តម្លៃប្រេងឥន្ធៈនៅកម្ពុជា បានបន្តចុះថ្លៃបន្ថែមទៀតនៅដើមខែនេះ ខណៈដែលតម្លៃប្រេងឆៅនៅលើទីផ្សារអន្តរជាតិ ក៏បន្តដាំក្បាលចុះផងដែរ ចំពេលដែលទីផ្សារភាគហ៊ុន និងហិរញ្ញវត្ថុអន្តរជាតិមាន ធ្លាក់ចុះផងដែរ។
ក្នុងសេចក្ដីជូនដំណឹងកាលពីថ្ងៃទី៣១ ខែធ្នូ ក្រសួងពាណិជ្ជកម្មបានឲ្យដឹងថា តម្លៃប្រេងសាំងធម្មតា និងប្រេងម៉ាស៊ូត នឹងត្រូវដាក់លក់នៅលើទីផ្សារក្នុងតម្លៃ ៣២០០រៀល ចាប់ពីថ្ងៃទី១ ដល់ថ្ងៃទី១៥ ខែមករានេះ ដោយបានធ្លាក់ចុះចន្លោះពី ១០០ ទៅ ១៥០រៀលបន្ថែមទៀត បើធៀបនឹងតម្លៃដាក់លក់រាយនៅតាមស្ថានីយ៍ប្រេងឥន្ធៈកាលពីពាក់កណ្ដាលខែធ្នូកន្លងមក។
បើតាមក្រសួងពាណិជ្ជកម្ម តម្លៃប្រេងឥន្ធៈដែលត្រូវបាននាំចូលដោយមិនទាន់គិតពន្ធសម្រាប់សាំងធម្មតា មានតម្លៃប្រមាណ ១ ៤០០រៀល ខណៈប្រេងម៉ាស៊ូត មានតម្លៃប្រមាណ ១ ៧០០រៀលតែប៉ុណ្ណោះ។
កាលពីខែកក្កដាឆ្នាំមុន រដ្ឋាភិបាលបានចាប់ផ្ដើមអនុវត្តប្រព័ន្ធនៃការគិតពន្ធថ្មីទៅលើប្រេងឥន្ធៈ ដោយថា ដើម្បីជួយកាត់បន្ថយការចំណាយរបស់ពលរដ្ឋ ប៉ុន្តែថា តាមរយៈនៃការគិតពន្ធបែបថ្មីនេះ រដ្ឋត្រូវខាតបង់ថវិកាជាង ៣៣លានដុល្លារអាមេរិកក្នុងមួយឆ្នាំ។
តម្លៃប្រេងឥន្ធៈនៅកម្ពុជាបានធ្លាក់ចុះបន្ថែមទៀតបែបនេះ ចំកើតឡើងចំពេលដែលតម្លៃប្រេងឆៅនៅលើទីផ្សារអន្តរជាតិបានដាំក្បាលចុះផងដែរ។
ទីភ្នាក់ងារព័ត៌មាន Reuters បានចុះផ្សាយនៅថ្ងៃនេះថា តម្លៃប្រេងឆៅនៅសហរដ្ឋអាមេរិកសម្រាប់លក់នៅពេលអនាគត បានធ្លាក់ចុះប្រហែល ២ភាគរយ មកនៅតម្លៃត្រឹមតែ ៤៥.៦១ដុល្លារប៉ុណ្ណោះក្នុងមួយបារ៉ែល។
បើតាមសេចក្ដីរាយការណ៍របស់ Reuters តម្លៃប្រេងឆៅនៅលើទីផ្សារអន្តរជាតិបានដាំក្បាលចុះបន្ថែមទៀតបែបនេះ បណ្ដាលមកពីការធ្លាក់ចុះតម្លៃប្រាក់ដុល្លាររបស់អាមេរិកធៀបទៅនឹងប្រាក់យ៉េនរបស់ជប៉ុន ហើយទីផ្សារភាគហ៊ុនរបស់ក្រុមហ៊ុនបច្ចេកវិទ្យា Apple ក៏បានកាត់បន្ថយទំហំនៃការលក់ផងដែរ៕