ក្រុមគ្រួសារ និងអ្នកគាំទ្រលោក រ៉ាត់ រត្នមុនី ដែលត្រូវបានតុលាការឃុំខ្លួនពាក់ព័ន្ធនឹងការផលិតខ្សែភាពយន្តឯកសារ «ម្ដាយខ្ញុំ លក់ខ្ញុំ» ជាមួយស្ថានីយទូរទស្សន៍រុស្ស៊ី បានឡើងមកតវ៉ាជាថ្មីម្ដងទៀតនៅមុខស្ថានទូតរុស្ស៊ី បន្ទាប់ពីតុលាការបានច្រានចោលពាក្យសុំនៅក្រៅឃុំរបស់មេធាវីលោក។
នៅព្រឹកថ្ងៃទី០២ ខែមករា ឆ្នាំ២០១៩ នេះ ក្រុមគ្រួសារ និងអ្នកគាំទ្រលោក រ៉ាត់ រត្នមុនី បានឡើងមកតវ៉ាជាថ្មីនៅមុខស្ថានទូតរុស្ស៊ី ដើម្បីតាមដានញត្តិរបស់ខ្លួនដែលបានផ្ញើទៅកាន់ស្ថានទូតនេះតាមសារអេឡិចត្រូនិកកាលពីពាក់កណ្ដាលខែមុន និងបន្ទាប់ពីពួកគេទទួលដំណឹងថា តុលាការក្រុងភ្នំពេញបានសម្រេចចិត្តច្រានចោលពាក្យសុំនៅក្រៅឃុំរបស់លោក រត្នមុនី ហើយ កាលពីថ្ងៃច័ន្ទដើមសប្ដាហ៍នេះ។
ភរិយាលោក រ៉ាត់ រត្នមុនី គឺអ្នកស្រី ឡុង គឹមហ៊ាន មានប្រសាសន៍ថា ការឡើងមកតវ៉ានេះគឺចង់ឃើញរដ្ឋាភិបាលរុស្ស៊ីមានវិធានការជួយដល់ប្តីរបស់អ្នកស្រី បន្ទាប់ពីអ្នកស្រីអស់សង្ឃឹមលើប្រព័ន្ធតុលាការនៅកម្ពុជា។
អ្នកស្រី ឡុង គឹមហ៊ាន៖ « ពីដំបូងខ្ញុំគិតថា ពួកគេជាអ្នករៀនអ្នកសូត្រ អ្នកធ្វើការ មានឱកាសមានតួនាទីក្នុងសង្គម ពួកគេគួរតែផ្ដល់យុត្តិធម៌ដល់ប្រជាពលរដ្ឋ ហើយជាពិសេសដល់ប្ដីខ្ញុំ គឺខ្ញុំមានសង្ឃឹមបែបនេះ។ ប៉ុន្តែ ពួកគេបែរអត់បានប្រើប្រាស់ឱកាសនិងតួនាទីរបស់ពួកគេ សមត្ថភាពរបស់ពួកគេ ដើម្បីផ្ដល់យុត្តិធម៌ដល់ប្ដីខ្ញុំទេ! ពួកគេនៅតែបន្តឃុំខ្លួនប្ដីខ្ញុំឲ្យនៅពន្ធនាគារទៀត! ពួកគេអត់បានដោះលែងប្ដីខ្ញុំឲ្យនៅក្រៅឃុំទេ ដូច្នេះហើយ ពួកខ្ញុំនឹងនៅតែបន្តការតស៊ូមតិ ហើយខ្ញុំពិតជាខកចិត្តនឹងតុលាការកម្ពុជាមែនទែន » ។
ការតវ៉ានៅព្រឹកនេះ ក៏មានការប៉ះទង្គិចគ្នារវាងអាជ្ញាធរ និងអ្នកតវ៉ាបន្តិចផងដែរខណៈអ្នកតវ៉ាព្យាយាមដើរស្រែកទាមទារមុខស្ថានទូតប្រទេសនេះ ទោះជាយ៉ាងណា គ្មានមន្ត្រីស្ថានទូតរុស្ស៊ីណាម្នាក់ ចេញមកជួបអ្នកតវ៉ានោះទេ។
មេធាវីការពារក្តីឲ្យលោក រ៉ាត់ រត្នមុនី គឺលោក សំ ទិត្យសីហា បានឲ្យ VOD ដឹងថា ចៅក្រមស៊ើបសួរ លោក សេង ឬទ្ធី កាលពីថ្ងៃច័ន្ទបានបដិសេធមិនឲ្យកូនក្តីរបស់លោកបាននៅក្រៅឃុំនោះទេ ខណៈលោកនឹងព្យាយាមដាក់លិខិតស្នើសុំម្តងទៀតនៅដើមសប្ដាហ៍ក្រោយ។
លោកថា៖ « យើងនឹងដាក់ពាក្យសុំឲ្យលោកនៅក្រៅឃុំជាលើកទីពីរមួយទៀត បន្ទាប់ប្រសិនជាគាត់មិនព្រមទេ យើងនឹងដាក់ពាក្យទៅកាន់សាលាឧទ្ធរណ៍ទៀតទៅតាមនីតិវិធីច្បាប់។ ព្រោះយើងមានសិទ្ធិអាចដាក់ជាលើកទីពីរ ហើយយើងក៏មានសិទ្ធិប្ដឹងទៅឧទ្ធរណ៍ទៅនឹងសេចក្តីសម្រេចមិនឲ្យនៅក្រៅឃុំនេះទៅឧទ្ធរណ៍ផងដែរ » ។
អ្នកនាំពាក្យសាលាដំបូងរាជធានីភ្នំពេញ លោក សួស វិទ្យារ៉ាន់ឌី ថា លោកនៅមិនទាន់ទទួលដំណឹងពីការសម្រេចរបស់ចៅក្រមស៊ើបសួរលើករណីលោក រ៉ាត់ រត្នមុនី នេះនៅឡើយទេ។
លោកថា៖ « ចាំមើលខ្ញុំឆែកជាមួយចៅក្រមបន្តិចសិន » ។
កាលពីថ្ងៃទី១៣ ខែធ្នូ លោក រ៉ាត់ រត្នមុនី ត្រូវបានតុលាការកម្ពុជាចោទប្រកាន់នឹងបញ្ជូនទៅឃុំខ្លួននៅពន្ធនាគារព្រៃស បន្ទាប់ពីរកឃើញថា គាត់បានចូលរួមជួយផលិតខ្សែភាពយន្តឯកសាររបស់ស្ថានីយទូរទស្សន៍រុស្ស៊ី RT រឿង «ម្ដាយខ្ញុំ លក់ខ្ញុំ» ដែលរដ្ឋាភិបាលចាត់ទុកថា ជាការធ្វើឲ្យប៉ះពាល់ដល់កេរ្តិ៍ឈ្មោះរបស់កម្ពុជា។
លោកត្រូវបានតុលាការចោទប្រកាន់ពីបទញុះញង់ឲ្យមានការរើសអើង តាមមាត្រា ៤៩៦នៃក្រមព្រហ្មទណ្ឌ ដែលត្រូវប្រឈមនឹងទោសក្នុងពន្ធនាគារពី១ ទៅ៣ឆ្នាំ៕