នៅក្នុងវិស័យប្រដាល់ អ្នកតាមដានការប្រកួតជ្រើសរើសជើងឯក Wurkz រដូវកាលទី១ សុទ្ធតែបានដឹងថាកីឡាករកម្ពុជា មាជ សុខរ៉ា ធ្លាប់សន្លប់ក្រោមដៃកីឡាករថៃ Pep Sy ម្ដងហើយ ក្នុងពេលដែលអ្នកទាំងពីរប៉ះគ្នាក្នុងវគ្គសន្សំពិន្ទុ។
អញ្ចឹងហើយទើបកីឡាករទាំងពីរនេះបានក្លាយជាជើងខ្លាំងប្រចាំពូលកម្ពុជា និងថៃ ម្ខាងម្នាក់ ហើយបានឡើងមកប្រកួតដណ្ដើមយកខ្សែក្រវាត់អន្តរជាតិវគ្គចុងក្រោយ កាលពីថ្ងៃទី២ ធ្នូ មានមនុស្សតិចណាស់ជឿថាកីឡាករកម្ពុជា អាចបំបាក់ជើងខ្លាំងថៃហើយដណ្ដើមយកបានខ្សែក្រវាត់អន្តរជាតិ និងប្រាក់លាន។
ការប្រកួតដែលបានធ្វើឡើងយ៉ាងកក្រើកនៅលើសង្វៀនទូរទស្សន៍អាស៊ីអាគ្នេយ៍នេះ ស្ទើរនឹងធ្វើអោយអ្នកទស្សនាមិនហ៊ានដកដង្ហើមឬងាកមុខចេញនោះទេ ដោយសារតែរយៈពេល៥ទឹកដែលអ្នកទាំងពីរប្រកួតគ្នា គឺមិនមានវិនាទីណាមួយដែលទុកប្រឡោះអោយគ្នាដកដង្ហើម។
លោក ញាណ សុធី អ្នករៀបចំការប្រកួតបានថ្លែងបញ្ជាក់ថា ព្រឹត្តិការណ៍មួយនេះ មានរូបមន្តដូចគ្នានឹងការប្រកួតជ្រើសរើសជើងឯកអន្តរជាតិដែលធ្លាប់បានធ្វើកន្លងមកដែរ ដោយក្នុងពេលប្រកួតគ្នា គឺមានកីឡាករកម្ពុជា៤រូប និងកីឡាករបរទេស៤រូប ហើយតម្រូវអោយពួកគេ ប្រកួតគ្នាខ្វែងពូលសុទ្ធសាធ ដើម្បីស្វែងរកអ្នកមានពិន្ទុខ្ពស់នាំមុខគេប្រចាំពូលកម្ពុជា និងប្រចាំពូលថៃ អោយឡើងមកប្រកួតគ្នានៅវគ្គចុងក្រោយ។
លោកថាក្រោយការប្រកួតសន្សំពិន្ទុដែលធ្លាប់បានឃើញ កីឡាករ មាជ សុខរ៉ា ត្បិតថាបានឈរលេខ១ក្នុងពូលកម្ពុជា ប៉ុន្តែនៅពេលប៉ះជាមួយកីឡាករថៃ Pep Sy គឺគេបានតែ២ទឹកប៉ុណ្ណោះ ក៏ត្រូវគូប្រកួតវាយអោយសន្លប់ឈានទៅបោះបង់ការប្រកួតក្នុងទឹកទី២។ យ៉ាងណាមិញលោកបានសម្ដែងការភ្ញាក់ផ្អើល ដែលកីឡាករកម្ពុជា មិនត្រឹមតែសាងប្រវត្តិសាស្រ្តវាយឈ្នះកីឡាករថៃដើម្បីសងសឹកស្ដារមុខមាត់ប៉ុណ្ណោះទេ ប៉ុន្តែក៏ដណ្ដើមបានខ្សែក្រវាត់អន្តរជាតិ និងប្រាក់លាន ធ្វើអោយថៃដែលរំពឹងឈ្នះក្នុងភាគរយច្រើន ខកចិត្តនិយាយមិនចេញ។
លោកថា កីឡាករ មាជ សុខរ៉ា ក្រោយបានក្លាយជាជើងឯកក្នុងប្រភេទទម្ងន់៦៧គីឡូក្រាម គេទទួលបានខ្សែក្រវាត់អន្តរជាតិមួយ ពានកិត្តិយសមួយ និងទឹកប្រាក់២០លានរៀលស្មើនឹង៥ពាន់ដុល្លារ ដោយមិនទាន់រាប់កញ្ចប់ប្រាក់រង្វាន់ ប្រាក់តម្លៃខ្លួន និងទឹកប្រាក់ឧបត្ថម្ភពីអ្នកទស្សនាដោយផ្ទាល់នាថ្ងៃនោះឡើយ។ ដោយឡែកសម្រាប់កីឡាករថៃ ដែលបានត្រឹមចំណាត់ថ្នាក់ជើងឯករង បានទទួលពានកិត្តិយសមួយ និងទឹកប្រាក់គិតដុល្លារប្រមាណ៣ពាន់ដុល្លារ៕
