កន្លងមក មានសារនយោបាយ និងការគំរាមកំហែងឲ្យពលរដ្ឋចេញទៅបោះឆ្នោត។
លោកក៏ព្រមានផងដែរពីប្រតិកម្មរិះគន់ពីមជ្ឈដ្ឋានអន្ដរជាតិ ក្រោយពេលបោះឆ្នោត បើទោះជា គ.ជ.ប អះអាងថា បានអនុវត្តត្រឹមត្រូវតាមច្បាប់ហើយក៏ដោយ។
អ្នកតាមដានពីការអភិវឌ្ឍសង្គម លោកបណ្ឌិត មាស នី
គណបក្សចំនួន ២០ នឹងចូលរួមប្រកួតប្រជែងការបោះឆ្នោតនៅថ្ងៃទី២៩ខែកក្កដាខាងមុខនេះ។ ប៉ុន្ដែ សហគមន៍អន្ដរជាតិនាំមុខដោយសហភាពអឺរ៉ុប និងសហរដ្ឋអាមេរិក បានព្រមានដាក់ទណ្ឌកម្ម និងមិនទទួលស្គាល់លទ្ធផលបោះឆ្នោតខាងមុខឡើយ ប្រសិនបើគ្មានការដោះលែងលោក កឹម សុខា និងអនុញ្ញាតឲ្យអតីតបក្សប្រឆាំងបានចូលរួមការបោះឆ្នោត៕