ក្រុមអ្នកសារព័ត៌មានមកពីស្ថាប័នចម្រុះ បានទទូចទៅតុលាការគ្រប់ជាន់ថ្នាក់ ឲ្យទម្លាក់ចោលបទចោទប្រកាន់ ទៅលើអតីតអ្នកយកព័ត៌មានវិទ្យុអាស៊ីសេរីពីររូប តែ១ថ្ងៃប៉ុណ្ណោះមុនជំនួបប្រចាំឆ្នាំរវាងលោកនាយករដ្ឋមន្ត្រី ហ៊ុន សែន និងក្រុមអ្នកសារព័ត៌មានកម្ពុជា។
និពន្ធនាយកសារព័ត៌មានកាសែត ខ្មែរ ថាមស៍ លោក ម៉ៃ ទិត្យថារ៉ា បានឲ្យដឹងថា ក្រុមអ្នកសារព័ត៌មានមកពីស្ថាប័នផ្សេងៗគ្នា បានចេញលិខិតចំហមួយនៅថ្ងៃនេះ ដោយបានស្នើទៅតុលាការរាជធានីភ្នំពេញ ឲ្យទម្លាក់ចោលបទចោទប្រកាន់លើលោក អ៊ួន ឈិន និងលោក យាង សុធារិន្ទ ហៅ យាង សុជាមេត្តា ដែលសុទ្ធតែជាអតីតអ្នកយកព័ត៌មានឲ្យវិទ្យុអាស៊ីសេរី។
អ្នកសារព័ត៌មានរូបនេះ លើកឡើងថា ការបន្តដាក់ឱ្យអតីតបុគ្គលិកវិទ្យុអាស៊ីសេរីទាំងពីរនាក់នេះ ស្ថិតក្រោមការត្រួតពិនិត្យរបស់តុលាការ ធ្វើឱ្យប៉ះពាល់ដល់សេរីភាពសារព័ត៌មាន និងប៉ះពាល់ជីវភាពរស់នៅរបស់ពួកគេទាំងនោះផងដែរ។
លោកមានប្រសាសន៍ថា៖ «បាទ! ជាការពិតហើយ បើសិនជាតុលាការលោកពិចារណាទម្លាក់បទចោទទាំងស្រុងទៅលើពួកគាត់ទាំងពីរនាក់ហ្នឹង ខ្ញុំគិតថា វាជាការបើកចំហជើងមេឃទៅលើសេរីភាពសារព័ត៌មានយើងបាទ។ យើងមានសេរីភាពគ្រប់គ្រាន់ក្នុងការធ្វើការ»។
លោក អ៊ួន ឈិន និងលោក យាង សុធារិន ត្រូវបានតុលាការសម្រេចដោះលែងឲ្យនៅក្រៅឃុំកាលពីខែសីហាឆ្នាំមុន និងដាក់ឲ្យស្ថិតនៅក្រោមការត្រួតពិនិត្យតាមផ្លូវតុលាការ
ក្រុមអ្នកសារព័ត៌មាន បានហៅវិធានការនេះថា ធ្វើឱ្យអ្នកទាំងពីរពិបាកក្នុងការរស់នៅ និងមិនអាចបំពេញការងារជាអ្នកកាសែតបន្តទៀតបាន។
លោក ម៉ៃ ទិត្យថារ៉ា បានឲ្យដឹងទៀតថា ក្រុមអ្នកសារព័ត៌មានក៏នឹងដាក់លិខិតចំហនេះ ទៅលោកនាយករដ្ឋមន្ត្រី ហ៊ុន សែន ផងដែរ ដែលគ្រោងជួបក្រុមអ្នកសារព័ត៌មាននៅថ្ងៃស្អែកនេះ។
ក្រៅពីលិខិតចំហរបស់ក្រុមអ្នកសារព័ត៌មានកម្ពុជា មេធាវីការពារក្តីឱ្យអតីតបុគ្គលិកវិទ្យុអាស៊ីសេរីទាំងពីរូប គឺលោក កែវ វន្នី កកាលពីថ្ងៃម្សិលមិញនេះ ក៏បានស្នើទៅសាលាដំបូងរាជធានីភ្នំពេញ ឲ្យបិទបញ្ចប់ការស៊ើបសួរលើកូនរបស់លោក និងស្នើឲ្យទម្លាក់ចោលបទចោទប្រកាន់ទៅលើកូនក្តីរបស់ខ្លួន។
លោកបន្ថែមថា៖ «បាទ! មកទល់ពេលវាអត់មាន ភស្តុតាងវាអត់មានគ្រប់គ្រាន់ នៃធាតុផ្សំ។ ដូច្នេះ ខាងខ្ញុំចង់ឱ្យមានការទម្លាក់ការចោទប្រកាន់ ដោយសារអត់មានភស្តុតាងតែម្តងក្នុងរឿងទាំងពីរហ្នឹង»។
អ្នកនាំពាក្យសាលាដំបូងរាជធានីភ្នំពេញ លោក សួស វិទ្យារ៉ាន់ឌី សុំមិនបកស្រាយទេ ដោយបានប្រាប់ថា លោកត្រូវការមើលសំណុំរឿងនេះជាមុនសិន។
សាស្ត្រាចារ្យសារព័ត៌មាន នៃសាកល័យវិទ្យាកម្ពុជា លោក មឿន ឈានណារិទ្ធិ ជឿថា អ្នកសារព័ត៌មានទាំងពីររូបនោះ មិនបានប្រព្រឹត្តខុសវិជ្ជាជីវៈធ្ងន់ធ្ងរនោះទេ ហើយការចោទប្រកាន់លើអ្នកទាំងពីរ បានផ្តល់ផលអវិជ្ជមានដល់អ្នកសារព័ត៌មានដទៃ។
លោក មឿន ឈានណារិទ្ធិ មានប្រសាសន៍ថា៖ «អញ្ចឹង បើសិនជាអ្នកសារព័ត៌មាន គាត់រារែក មិនហ៊ានផ្សាយព័ត៌មានដែលអវិជ្ជមាន ដែលចម្រូងចម្រាស់នោះ វាខាតបង់ទាំងអស់គ្នា។ ខាតបង់ទាំងអ្នកសារព័ត៌មាន ខាតបង់ទាំងរាជរដ្ឋាភិបាល ខាតបង់ទាំងសង្គមទាំងមូល»។
លោក អ៊ួន ឈិន និង លោក យាង សុធារិន ត្រូវបានអាជ្ញាធរចាប់ខ្លួនកាលពីពាក់ខែវិច្ឆិកា ២០១៧ ហើយត្រូវបានតុលាការចោទប្រកាន់ពីបទប្រគល់ឱ្យរដ្ឋបរទេសនូវព័ត៌មានជាអាទ៍ដែលបង្កអន្តរាយដល់កិច្ចការពារជាតិ ឬចារកម្ម៕