មន្ត្រីសង្គមស៊ីវិលដែលធ្វើការទាក់ទងនឹងសុវត្ថិភាពចរាចរណ៍ ជំរុញឲ្យមានការបង្កើនការត្រួតពិនិត្យយានយន្ត និងឲ្យអ្នកបើករថយន្តធុនធំទៅរៀនជំនាញបើកបរបន្ថែមទៀត បន្ទាប់ពីមានករណីបុករះនៅផ្លូវជាតិលេខ៤។
មនុស្សម្នាក់ បានស្លាប់ ហើយ៨នាក់ផ្សេងទៀតបានរងរបួស ក្រោយពីរថយន្តធុនធ្ងន់មួយ បានបុករះទៅលើរថយន្តយ៉ាងតិច ២០គ្រឿងផ្សេងទៀត នៅលើកំណាត់ផ្លូវជាតិលេខ៤ ជិតជ្រោះពេជ្រនិល ស្ថិតក្នុងឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ កាលពីសប្ដាហ៍មុន។
គ្រោះថ្នាក់ចរាចរណ៍មួយនេះ បានជំរុញឲ្យមានការចោទសួរអំពីប្រសិទ្ធភាពនៃការត្រួតពិនិត្យប្រព័ន្ធសុវត្ថិភាពរថយន្តធុនធ្ងន់ បន្ទាប់ពីសមត្ថកិច្ចខេត្តកំពង់ស្ពឺ បានបញ្ជាក់ថា គ្រោះថ្នាក់ចរាចរណ៍មួយនេះ បណ្ដាលមកពីរថយន្តធុនធ្ងន់ដាច់ហ្វ្រាំង។
អនុប្រធានវិទ្យាស្ថានសុវត្ថិភាពចរាចរណ៍ លោក គង់ រតនៈ បានលើកឡើងថា ភាគច្រើននៃរថយន្តធុនធ្ងន់នៅក្នុងប្រទេសកម្ពុជា គឺជាប្រភេទរថយន្តចាស់ ដែលត្រូវបានប្រើប្រាស់តៗគ្នាជាច្រើនឆ្នាំមកហើយ ដោយគ្មានការត្រួតពិនិត្យត្រឹមត្រូវនោះឡើយ។
មន្ត្រីជំនាញ់សវុត្ថិភាពចរាចរណ៍រូបនេះ បានជំរុញទៅសមត្ថកិច្ច និងក្រុមហ៊ុនដឹកជញ្ជូនទាំងអស់ ឲ្យពង្រឹងការត្រួតពិនិត្យទៅលើប្រព័ន្ធសុវត្ថិភាពនៃរថយន្តដឹកជញ្ជូនធុនធ្ងន់ទាំងនោះ ដោយថា ដើម្បីធានាដល់សុវត្ថិភាពនៃការបើកបរ និងអ្នកធ្វើដំណើរដទៃទៀតនៅលើដងផ្លូវ។
លោក គង់ រតនៈ មានប្រសាសន៍ថា៖ «អ្វីដែលត្រូវពង្រឹងហ្នឹង គឺខ្ញុំគិតថា មានតែម្ចាស់យានយន្តហ្នឹងឯង យកចិត្តទុកដាក់បន្ថែម ជាមួយនឹងអាជ្ញាធរហ្នឹងឯង ត្រូវជួយត្រួតពិនិត្យទៅថា សន្លឹកបណ្ណ ឬក៏សុពលភាពនៃលិខិតត្រួតពិនិត្យវាជិតដល់ហើយ ឬនៅ?»។
លោក គង់ រតនៈ បានជំរុញទៅអ្នកបើកបរឡានធុនធំ ឲ្យទៅចូលរួមបណ្តុះបណ្តាលបន្ថែមទៀតអំពីសុវត្ថិភាពរថយន្ត ដោយថា មិនសូវឃើញមានសាលាបង្រៀនរថយន្តធុនធំ និងថា អ្នកបើកឡានធុនធំចេះតៗគ្នា និងអ្នកខ្លះមិនចេះអក្សរទៀតផង។
អ្នកនាំពាក្យក្រសួងសាធារណការ និងដឹកជញ្ជូន លោក វ៉ា ស៊ឹមសុរិយា បានឲ្យដឹងថា ក្រសួងបានរៀបចំឲ្យមានសាលាបង្រៀនបើកបររថយន្តធុនធំរួចរាល់ហើយ ហើយក្រសួងក៏គ្រោងហៅក្រុមហ៊ុនដឹកជញ្ជូនធំៗទាំងអស់ ឲ្យបញ្ជូនអ្នកបើកបររបស់ពួកគេ ឲ្យមកចូលរួមវគ្គបណ្ដុះបណ្ដាលជំនាញបើកបរឡើងវិញ។
លោក វ៉ា ស៊ឹមសុរិយា មានប្រសាសន៍ថា៖ «ក្រសួងបានរៀបចំសាលាបើកបររថយន្តធំៗហើយ។ យើងនឹងអញ្ជើញក្រុមហ៊ុនធំៗទាំងអស់ឲ្យបញ្ជូនអ្នកបើកបររបស់ខ្លួនមករៀនឡើងវិញ គឺវាពាក់ព័ន្ធនឹងទំនិញគ្រោះថ្នាក់ផ្សេងទៀត ដូចជា ស៊ីទែនប្រេង ឬក៏ហ្គាស ឬក៏ទំនិញមានដូចជា ជី ឬក៏គ្រឿងផ្ទុះផ្សេងៗអីជាដើមហ្នឹង ក្រសួងបានរៀបចំហើយ»។
កាលពីចុងឆ្នាំ២០១៧កន្លងមក រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានបញ្ជាទៅក្រុមហ៊ុនដឹកជញ្ជូនទាំងអស់ ឲ្យណែនាំទៅអ្នកបើកបររថយន្តធុនធំរបស់ពួកគេ កុំឲ្យប្រើប្រាស់គ្រឿញៀន ដោយលោកថា គ្រោះថ្នាក់ចរាចរណ៍ដែលបង្កឡើងដោយរថយន្តធុនធំ បណ្ដាលមកពីអ្នកបើកបរប្រើប្រាស់គ្រឿងញៀន។
របាយការណ៍គ្រោះថ្នាក់ចរាចរណ៍ផ្លូវគោករបស់នគរបាលជាតិ បានឲ្យដឹងថា មនុស្សដល់ទៅ ១ ៧៦១នាក់ បានស្លាប់ ហើយមនុស្សដល់ទៅ ៤ ៧៧០នាក់ផ្សេងទៀត បានរងរបួសធ្ងន់ស្រាលនៅទូទាំងប្រទេសកាលពីឆ្នាំ២០១៨កន្លងមកនេះ៕