ក្រសួងធនធានទឹក និងឧតុនិយមព្យាករថា តំបន់ជាប់មាត់សមុទ្រនៃប្រទេសកម្ពុជា នឹងមានខ្យល់បក់ខ្លាំង និងរលកធំៗ ចាប់ពីថ្ងៃនេះ រហូតដល់ថ្ងៃទី១៥មិថុនាខាងមុខ។
ក្នុងសេចក្ដីប្រកាសព័ត៌មាន កាលពីម្សិលមិញ ក្រសួងធនធានទឹកពន្យល់ថា កម្ពុជាកំពុងទទួលឥទ្ធិពលនៃកូនព្យុះ «អ៊ីវីនណៀ» ដែលបង្កើតជាសម្ពាធទាប ហើយក៏នឹងទទួលរងសម្ពាធថ្មីមួយទៀត កើតនៅភាគអាគ្នេយ៍ ប្រទេសហ្វីលីពីន ដែលវិវត្តជាព្យុះទី៥។
តាមប្រភពដដែល ខេត្តកោះកុង និងខេត្តព្រះសីហនុ នឹងមានភ្លៀងធ្លាក់ច្រើនជាងគេ ហើយផ្ទៃសមុទ្រនឹងមានខ្យល់បក់បោកខ្លាំង រួមទាំងមានរលកធំៗ។ ចំណែក ខេត្ត និងរាជធានីផ្សេងទៀត ក៏នឹងមានភ្លៀងធ្លាក់ផងដែរ ដូចជា រាជធានីភ្នំពេញ ខេត្តតាកែវ កំពង់ស្ពឺ និងខេត្តកណ្ដាល។
បើតាមសេចក្ដីប្រកាស ក្រសួងក៏ក្រើនរំលឹកប្រជាពលរដ្ឋ និងអ្នកធ្វើដំណើរតាមសមុទ្រ ឲ្យបង្កើនការប្រុងប្រយ័ត្នខ្ពស់ចំពោះបាតុភូតនេះ៕