លោកនាយករដ្ឋមន្ត្រី ហ៊ុន សែន បានបញ្ជាដល់ក្រសួងព័ត៌មាន និងក្រសួងពាក់ព័ន្ធធ្វើការពិនិត្យពិភាក្សាលើច្បាប់ទាក់ទងនឹងព័ត៌មានចំនួន៣ ដោយថាដើម្បីធានាដល់សេរីភាព និងលុបបំបាត់ព័ត៌មានមិនពិត។
លោក ហ៊ុន សែន ថ្លែងក្នុងពិធីជួបជាមួយអ្នកសារព័ត៌មាននៅរសៀលនេះ ដោយស្នើដល់ក្រសួងព័ត៌មាន ក្រសួងទូរគមនាគមន៍ និងក្រសួងពាក់ព័ន្ធធ្វើការពិនិត្យឡើងវិញទៅលើច្បាប់ចំនួន៣ដែលរួមមាន ច្បាប់ស្ដីពីសិទ្ធិទទួលព័ត៌មាន ច្បាប់ស្ដីពីរបបសារព័ត៌មានឆ្នាំ១៩៩៥ និងច្បាប់ឧក្រិដ្ឋកម្មតាមអ៊ីនធឺណិត ដោយធ្វើយ៉ាងណាឲ្យច្បាប់ទាំងបីនេះស្របគ្នា ងាយស្រួលអនុវត្ត និងលុបបញ្ហាព័ត៌មានក្លែងក្លាយ។
លោកថា៖ « ច្បាប់ទាំងអស់ត្រូវមានភាពស៊ីគ្នាជាមួយគ្នា បំពេញឲ្យគ្នាទៅវិញទៅមក រាប់ទាំងការបំពេញបន្ថែមជាមួយនឹងក្រមព្រហ្មទណ្ឌ ដែលយើងកំពុងតែប្រើប្រាស់នេះផងដែរ ដើម្បីផ្ដន្ទាទោសទៅលើបទល្មើសបច្ចេកវិទ្យា។ នេះជាចំណុចដែលខ្ញុំចង់លើកឡើងមុនដើម្បីដោះស្រាយបញ្ហាដែលទាក់ទងនឹងការគ្រប់គ្រង និងជំរុញឲ្យមានការជឿនលឿនក្នុងវិស័យព័ត៌មានរបស់កម្ពុជា » ។
សូមរំលឹកផងដែរថា បច្ចុប្បន្នច្បាប់សម្រាប់វិស័យព័ត៌មាននៅកម្ពុជា គឺមានតែច្បាប់ស្ដីពីរបបសារព័ត៌មានឆ្នាំ១៩៩៥ប៉ុណ្ណោះដែលកំពុងអនុវត្ត ខណៈច្បាប់ពីរទៀតគឺច្បាប់ស្ដីពីសិទ្ធិទទួលបានព័ត៌មាន និងច្បាប់ស្ដីពីឧក្រិដ្ឋកម្មតាមអ៊ីនធឺណិតកំពុងស្ថិតក្នុងសេចក្ដីព្រាងនៅឡើយ៕
