ក្រសួងព័ត៌មានគ្រោងបង្កើតទូរទស្សន៍យ៉ាងតិច ៣ប៉ុស្ដិ៍បន្ថែមទៀត ឲ្យទីភ្នាក់ងារសារព័ត៌មានកម្ពុជា (AKP) និងវិទ្យុជាតិកម្ពុជា ដោយថា ស្ថាប័នទាំងពីរនេះ បច្ចុប្បន្ននេះ មានតែការផ្សព្វផ្សាយតាមគេហទំព័រ និងរលកធាតុអាកាសជាសម្លេងតែប៉ុណ្ណោះ។
អ្នកនាំពាក្យក្រសួងព័ត៌មាន លោក អ៊ុក គឹមសេង ប្រាប់ VOD នៅថ្ងៃនេះថា ការបង្កើតទូរទស្សន៍បន្ថែមនេះ មិនប៉ះពាល់ដល់កម្មវិធីទូរទស្សន៍ជាតិទេ ដោយថា នៅខ្វះម៉ោងផ្សាយច្រើន និងផ្តល់ប្រយោជន៍ដល់ប្រជាពលរដ្ឋកាន់តែធំ។
លោក អ៊ុក គឹមសេង មានប្រសាសន៍ថា៖ «មានអីត្រូវជាន់គ្នា! ដូច្នេះ យើងមានកម្មវិធីច្រើន បញ្ហាវប្បធម៌ សិល្បៈ កីឡាស្អីៗហ្នឹង យើងនៅខ្វះពេលម៉ោងដើម្បីផ្សព្វផ្សាយអាហ្នឹងច្រើនណាស់។ ការផ្សព្វផ្សាយកាន់តែទូលំទូលាយ កាន់តែគ្របដណ្តប់ បានន័យថា មានវិសាលភាពធំជាងមុនដោយសារយើងមាន Chanel ផ្សេងអញ្ចឹង(ប៉ុស្តិ៍ទូរទស្សន៍)។ យើងអាចពង្រីកកម្មវិធីបានទូលំទូលាយ ដូចជា កម្មវិធីកីឡា វប្បធម៌ សិល្បៈ ធុរកិច្ចអញ្ចឹងទៅណា៎»។
អ្នកនាំពាក្យរូបនេះមិនមានព័ត៌មានលម្អិតពីមាតិការព័ត៌មាន និងពីថវិកាសម្រាប់បង្កើតទូរទស្សន៍ទាំងនេះនៅឡើយទេ ដោយថា ហាក់ដូចជាលឿនពេក មិនមានគម្រោងក្នុងដៃ និងថា ថវិកាសម្រាប់ចំណាយលើការបង្កើតស្ថានីយ៍ទូរទស្សន៍ថ្មីទាំងនេះ គឺអាស្រ័យទៅលើរដ្ឋាភិបាលជាអ្នកអនុម័ត។
ប្រធានក្លឹបអ្នកកាសែត លោក ប៉ែន បូណា អបអរសាទរចំពោះគម្រោងនេះ ដោយថា ធ្វើឲ្យពលរដ្ឋអាចទទួលប្រភពព័ត៌មានបានសម្បូរបែប។
លោក ប៉ែន បូណា មានប្រសាសន៍ថា៖ «ធម្មតា យើងអ្នកសារព័ត៌មានដូចគ្នា យើងអបអរសាទរនៅពេលដែលមានឃើញសារព័ត៌មានថ្មីៗកើតឡើងទាំងទោះ។ វិទ្យុក៏ដោយ ទូរទស្សន៍ក៏ដោយ អនឡាញក៏ដោយ យើងគិតថា វាជាការល្អសម្រាប់ជាប្រភពសម្បូរបែបដល់មហាជនដែលគាត់អាចជ្រើសរើសបានថា តើគាត់ត្រូវមើលព័ត៌មានបែបណា?។ ដូច្នេះ សម្រាប់ខ្ញុំ ឲ្យតែមានសារព័ត៌មានថ្មីកើតឡើង ខ្ញុំអបអរសាទរបាទ!»។
