តួលេខពីរដ្ឋាភិបាល បានបង្ហាញថា ទំហំនៃការនាំចេញអង្កររបស់កម្ពុជាកាលពីឆ្នាំមុន បានធ្លាក់ចុះ ១.៥ភាគរយ បើធៀបនឹងឆ្នាំ២០១៧ ហើយរដ្ឋាភិបាលបានបន្ទោសបញ្ហានេះទៅលើការប្រកួតប្រជែងនៅលើទីផ្សារអន្តរជាតិ។
របាយការណ៍ស្ដីពីស្ថានភាពនៃការនាំចេញអង្ករកម្ពុជាប្រចាំឆ្នាំ២០១៨ ដែលចេញដោយក្រសួងកសិកម្ម បានឲ្យដឹងថា កម្ពុជានាំចេញអង្ករបានជាង ៦២ម៉ឺនតោន នៅចន្លោះពីខែមករា ដល់ខែធ្នូឆ្នាំមុន ដោយបានធ្លាក់ចុះចំនួន ១.៥ភាគរយ បើធៀបនឹងទំហំនៃការនាំចេញអង្ករ ៦៣ម៉ឺនតោនកាលពីឆ្នាំ២០១៧កន្លងមក។
ប៉ុន្តែ ទំហំនៃការនាំចេញអង្កររបស់កម្ពុជានៅក្នុងខែធ្នូកន្លងមកនេះ មានចំនួន ១២ម៉ឺនតោន ដោយមានសន្ទុះកើនឡើងខ្លាំងដល់ទៅ ៤៣ភាគរយ បើធៀបនឹងខែធ្ នូឆ្នាំ២០១៧កន្លងមក។
តួលេខពីរដ្ឋាភិបាលក៏បានឲ្យដឹងផងដែរថា កម្ពុជាបាននាំអង្ករដល់ទៅ ១៧ម៉ឺនតោនទៅកាន់ប្រទេសចិន ដែលធ្វើឲ្យប្រទេសកុម្មុយនីស្តមួយនេះក្លាយជាទីផ្សារធំជាងសម្រាប់អង្ករកម្ពុជាដែលមានចំណែកដល់ទៅ ២៧.១៧ភាគរយ ខណៈដែលកម្ពុជានាំចេញអង្ករទៅប្រទេសបារាំងបានជិត ៩ម៉ឺនតោន តាមពីក្រោយដោយប្រទេសម៉ាឡេស៊ីទំហំជាង ៤ម៉ឺនតោន ប្រទេសហ្គាបុងជាង ៣ម៉ឺនតោន និងហូឡង់ជិត ៣ម៉ឺនតោន។
ប្រធាននាយកដ្ឋានការពារដំណាំ នៃអគ្គនាយកដ្ឋានកសិកម្ម លោក កែវ មុន្ធីវុធ មានប្រសាសន៍ថា ទំហំនៃការនាំចេញអង្កររបស់កម្ពុជាបានធ្លាក់ចុះបែបនេះ បណ្ដាលមកពីបញ្ហាទឹកជំនន់ដែលប៉ះពាល់ដល់ទិន្នផលស្រូវកាលពីឆ្នាំមុន ការប្រែប្រួលនៃទីផ្សារអង្ករ និងការប្រកួតប្រជែងក្នុងចំណោមប្រទេសនាំចេញអង្ករធំៗនៅជិតខាងកម្ពុជា។
លោកថា៖ «ឥណ្ឌា ប៉ាគីស្ថាន ក្រៅពីថៃ និងវៀតណាម ពីរហ្នឹងក៏គេបញ្ចេញអង្ករដែរ ហើយរាល់ការបញ្ជាទិញមួយចំនួន ក៏ងាកទៅខាងនោះដែរ ដែលមានតម្លៃប្រកួតប្រជែងជាមួយយើង»។
ទោះជាយ៉ាងណា លោកបញ្ជាក់ថា កម្ពុជានឹងជំរុញការនាំចេញអង្ករនៅឆ្នាំ២០១៩នេះ តាមរយៈការកិច្ចសហការជាមួយប្រទេសចិន ដែលបានសន្យាទទួលនាំចូលអង្ករពីកម្ពុជាចំនួន ៣០ម៉ឺនតោនក្នុងមួយឆ្នាំ។
បើតាមរបាយការណ៍ដដែលខាងលើនេះ អង្ករកម្ពុជាត្រូវនាំចេញដោយក្រុមហ៊ុនឯកជនចំនួន ៨៧ ទៅកាន់ប្រទេសចំនួន ៦០នៅទូទាំងពិភពលោក៕
