ក្រសួងប្រកាសបិទក្រុមហ៊ុនកែច្នៃយានយន្តមិនមានអាជ្ញាបណ្ណទាំងអស់

រដ្ឋមន្ត្រីក្រសួងសាធារណការនិងដឹកជញ្ជូន គ្រោងបិទក្រុមហ៊ុនកែច្នៃយានយន្តមិនមានអាជ្ញាបណ្ណទាំងអស់ នៅក្នុងឆ្នាំ២០១៩នេះ។​

ថ្លែងក្នុងពិធីបើកសន្និបាតបូកសរុបការងារឆ្នាំចាស់និងទិសដៅការងារឆ្នាំថ្មីនៅព្រឹកនេះ រដ្ឋមន្ត្រីក្រសួងសាធារណការនិងដឹកជញ្ជូន លោក ស៊ុន ចាន់ថុល ឲ្យដឹងថា លោកនឹងបិទក្រុមហ៊ុនកែច្នៃយានយន្តអត់អាជ្ញាបណ្ណទាំងអស់។ លោកថា ក្រុមហ៊ុនមិនមានអាជ្ញាបណ្ណទាំងនោះ បានកែច្នៃរថយន្តខុសបច្ចេកទេស និងនាំឲ្យមានការដឹកទំនិញ លើសទម្ងន់កំណត់។​

លោក ស៊ុន ចាន់ថុល មានប្រសាន៍ថា៖ «ឆ្នាំ២០១៩ល្មមរកនីតិវិធីបិទក្រុមហ៊ុនកែច្នៃយានយន្តដោយគ្មានអាជ្ញាបណ្ណត្រឹមត្រូវ ហ្នឹងទីមួយ!។ ទី២ ខ្ញុំនឹងខិតខំធ្វើការជាមួយ ឯកឧត្តម សេង ឈួន ដាក់ជាប្រព័ន្ធអនឡាញយ៉ាងណាមួយ ឬជាកុំព្យូទ័រ ដើម្បីត្រួតពិនិត្យតាមដានឲ្យជាប់ បើក្រុមហ៊ុនដដែលៗ ឡានដដែលៗហ្នឹង ដែលយើងចាប់ដោយសារគាត់ដឹកទំនិញលើសទម្ងន់ប៉ុន្មានដងហ្នឹង! នៅក្នុងកុំព្យូទ័រយើងទាំងអស់ ហើយបិទគាត់តែម្តងទៅ!»។

រដ្ឋមន្ត្រីរូបនេះបន្តថា លោកស្នើទៅអ្នកគ្រប់គ្រងកំពង់ផែក្រុងព្រះស៊ីហនុនិងភ្នំពេញឲ្យសហការគ្នាប្រចាំការទប់ស្កាត់នៅកំពង់ផែទាំងពីរតែម្តង ដោយថា អាចបង្កើតអង្គភាពថ្មីមួយទៀតដើម្បីធ្វើការងារនេះ។