មេដឹកនាំសហជីពមួយរូប បានចោទអាជ្ញាធរខណ្ឌសែនសុខថា បានធ្វើសកម្មភាពផ្ទុយទៅនឹងសេចក្ដីណែនាំរបស់រដ្ឋាភិបាល បន្ទាប់ពីពួកគេបានចុះទៅរុះរើរោង ដែលត្រូវបានសាងសង់ឡើងសម្រាប់រៀបចំពិធីរំឭកខួបនៃព្រឹត្តិការណ៍បង្ក្រាបដ៏ហិង្សានៅលើផ្លូវវេងស្រេង កាលពី៥ឆ្នាំមុន។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ បាន វី.អូ.ឌី នៅថ្ងៃនេះថា សមត្ថកិច្ចខណ្ឌសែនសុខដឹកនាំដោយអភិបាលរងខណ្ឌម្នាក់ នៅព្រឹកថ្ងៃនេះ បានចុះទៅរុះរើរោងដែលត្រូវបានសាងសង់ឡើងសម្រាប់ពិធីសូត្រមន្តមួយ ដែលគ្រោងរៀបចំធ្វើឡើងនៅរសៀលថ្ងៃនេះ ដើម្បីរំឭកដល់ហេតុការណ៍បង្ក្រាបដ៏បង្ហូរឈាមនៅលើផ្លូវវេងស្រេង កាលពីថ្ងៃទី៣ ខែមករា ឆ្នាំ២០១៤។
លោក វន់ ពៅ បានប្រាប់ថា អាជ្ញាធរបានចោទថា ការរៀបចំពិធីនេះ មិនបានសុំការអនុញ្ញាតជាមុននោះឡើយ ហើយរោងដែលសាងសង់ឡើងនោះ ធ្វើឲ្យស្ទះផ្លូវសាធារណៈ។
ទោះជាយ៉ាងណា លោក វន់ ពៅ បានហៅសកម្មភាពរបស់អាជ្ញាធរខណ្ឌសែនសុខថា ជាការរឹតត្បិតសិទ្ធិសេរីភាពអង្គការសង្គមស៊ីវិល និងធ្វើឡើងផ្ទុយទៅនឹងសេចក្ដីណែនាំរបស់ក្រសួងមហាផ្ទៃកាលពីខែធ្នូកន្លងមក។
លោក បន្តថា៖ «ជាការរឹតត្បិតសេរីភាពមកលើការធ្វើសកម្មភាព។ វាផ្ទុយទៅនឹងសេចក្តីប្រកាសរបស់ក្រសួងមហាផ្ទៃកាលពីថ្ងៃទី២៧ កន្លងទៅថ្មីៗនេះ។ យើងចង់ឱ្យមានការបើកទូលាយសេរីភាពនៃការធ្វើសកម្មភាពរបស់អង្គការសង្គមស៊ីវិល សហជីព សមាគមឡើងវិញ ឱ្យដូចទៅនឹងលិខិតរបស់ក្រសួងមហាផ្ទៃ »។
រដ្ឋមន្ត្រីក្រសួងមហាផ្ទៃ លោក ស ខេង បានចេញសេចក្ដីណែនាំមួយកាលពីខែធ្នូកន្លងទៅ ដោយណែនាំទៅអាជ្ញាធរទាំងអស់ ឲ្យផ្តល់កិច្ចសហការល្អជាមួយអង្គការសង្គមស៊ីវិល ហើយមិនតម្រូវឲ្យជូនដំណឹងទៅអាជ្ញាធរជាមុននោះឡើយ។
សមាគមរបស់លោក វន់ ពៅ គ្រោងរៀបចំពិធីរំឭកខួប៥ឆ្នាំនៃការបង្ក្រាបដោយហិង្សាទៅលើសកម្មជនសិទ្ធិមនុស្ស និងក្រុមកម្មករ នៅមុខរោងចក្រយាកជីន និងនៅមុខសួនឧស្សាហ៍កម្មកាណាឌីយ៉ា ក្រោមប្រធានបទ «យើងមិនអាចបំភ្លេចបាន» នៅរសៀលថ្ងៃនេះ។
ការបង្ក្រាបដ៏បង្ហូរឈាមទៅលើការតវ៉ារទាមទារដំឡើងប្រាក់ខែរបស់ក្រុមកម្មករកាលពីថ្ងៃទី២ និងថ្ងៃទី៣ ខែមករា ឆ្នាំ២០១៤ បានបណ្ដាលឲ្យកម្មករ ៤នាក់ស្លាប់ កម្មករជាច្រើននាក់ទៀតរងរបួស ខណៈមនុស្សម្នាក់បានបាត់ខ្លួនរហូតមកដល់សព្វថ្ងៃនេះ។
មនុស្សចំនួន ២៣នាក់ ក្នុងនោះមានទាំងលោក វន់ ពៅ ផងដែរ ត្រូវបានអាជ្ញាធរចាប់ខ្លួន និងបញ្ជូនទៅឃុំខ្លួននៅគុកត្រពាំងផ្លុង ស្ថិតខេត្តត្បូងឃ្មុំទៀតផង៕