អតីតឧត្តមទីប្រឹក្សាជាន់ខ្ពស់គណបក្សសង្រ្គោះជាតិ លោក គង់ គាំ និងកូនប្រុសរបស់លោក បានដាក់លិខិតទៅរដ្ឋមន្ត្រីក្រសួងមហាផ្ទៃជាផ្លូវការកាលពីថ្ងៃម្សិលមិញ ដោយថា ដើម្បីស្នើសុំសិទ្ធិធ្វើនយោបាយឡើងវិញ។
អតីតថ្នាក់ដឹកនាំជាន់ខ្ពស់អតីតបក្សប្រឆាំងរូបនេះ បានប្រាប់ វីអូឌី នៅថ្ងៃនេះថា លោកមានជំនឿចិត្តថា ព្រះមហាក្សត្រ នឹងផ្ដល់សិទ្ធិធ្វើនយោបាយរបស់លោក និងកូនប្រុសលោក គឺលោក គង់ បូរ៉ា ឡើងវិញ។
លោក គង់ គាំ មានប្រសាសន៍តាមទូរស័ព្ទថា៖ «តាមសាលដីកានេះ ខ្ញុំក៏បានមិនល្មើសអីដែរ មិនបានធ្វើនយោបាយ មិនបានចូលគណបក្សនយោបាយ មិនបានឈរឈ្មោះ មិនបានប្រទូស្តរាយជាមួយគណបក្សណាទេ។ ដូច្នេះ ជឿជាក់យ៉ាងមុតមាំថា នឹងទទួលបាននីតិសម្បទាធ្វើនយោបាយឡើងវិញដោយព្រះមហាក្សត្របាទ»។
លោក គង់ គាំ បញ្ជាក់ថា នៅពេលរួចផុតពីបំរាមតាមសាលដីកាតុលាការកំពូល លោកនឹងចូលរួមជីវិតនយោបាយជាមួយគណបក្សឆន្ទៈខ្មែរ ដែលត្រូវបានបង្កើតឡើងដោយកូនប្រុសពៅរបស់លោក គឺលោក គង់ ម៉ូនីកា។
លោកបន្ថែមថា ចំណែកកូនប្រុសរបស់គាត់ គឺលោក គង់ បូរ៉ា នឹងវិលទៅចូលក្រមខណ្ឌរដ្ឋចាស់ជាមន្ត្រីនៅក្រសួងកសិកម្មវិញ ក្រោយពេលទទួលបានសិទ្ធិធ្វើនយោបាយឡើងវិញ។
លោក គង់ គាំ និងកូនប្រុសពីរនាក់ទៀតរបស់លោក ស្ថិតនៅក្នុងចំណោមថ្នាក់ដឹកនាំអតីតបក្សប្រឆាំង ១១៨នាក់ផ្សេងទៀត ដែលត្រូវបានតុលាការកំពូលសម្រេចហាមឃាត់សិទ្ធិធ្វើនយោបាយរយៈពេល ៥ឆ្នាំ កាលពីពាក់កណ្ដាលខែវិច្ឆិកា ឆ្នាំ២០១៧ ជាពេលដែលគណបក្សសង្គ្រោះជាតិ ត្រូវបានតុលាការសម្រេចរំលាយចោល៕