សម្រាប់ប្រធាននាយកដ្ឋានប្រព័ន្ធផ្សព្វផ្សាយនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ លោក ណុប វី លើកឡើងថា ការបង្កើតឲ្យមានប្រព័ន្ធផ្សព្វផ្សាយថ្មីៗ មិនមានន័យថា ជាការរីកចម្រើននៃការផ្តល់ព័ត៌មានជូនទៅដល់ប្រជាពលរដ្ឋ និងឆ្លុះបញ្ចាំងឲ្យឃើញពីលំហសេរីភាពប្រព័ន្ធផ្សព្វផ្សាយនៅកម្ពុជាទេ។
លោក ណុប វី មានប្រសាសន៍ថា៖ «អញ្ចឹង សម្រាប់ការរីកចម្រើនការកើតមានប្រព័ន្ធផ្សព្វផ្សាយថ្មីៗ មិនមែនមានន័យថា ប្រទេសយើងមានការរីកចម្រើនផ្នែកសេរីភាពសារព័ត៌មានទេ។ ការរីកចម្រើនផ្នែកសេរីភាពសារព័ត៌មាន គឺសំដៅទៅដល់ស្ថាប័នប្រព័ន្ធផ្សព្វផ្សាយដែលផ្តល់ព័ត៌មានចម្រុះទៅដល់ប្រជាពលរដ្ឋ ទាំងព័ត៌មានដែលមានការគាំទ្ររដ្ឋាភិបាល គាំទ្រគណបក្សនយោបាយផ្សេងៗ និងព័ត៌មានដែលមាននិន្នាការកណ្តាលផ្តល់ព័ត៌មាន ផ្តល់ការអប់រំទៅកាន់ប្រជាពលរដ្ឋ»។
របាយការណ៍របស់ក្រសួងព័ត៌មាន ឲ្យដឹងថា បច្ចុប្បន្ននេះ មានកាសែតដែលផ្សាយជាប្រចាំចំនួន ៥១២អង្គភាព ព័ត៌មានព្រឹតិ្ដបត្រដែលផ្សាយតាមអនឡាញចំនួន ៧២អង្គភាព ស្ថានីយទូរទស្សន៍ផ្សាយតាមរលកធាតុអាកាស និងទូរទស្សន៍ខ្សែកាបទាំងផ្សាយផ្ទាល់ និងទាំងផ្សាយបន្តផ្ទាល់ មានចំនួនជាង ២០០ និងស្ថានីយផ្សាយតាមប្រព័ន្ធឌីជីថលមានចំនួន ៥។
កាលពីចុងឆ្នាំ២០១៧ វិទ្យុអាស៊ីសេរីបានសម្រេចបិទការិយាល័យរបស់ខ្លួន បន្ទាប់ពីមានបញ្ហាចម្រូងចម្រាស់លើបញ្ហាពន្ធជាមួយរដ្ឋាភិបាល។ ក្នុងអំឡុងពេលនោះ ស្ថានីយ៍វិទ្យុក្នុងស្រុកចំនួន ៣២ដែលវិទ្យុអាស៊ីសេរី វិទ្យុវីអូអេ និងសារព័ត៌មានមួយចំនួនទៀតជួលសម្រាប់ផ្សាយ ត្រូវក្រសួងព័ត៌មានសម្រេចឲ្យផ្អាកដល់បច្ចុប្បន្ន ដោយថា ប្រតិបត្តិការបំពានច្បាប់។
អង្គការអ្នកសារព័ត៌មានគ្មានព្រំដែន (Reporters Without Borders) បានចេញរបាយការណ៍ប្រចាំឆ្នាំ២០១៨ ដោយបានទម្លាក់ចំណាត់ថ្នាក់សេរីភាពសារព័ត៌មាននៅកម្ពុជាដល់ទៅ ១០លេខ ពោលគឺនៅឆ្នាំ២០១៨ កម្ពុជាស្ថិតនៅលេខរៀងទី១៤២ ធៀបនឹងចំណាត់ថ្នាក់១៣២ កាលពីឆ្នាំ២០១៧៕
